ألواح القدر (الجزء الأول و الثاني)

#البارت_الثامن_عشر

#البارت_الثامن_عشر
#ألواح_القدر
#حور_ساري
نظرت جومانا إلى ابيها بجمود و لم تجيب عليه و تركته و توجهت نحو غرفتها ، ليوقفها والدها بغضب و يقول : لما اكلمك تقفي و تردي عليا
التفت له جومانا و قالت : اتفضل اتكلم انا سامعه حضرتك
محمد : كنتى فين
جومانا ببرود : بتفسح
محمد بغضب : ردي عدل و قولي كنتي فين
جومانا بغضب مماثل : حضرتك ملكش الحق انك تتعصب عليا و تزعق و تقف قدامي تسأل انا كنت فين بعد اللى عملته
لتتركه جومانا و تذهب غرفتها بغضب ليقتحم والدها الغرفه و يقول لها : انا عايز اتكلم معاكي
جلست جومانا على الفراش و أشارت إلى كرسي موضوع بالغرفه و قالت : اتفضل اقعد و قول اللى عندك انا سمعاك و ياريت اللى هتقوله يكون مبرر للي عملته
جلس محمد و نظر إلى ابنته طويلاً ثم قال : كبرتي يا جومانا
تعجبت جومانا مما قاله والدها لتقول له : حضرتك لسه واخد بالك؟
محمد : انتي مفهمتيش قصدي انا اقصد انك كبرتي لدرجه انك معتمده على نفسك اعتماد كلي ، انتى عمرك م احتجتيني في حاجه حتى الفلوس اللى انا كنت بديها ليكي انتى كنتى بتركنيها...انتى كنتي بتشتغلي و بتديري ورشه كامله لوحدك كنتي مسؤله عن شغل ناس و عن مرتبات بتدفع و الشغل كله فوق راسك ، فعشان كده انا غيرت منك
جومانا بتعجب : غيرت!!
محمد : اه غيرت.. مش من نجاحك بس من انك عرفتي تمشي حياتك عادي و انا واقف زي منا شايفك بتكبري قدامي كل يوم و عمرك م جيتي لجأتي ليا ، كل حاجه بتعمليها لنفسك حتى ف انك تدخلي كليه الشرطه انتى دورتي علي طريقه في حاجه كانت مستحيله و نجحتي و كل ده لوحدك.. ف اه يا جومانا انا غيرت.. انا زي م انتى قولتي جبان و مقدرتش اعمل حاجه من ساعه اللى حصل زمان
تجمعت الدموع بأعين محمد و قال: انا لسه مفوقتش من اللى حصل .. انا لسه بشوف والدتك يا جومانا.. أنا لسه بحبها
نظرت جومانا لوالدها بصدمه فهي المرة الأولى التي تجري معه نقاش عن حياتهم ، ليردف والدها و يقول : انا مش هنكر انى بحب أمل و انى لو لفيت العالم كله مش هلاقي زيها بس في نفس الوقت مش قادر انسى والدتك... لما ببصلك بفتكرها و بشتقلها و بحب ابص في ملامحك عشان بتفكريني بيها بس غصب عني مبقدرش انسى اللي هي عملته ف انا اسف يا بنتى لو كنتى فهمتي انى بكرهك بسببها او عشان انتى شبهها
ليردف بعدما هربت من عينه دمعه : ده انتى بنتي! البنت الوحيده اللي طلعت بيها في الدنيا.. ازاى أكرهك!!؟.
