ألواح القدر (الجزء الأول و الثاني)

#البارت_الثاني

#البارت_الثاني
#ألواح_القدر
#حور_ساري
بداخل مركز الشرطه كان يجلس ضابط  أمام رجل و امرأه و يقول :
_ممكن حضرتكوا تهدوا شويه اكيد زي م قدرنا نوصل لبقيت الاولاد هنقدر نوصل لبنت حضرتكوا
صاح الرجل بغضب :
_انا بنتي كانت معاهم من حقي اعرف هي مرجعتش ليه انا بقالي يومين مبخدش كلام منكوا غير استني و هنوصلها و مفيش حاجه بتحصل
قال الظابط بهدوء :
_يا استاذ محمد انا مقدر موقف حضرتك انت و المدام بس احنا لسه بنحقق في الموضوع
محمد دويدار بغضب :
_لو انتوا مش شايفين شغلكوا عرفونا انا عايز بنتي ترجعلي .
أنهى حديثه ثم نهض مع زوجته ليغادرو المكان ، لينظر الظابط لاثر الرجل بارهاق ثم رفع هاتفه و اجرى مكالمه سريعه فور انتهاءه منها وجد الباب يطرق و يدلف عسكري إلى الغرفه و يقول له :
_ الولاد مستنين برا يا ريان باشا ادخلهم
قال له ريان بأرهاق :
_ تمام دخل واحد واحد
بعد مرور ما لا يقل عن ثلاثون دقيقه ، قال ريان للفتاه التى تجلس أمامه :
_يعني هي كانت معاكي قبل متتخطفوا يا أسراء.
اومأت إسراء رأسها قائلة :
_ ايوا يا فندم هي صحبتي
_ طب متعرفيش هي ليه بلغت بوليس الساعه 12 الا تلت الضهر قبل الحادثه اللي حصلت ليكم
توترت إسراء و لاحظ ريات هذا عندما قالت :
_ اصل.. اصل
لم يمهلها ريان وقت للتفكير كثيراً و صاح بها في غضب :
_ انتي لسه هتقولي اصل و فصل
لتقول له إسراء بخوف :
_اصل حضرتك هي كانت هتبلغ البوليس عن المدرس و السنتر
قال ريان بملل :
_امممم ليه كانت هتبلغ
_عشان كانت متضايقه من المدرس
ريان بذهول :
_عشان اضايقت من المدرس ف كانت هتبلغ عنه!!
ليقول ريان في نفسه : ده احنا شكلنا داخلين على قضيه زي الفل
ثم قال ريان بصوت عالٍ:
_ هاتلي يابني المدرس ده
#####################################
دلف المعلم و جلس امام الضابط ريان ، الذي بدء التحقيق معه قائلاً :
_تعرف ايه عن الطالبه جومانا محمد دويدار
نظر له المعلم و قال :
_ طالبه شاطرة اينعم لسنها طويل و بتعمل كل شويه مشاكل  ، بس كلمه الحق واحده هي من اشطر طلابي
قال له ريان بأستفسار :
_بتعمل مشاكل ازاى يعني ليها خناقات او أعداء مثلا
نفى المعلم قائلاً :
_لا لا خناقات عاديه زي انها  مش بتسيب حقها  مثلا و لو حد قال عليها كلمه معجبتهاش ممكن تروح تضربه و هكذا يعني
_تمام تمام ، عندك اي فكرة انها كانت هتعمل فيك محضر وقت الحا دثه.
اعتدل المعلم في جلسته و قال بذهول :
_ ايه؟!!! محضر فيا! ليه؟
_يعني معندكش فكرة انها كانت هتعمل محضر فيك تمام ، هاتلي اللي بعده يا بني.
############################################
قال ريان إلى الفتى الجالس أمامه بعمليه :
_انت كنت من المخطوفين مع جومانا يا زياد
اومئ زياد رأسه قائلاً :
_ايوا يا فندم
_تمام احكيلي بظبط اللي حصل من اول م اتخطفتوا لحد موصلتوا لينا.
بدء زياد بوصف ما حدث لهم قائلاً :
_احنا كلنا فوقنا بدري معدا جومانا و كام حد كده عشان هي كانت مخبوطه في رأسها.
_ امم...كمل
_هي لما فاقت فكت الكلبشات بتعتها و بعدين راحت للظاب....
قاطعه ريان سريعاً و هو يقول :
_لا استوب كده انت قولت فكت الكلبشات فكتهم ازاى.