لما عرفت انك اتخطفتي و مرجعتيش مع زمايلاك كنت هتجنن ازاى؟ ليه مرجعتيش معاهم اشمعنى انتى؟ ... كنت هموت من القلق عليكي ، بس لما عرفت  اللى انتى عملتيه في اللي خطفوكي عقلي وقف و كنت بسأل نفسي ازاى بنتى عملت كده؟؟ كان كل خوفي من انك تمري ب نفس اللي انا مريت بيه مكنتش عايزك تلوثي ايدك بالدم مكنتش عايزك تبقي زيي.. غصب عنى خوفي عليكي اتحول لغضب منك و لما سليمان كلمنى على الورشه قولتله يبيعها و بيعتها في ساعتها عشان كنت غضبان منك.. ازاى انتى جبتي القوه عشان تعملي كل ده؟؟ تنقذي صحابك و الضابط و تنهي حياه اللى خطفوكي و تقفي قدامهم ده خلاني مصدوم فيكي يا جومانا.. انا اسف على اللي عملته اسف في تقصيري معاكي.. انا رميتك لجدك بعد اللى حصل و بعد موته محاولتش اتقرب منك و اخليكي قريبه مني ، ف انا عايزك تسامحيني يا جومانا سامحيني عشان انا مبحبش في الدنيا دي قدك ف سامحيني.
كانت دموع جومانا تنساب و هي تستمع الى والدها و إلى ما يقوله بصدمه لتقترب منه جومانا و تجثوا على ركبتيها أمامه و نظرت له و قالت : انا مسمحاك ، انا عمري م كرهتك يا بابا و طول عمري بحبك .. اه احنا حياتنا اتشقلبت بس انا بحبك.. و انا اسفه على الكلام اللي قولته الصبح..انا مكنتش اقصد الكلام اللى قولته ده من غضبي و ضيقي من اللي حصل انا مكنتش واعيه انا بقول ايه بسبب غضبي يا بابا ف بعد ازنك اقبل اعتذاري
جذب محمد ابنته إلى احضانه و قال لها : متعتذريش علي حاجه يا بنتي لو الغلط على حد ف الغلط عليا انا.. انا اللى بعدت عنك و سبتك و مكنتش جنبك و انا اللى بعت الورشه اللي كان روحك فيها ، ف انا اللي اسف يا حبيبتي انا اللى اسف.
احتضنت جومانا والدها و قالت له و هي تمسح دموعها : خلاص كفايه دراما لحد كده و لو على الورشه خلاص كده كده مكنتش هشتغل فيها طول حياتي يعني اهم حاجه انت يا حبيبي.
لتتركه و تأخذ الملف و تناوله اياه و تقول : بص ده الملف اللي اتعمل ليا.. ده إلى غير حياتي و هيغيرها تماماً
نظر محمد الي الملف و أخذه منها و تفحصه و قال متسائلاً : يعني بالملف ده هتقدري تدخلي المدرسه ؟
اومأت جومانا رأسها و قالت : ايوا
قبل محمد رأس ابنته و قال لها : مبروك عليكي يا حبيبتي
ليقف و تقف جومانا هي الأخرى معه و يقول لها و هو يخرج من الغرفه : انتى بردوا مقولتيش انتى كنتى فين
ابتسمت جومانا و قالت : قولتلك كنت بتفسح
ليبتسم محمد هو الاخر و يقول : ماشي انا مش عايز اكون رخم معاكي ، تصبحي على خير يا حبيبتي
جومانا : وانت من اهل الخير
خرج محمد و ترك جومانا التى كانت في حيرة مما يحدث أيعقل ان والدها لم يكرهها يوماً بل كانت مجرد خيالات آمنت هي بها!! نفضت جومانا أفكارها و استسلمت للنوم.
بعد مرور عدة إيام كانت جومانا تودع والدها أمام باب منزلهم
ليقول محمد على مضض : انا ممكن ملحقش اودعك قبل م تدخلي المدرسه كده
جومانا : يا حبيبي بس ده شغلك و لازم تسافر و لو على المدرسه كلها ست شهور و هبقي ارجع
، سافر انت بس شغلك و متشغلش بالك
محمد : طب أأجل السفر على الاقل اجي معاكي النهاردة عشان نقدم في المدرسه.
امل : يا محمد هو اللي هنعيده هنزيده قولتلك متخافش انا هقدملها في المدرسه و بعدين مش هنكون لوحدنا الرائد نديم كتر خيره هيجي معانا
نظر لهم محمد مطولا ثم حمل حقيبته و هم ان يخرج من باب المنزل ليقف و ينظر إلى جومانا و قال : طب تعالى هاتي حضن عشان مش عارف هشوفك تاني امتى
أسرعت جومانا اليه و عانقت والدها لتبتعد عنه و تقول له : متخافش عليا انت مخلف راجل
ابتسم لها محمد و قال : اهي دي حاجه انا متأكد منها
ليضحك الجميع و يودعهم محمد و يخرج من المنزل تحت انظارهم ، بعد مرور ساعه كانت ارتدت جومانا ملابسها و كذلك امل و أخيها عمرو لتقول جومانا : يعني كان لازم تيجي معايا
امل بحده : امشي من قدامي لحد م البس اخوكي
جومانا : طب يا امول م اروح انا و نديم بس نقدم علي المدرسه
امل : اه كل حاجه بقت نديم دلوقتي
جومانا : لا مش القصد قصدي يعني اني مش عايزة اتعبك
امل : اخص عليا وانا اللي كنت فاكرة انك كنتي عايزة تروحي مع نديم لوحدكم عشان الجو يخلى ليكم؟ قد اي انا وحشه يا جومانا
همت جومانا ان تقول شيئا لكن قاطعها نديم الذي يهاتفها لتجيب عليه جومانا و تقول : ايوا انت تحت
نديم : ايوا يا حبيبي براحتك خالص انا مستنيكي
جومانا : تمام انا نازله خلاص اهو
غلقت جومانا الهاتف مع نديم ثم نظرت إلى امل و قالت : انا هنزل لنديم تحت لحد م تخلصي
امل : م تقولي ليه يطلع عشان يشرب حاجه
جومانا : يا امل مفيش وقت
امل : طب مفيش نزول لوحدك هننزل كلنا سوا
جومانا : يا امل بقي
امل و هي تعدل من حجابها أمام المرآة : خلاص انا خلصت اهو يلا بينا
نزلوا إلى نديم الذي ينتظرهم بالأسفل ليستقلوا معه السيارة بعد ترحاب نديم لهم ،كانت جومانا تجلس بجوار نديم و أمل و أخ جومانا يجلسون بالخلف لتستغل جومانا هذا و تقول لنديم بهمس : وحشتني
ابتسم نديم لها و قال بهمس مماثل : وحشتيني اكتر
ليردف : باباكي سافر؟
جومانا : بالعافيه مكنش راضي يسافر عشان يلحق يودعني لما ادخل المدرسه بس اقنعته ان ده شغله و كده
اومئ نديم براسه لتقول له جومانا : هو احنا لما نروح المدرسه هيحصل ايه؟
نديم : هتقدمي ورقك و هيعملوا ليكي شويه اختبارات
جومانا بأستغراب : اختبارات ايه!! انا مش مجهزة اي حاجه عشان يختبروني
نديم : متقلقيش هما ممكن يخلوكي تجري كام متر و يحسبوا انتى خدت وقت قد ايه في الجري بس كده و طبعا هيعملوا ليكي كشف طبي سريع بس مشتغليش بالك انا عارف انك هتتقبلي.
جومانا : هتقبل بمجهودي ولا بواسطه؟
نديم : المدرسه هتحدد هتقبلك ولا لاء احنا معملناش حاجه غير الملف بتاعك بس
اومأت جومانا رأسها بتوتر ليمسك نديم يديها في محاوله منه لبث الطمأنينة بها متناسياً امل التى تجلس و تراقبهم لتقول هي فاجئه : هو فاضل كتير يا نديم
سحبت جومانا يديها من بين يدين نديم لينظر لها بغضب و يجيب علي امل بضيق من حركه جومانا : خلاص قربنا اهو
صمت نديم طوال الطريق حتى وصلوا إلى المدرسه ، خرجوا جميعا من السيارة ف استغلت جومانا انشغال امل مع أخيها و اقتربت من نديم و قالت : مالك؟
نديم بضيق : مفيش يلا بينا ندخل
جومانا ب إصرار : لا فيه قول مالك
نديم : ليه بتشيلي ايدك من ايدي خايفه من ايه؟؟ ليه حسستيني اننا بنعمل حاجه غلط؟؟ امل عارفه اللي بينا ليه بقي تعملي حركه زي دي؟
جومانا : و لو بردوا يا نديم مينفعش ابقي قدمها بالمنظر ده
نديم : تمام يا جومانا
جومانا : طب متزعلش
نظر لها نديم بضيق لتقول له جومانا : خلاص بقي متبقاش رخم
رفع نديم حاجبه لتقول له جومانا : لا مهو متجيش النهاردة و تضايق انا اصلا متوترة و خايفه لمتقبلش في ام المدرسه دي
نديم : خلاص مش متضايق بس متعمليش الحركه دي تاني
ابتسمت جومانا له و قالت : حاضر بس اضحك بقي و فك التكشيرة دي
ابتسم نديم لها و قال : حلو كده
جومانا بحب : قمر يا ناس والله قمر
ضحك نديم علي ما قالته جومانا لتقترب منهم امل و تقول : خير بتضحكوا عل ايه
جومانا : عليا يا امول بنضحك عليا
لتردف جومانا بجديه : المهم يلا بينا ندخل دلوقتي عشان انا متوترة جدا و لو وقفنا هنا اكتر من دقيقه هلف و ارجع تمام؟ يلا بينا بقي.
دخلوا إلى المدرسه و بدأت جومانا بعمل بعض الفحوصات و بعدئذ انتقلت الى اختبار اللياقه لتنجح فيه و خضعت إلى بعض الاسئله لتقييم حالتها النفسيه لتنجح جومانا في جميع الاختبارات حتى جاء موعد مقابلتها مع مدير المدرسه دخلت جومانا و نديم إلى المدير بينما امل انتظرتهم بالخارج ، كانت تجلس امام المدير و هو يتفحص سجلها لينظر المدير إلى جومانا و نديم و قال : انا اسف بس مش هقدر اقبلك في المدرسه عندي
جومانا بصدمه : ليه؟؟ انا نجحت في كل الاختبارات... ليه ليه متقبلنيش؟؟... انا نجحت في كله
نديم : استني يا جومانا ثواني
لينظر إلى المدير و قال: اقدر اعرف ليه مش هتتقبل؟
المدير و هو ينظر إلى الملف الخاص بجومانا : هي اجتازت كل الاختبارت اه بس ده مش كافي انى اقبلها في المدرسه ، انا مش هتكلم ان الدراسه بدأت بقالها شهر هنا في المدرسه و ان دخولها اصلا هيبقي صعب لاء هي كمان معندهاش اللي يميزها عشان تدخل المدرسه يعني مفيش مهارات ولا فيه بطولات على الاقل حتى مفيش بطوله سباحه مش هقول بطوله للفنون القتاليه ، أنا آسف جدا يا انسه جومانا انا مش هقدر اقبلك هنا في المدرسه يمكن لو كنت لاقيت شيئ مميز فيكي كنت قبلتك بس للأسف مش هقدر
نديم : طب لو قولتلك حاجه تخليك تقبلها في المدرسه
نظرت جومانا إلى نديم لتعرف فيما يفكر لتقول جومانا له : لا يا نديم خلاص انا مليش نصيب في المدرسه دي
نديم : لا استني
جومانا بغضب : نديم مينفعش الموضوع ده يتعرف
نديم بصوت عالٍ : ممكن تسكتي
لينظر الى المدير و قال : انت قولت انك عايز حاجه مميزة فيها عشان تقبلها.
المدير : ايوا لو لاقيت حاجه تميزها عن أي حد ماشي في الشارع يمكن تتقبل.
نديم : معنديش حاجه اسمها يمكن ل اه ل لاء
المدير : ايوا هقبلها
نديم بثقه : اعمل مكالمه لوزارة الداخليه و اسألهم عن حادثه **** اللى حصلت من اسبوع و اسأل عن جومانا دويدار
المدير : وزاره الداخليه ايه اللي اكلمها و بعدين ده ايه علاقته بيها؟
نديم : انت قولت انك عايز حاجه مميزة ف جبتلك حاجه مميزة
ليقف نديم و تقف معه جومانا : اعمل مكالماتك و انا بإنتظارك برا ، بعد ازنك
ليخرج نديم مع جومانا التى تستشيط غضباً ، لتقول له فور خروجهم : ايه اللي انت عملته ده
نديم : عملت ايه
جومانا : عملت ايه؟؟؟  انا قولتك عايزة اتقبل بمجهودي يا نديم  ف تقوم تقوله علي إلى انا عملته و انت عارف ان المفروض محدش يعرف الموضوع ده!!
نديم : انتى متضايقه عشان لحقت حلمك قبل م يضيع
جومانا : انا خلاص مكنش ليا نصيب في المدرسه
نديم بغضب : مكنش ليكي نصيب؟؟
ليشد نديم جومانا و يتجه إلى ساحه كبيرة بالمدرسه و يشير إلى الطلاب و هم يؤدون تدريباتهم و يقول : عايزة تقنعيني انك مش عايزة تبقي وسطهم ؟؟
نظرت جومانا إلى الطلاب و هم يتدربون على إطلاق النار بشغف لتشعر انها تود ان تنضم اليهم تود ان تكون معاهم ، تركها نديم تشاهد الطلاب و هم يتدربون ليأخذها حماسها في التقرب منهم قليلا و وقفت تشاهدهم لتلاحظ و هي تشاهدهم ان هناك بعض الفتيات يسخرون من فتاه لم تستطع التصويب بطريقه صحيحه لتتفاجئ جومانا بنفسها تقترب من الفتاه و تقول لها : بسبس بسسس  انتي
: انتى بتكلميني انا؟
جومانا : ايوا ، عايزة اقول انك شجاعه عشان قدرتي تمسكي سلاح و تقفي الواقفه اللي وقفتيها من شويه مش اي حد يقدر يعمل زيك مش مهم بقي عرفتي تصوبي ولا لاء المهم انك كنتى شجاعه كفايه انك تقفي قدامهم كلهم و تمسكي سلاح
لتردف جومانا و هي تغمز لها : و ابقي فتحي عينك و انتى بتصوبي متقفليهاش
لتترك جومانا الفتاه و تعود إلى نديم و هي مؤمنه تماما ان هذا هو مكانها الصحيح و انها لن ترحل عن تلك المدرسه الا و هي طالبه بها ؛ عندما عادت إلى نديم وجدته بمكتب المدير لتدلف إلى المكتب بعدما علمت من امل ان نديم ينتظرها بالداخل ، جلست جومانا أمام نديم و مدير المدرسه ليقول المدير لهم : طب انتي مقولتيش ليه من الاول التجربه اللى مريتي بيها بدل اللي حصل ده كله
جومانا : كنت عايزة ادخل المدرسه دي بمجهودي
المدير بذهول : و لما انتى انقذتي فوق العشرين طالب ده مكنش انتى و بمجهودك انتى؟؟ لما وقفتي دافعتي عن نفسك و رفضتي انك تستسلمي للموت ده مكنش مجهودك؟
نديم بغيظ : ياريت تفهمها
جومانا : انا مكنتش حابه اذكر الموضوع ده انت لو كنت هتقبلني في المدرسه كنت تقبلني زي م انا كده
المدير :  و انا هقبلك زي م انتي كده ازاى و انا معرفش حاجه عنك؟ انا كنت محتاج اعرف معلومات عنك و انتى مقولتيش ف بناءاً على كده رفضتك ، لاكن دلوقتي الموضوع اختلف انا دلوقتي مرحب بيكي في المدرسه و احب انك تنضمي جدا هنا انا احب يبقي عندي حد زيك في مدرستي.
انهي مدير المدرسه حديثه و اخذ ملف جومانا و ختم عليه بختم المدرسه ثم وضعه وسط بعض الملفات و قال : بكرة الساعه 9 تبقي في المدرسه
نظرت جومانا إلى نديم بتعجب ليقول لها نديم : شايفه الموضوع اتحل ازاى
لم تنطق جومانا بحرفا و اومأت برأسها لمدير المدرسه و خرجت بصحبه نديم إلى امل التى تنتظرهم لتنظر جومانا الي نديم و تقول : انا مش قادرة أصدق نفسي! ، انا حاسه اني في حلم! انا كل حاجه كنت بتمنها بتتحقق
نديم بابتسامه : قولتلك معايا احلمي و بس
جومانا : ربنا يديمك في حياتي يا نديم
اقتربت امل من جومانا و احتضنتها و قالت : مبروك عليكي يا حبيبتي
جومانا بفرحه : الله يبارك فيكي
نديم : بمناسبه المناسبه السعيده دي تسمحولي اعزمكم علي الغدا
امل : لا انت هتروحنا علي البيت عشان انا اللي عامله ليكوا غدا محلصش بمناسبه دخول جومانا المدرسه
نديم : انا مش عايز اتعبك خلينا نروح نتغدى في اي حته
امل برفض : لا يعني لاء و بعدين الاكل انا محاضراه من امبارح
جومانا : امل قالت لاء يعني لاء ، اطلع بينا على البيت احسن
خرج الجميع من المدرسه و في طريق جومانا للخروج لمحت تلك الفتاه التى تحدث إليها لتُلوح لها جومانا و هي تبتسم بسعاده لتُلوح الفتاه لجومانا أيضاً ، وصل الجميع الي منزل جومانا و جلسوا يتناولون الطعام سوياً وسط فرحتهم لقبول جومانا بالمدرسه و مشاكسه جومانا لنديم و أمل ، انتهوا من تناول الطعام و جلس نديم و جومانا سوياً لبعض الوقت ثم تركهم نديم بعدما اتفق انه من سيوصل جومانا للمدرسه غدا ولا حاجه لقدوم امل معهم.
قامت جومانا بتجميع أغراضها و مستلزماتها في حقيبه كبيرة لتنظر جومانا إلى صورها الفتوغرافيه مع نديم التى كانت وضعتها بإطار و خبئته من والدها لتنظر له جومانا مطولاً و قالت : نديم هيوحشني طول الخمس ست شهور دول و اكيد هناك مش هيبقي معايا فون
لتنظر جومانا إلى الصور بحيرة لتحسم قرارها و تأخذ الصور بدون الإطار و وضعتهم بداخل كتاب و خبئته في حقيبتها.
باليوم التالى استيقظت جومانا مبكراً و تفحصت أغراضها للمره الأخيرة  لتخرج من غرفتها و هي تحمل حقائبها و تنظر ل امل التى كادت تبكي لتقترب جومانا منها و تقول : ممكن افهم بتعيطي ليه؟
امل ببكاء : عشان هتوحشيني اووي
جومانا : و انتى كمان هتوحشيني والله بس انا مش عايزاكي تعيطي عايزاكي تكوني فرحانه عشان بعمل الحاجه اللى انا حباها و بعدين دي كلها كام شهر يا امول و هرجع تاني
امل : بردوا هتوحشيني
لتعانقها جومانا و تقول لها : و انتى اكتر والله بس انا كده هتأخر علي نديم اللي واقف تحت مستنيني
امل : مش هتكلمي ابوكي ؟
جومانا : هكلمه قبل م ادخل المدرسه المهم سلام بقي هاا و سلملي على عمرو لما يصحى
لتدلف جومانا إلى المصعد تحت أنظار امل التى تُلوح لها  امل و هي تبكي ، خرجت جومانا من المصعد لترى نديم يقترب منها و يحمل عنها حقائبها و يضعهم ب سيارته و ينظر لجومانا و يقول : بحبك
جومانا بتعجب : هي مش كان اسمها صباح الخير باين؟
دلفت جومانا الي السيارة و جلست بجوار نديم الذى شغل محرك السيارة و بدء في القياده و قال لها : لا من دلوقتي هتبقي بحبك و بس  ، انا مش هعرف اتواصل معاكي لمده خمس شهور ف انا عايز اقولك بحبك عشان اقدر اوصلك قد اي انا بحبك
جومانا بحب و هي تمسك يده : مش محتاج تقولي بحبك عشان تعرفني قد ايه انت بتحبني ، انا حاسه بحبك يا نديم
جذب نديم جومانا اتجاه لتكون بين احضانه حاولت جومانا الإبتعاد لكن ثبتها نديم و قال : تؤ تؤ متتحركيش هتفضلي قاعده كده لحد م نوصل
جومانا بحرج : مش هينفع كده
نديم : ليه بقي أنشأ الله بقولك ايه انا مش عايز اعتراضات علي حاجه النهارده
ليقول بضيق : انا غلطان انى قولتك علي المدرسه دي من الاول اديكي هتغيبي عن عيني لشهور و مش هعرف اشوفك كتير
جومانا : مكنتش تعرف ساعتها انك هتقع في حبي
نديم : جومانا انا وقعت في حبك من اول م عيني فتحت و شوفتك قدامي
ابتسمت جومانا بخجل و قالت : متهيألي اننا حبينا بعض من اول م شوفنا بعض بس مكناش مدركين ل ده
قبل نديم رأسها و قال : فعلا يا حبيبي
ليقف نديم بالسياره أمام مطعم و يقول لجومانا : يلا بينا
جومانا : هنعمل ايه هنا؟
نديم : يعني واقف قدام كافيه اكيد هنقعد فيه يعني
جومانا بغيظ : م انا اكيد فاهمه بس اقصد اننا هنتأخر على المدرسه
نديم : فاضل ساعه علي معاد المدرسه و بعدين المسافه مش بعيده خلينا نقعد هنا شويه محتاج اشبع منك
ابتسمت له جومانا و خرجت من السيارة ليدخلوا إلى المطعم و يجلسوا و يطلبوا فطور لهم ، بدأو بالافطار سوياً وسط ضحكاتهم  لتقول جومانا لنديم : انت مش هتبطل تحبني صح؟
نديم : جومانا انا سبق و قولت ليكي أنى عمري م هبطل احبك
جومانا بتوتر : انا اقصد اني هقعد فترة طويله في المدرسه و لما هخرج مش هعرف اشوفك كتير و احتمال اتغير في الفتره دي
لتردف بقلق : انت ممكن تقابل واحده و تحبها و تــ ...
قاطعها نديم قائلا : مش هيحصل انا بحبك و هفضل احبك يا جومانا متفكريش باي حاجه تانيه و بعدين يا ستي نبقي نكتب لبعض رسايل نحكي لبعض حصل ايه في يومنا و لما نتقابل ايديكي اللي كتبتهم و تديني اللي كتبتيهم انتى و بكده هنبقي عارفين كل اللي حصل لينا  في المده الي مكناش مع بعض فيها
أمسكت جومانا يد نديم و قالت : بوعدك انى هعمل كده بس انا بردوا مش عايزة اكون بظلمك معايا لو حابب تبعد عني الفتــ ...
قاطعها نديم مجدداً بغضب : جومانا متخليش اخر وقت نقضيه سوا في خناق قولتك بُعد مش هبعد و لو انتى اللى عايزة تبعدي يا جومانا مش هسمحلك انا بحبك و هفضل احبك فاهمه؟
ابتسمت جومانا و قالت : هو انت قلبت بلطجي ولا ايه
نديم بضحك : بلطجي حته واحده؟ اصلا اصلا انتى اللي معصباني
جومانا بأنكار : انا!!
نديم بحب : ايوا بس حتى و انتى معصباني انا بحـ...
: الله الله بقى سيادتك هنا قاعد بتحب في واحده و  انا اكلمك متعبرنيش و من ساعه اخر عمليه ليك ولا مرة تيجي تزورني عشان مقضيها مع الهانم
جومانا بأستغراب : افندم ؟ حضرتك تبقي مين؟
: انا خطيبته يا حبيبتي .. خطيبه نديم
#ألواح_القدر
#حور_ساري
#روايات #رومانسي #مغامرة #تشويق #اكشن #غموض