#####################################
ترك ريان فنجان القهوة من يديه بعدما ارتشفه كاملا دفعه واحدة و قال بملل لتلك الفتاه الجالسه بغطرسه أمامه :
_ يعني انتي كنتي قاعده جنبها يا رانيا لما فكت الكلبشات بالبنسه اللي في شعرها ؟
اومئت له رانيا رأسها و قالت :
_ ايوا
_ طب مفكتش لحد تاني أو ساعدت حد تاني
نفت رانيا :
_ لا هي قالت مش هساعد حد غير الظابط عشان يحاول يخرجنا من هنا
#####################################
قال ريان في ذهول تام للفتاه التى تجلس أمامه :
_قتـلت الراجل اللي دخل عليكوا
رحمه في توتر ظاهر :
_ ايوا هو كان بيخـنقها راحت خبطته بحاجه في رقبته و مات
ريان : تمام و رد فعلها كان ايه
رحمه : فضلت ساكته و مقالتش غير انه كان يستحق القـتل
##################################
قال ريان بإهتمام شديد :
_الظابط اتخانق معاها ليه؟
أجاب عليه زياد قائلاً :
_عشان كانت بتتصرف من دماغها و اتهورت و ضربت نار علي رجل البلطجي اللي كان موجود
_طب و بعدين ايه اللي حصل
قال زياد متذكراً:
_هي هدتت الراجل التاني بالمسدس انه يفكنا و فعلا فكنا كلنا بس في الاخر الراجل اللي هي ضربته بالنار ضرب طلقه جت في الظابط
##################################
تعجب ريان و قال :
_يعني يا إسراء جومانا كانت متفقه مع الظابط انها تخرجكم؟
اومأت إسراء رأسها و قالت :
_  ايوا ، هو بعد م اتضرب نار عليه ساعدته انه يقف و بعدين راح اتخانق مع الراجلين ، و لقينا جومانا بتقول لينا ان دي فرصتنا اننا نهرب و خدتنا و خرجتنا علي برا
ريان بإهتمام :
_ اممم و بعدين
_ بعد مخرجتنا قالت لينا نكمل مشي ل اخر الشارع و هنلاقي كمين نروح ليه و نقول ليهم على مكانها هي و الظابط و نطلب الإسعاف
######################################
تسأل ريان بتعجب :
_ و هي عرفت منين ان في كمين اخر الشارع
رفع زياد كتفيه قائلاً :
_ معنديش فكرة
#################################
قالت رانيا بضيق :
_هي متهورة و بتحب تعمل نفسها بطله كده دايما ف لما خرجتنا كلنا برا حبت تعيش دور المنقذ اللي بيضحي لأجل الاخرين و قالت لينا انا هروح الحق الظابط و سبتنا و دخلت علي جوا
و اردفت بضيق و تعالي :
_ هو انا هفضل على زمه التحقيق ده كتير عشان أستاذة جومانا حبت تبقى سوبر هيرو و فشلت!
############################################
تنهدت رحمه قائلة :
_احنا لو كنا فضلنا دقيقه كمان في المكان كان ممكن نموت لولا جومانا ، زعلت جدا انها رجعت تاني الظابط و عرضت حياتها للخطر و مجتش معانا
ريان :
_تمام مفيش اي حاجه تاني حصلت
نفت رحمه :
_لاء بس كده
#####################################
قال زياد فجاءه :
_اه صح جومانا لما قالت لينا انها هتدخل للظابط كان معاها مسدس و مفيش تلت دقايق كنت سمعت صدى صوت ضرب نار ف اعتقد انها ممكن تكون لا ماتت لا قتلت حد تاني.
ريان بتعجب :
_يعني انت شايف انها ممكن تكون قتـ ـلت حد تاني جوا
اومئ زياد رأسه ثم قال :
_ايوا
##############################
إسراء بتذكر :
_مش عارفه انا سمعت اه ضرب نار لكن مشوفتش مين اللي ضرب
######################
قالت رانيا بثقه :
_هه I'm sure  ان جومانا هي اللي ضربت نار
######################
نفت رحمه برأسها عدة مرات و قالت :
_ لا مظنش انها موتت حد تانى جومانا شخصيه لطيفه جدا اه موتت واحد قدامنا بس ده عشان كانت مضطرة و هتموت تحت ايده ، ممكن تكون ضربت نار في الهواء مش اكتر من كده
____________________________________
كان ريان يرتشف من قهوته بأرهاق ليقطع صمته طرقات الباب ،  ليقول بتعب :
_ادخل
دلف رجل يبدو بمنتصف الثلاثينات لينهض ريان فور رأيته و قال :
_أدهم باشا اتفضل
جلس أدهم ثم قال له :
_ انت لسه مروحتش انت بقالك يومين هنا.
ريان بوجه يكسوه الإرهاق :
_ والله يا سياده المقدم مش هعرف اروح غير لما الاقي حل للقضيه دي.
تفهم أدهم تعبه ليقول له :
_انا مقدر انك بتعمل ده عشان صاحبك و عايز تعرف مكانه بس ده مش تخصصك اساسا انت ظابط مخابرات مالك انت و مال ظُباط المباحث.
ريان بحرج :
_كنت حابب أحقق مع العيال بنفسي.
_ طب قولي وصلت ل ايه.
_احنا لما وصلنا المخزن اللي العيال كانوا مخطوفين فيه لاقينا تلت جثث و مفيش اي أثر للبنت و الظابط بتاعنا نهائي.
تسأل أدهم :
_طب و التحقيقات وصلت لحد فين؟
_ انا لما اتكلمت مع العيال عرفت ان البنت اللي مرجعتش معاهم  ساعدت الظابط  بتاعنا و  اسمها جومانا دويدار و بيقولولي انها عرفت تفك الكلبشات بتعتها و كمان قتلت واحد من التلت جثث اللي لقيناهم ، و كمان مشتبهه بقـتل الجثتين التانين بس لسه مستني الطب الشرعي يجبلي النتيجه مع رفع البصمات ، و كمان عرفنا ان الظابط مُصاب و عشان كده البنت معرفتش ترجع مع بقيت الاولاد و فضلت معاه تساعده.
أدهم بتعجب:
_ ده بجد ولا  انت بتحكيلي حدوته ؟
نظر ريان بإسف إلى أدهم و قال :
_للأسف بجد ، خد الكبيرة بقي يا سياده المقدم جومانا المشتبهه بقـتل تلت مجرمين عمرها 16 سنه بس.
أدهم بذهول :
_ نعم ، طب و انت ناوي تبلغ أهلها ازاى ولا هتسيب الرائد طارق هو اللي يبلغهم
قال ريان بحيرة :
_ مش عارف ، مش عارف اي حاجه.
_______________________________
بمكان اخر كانت تتململ في نومها لتشعر بوجود شخص نائم بجانبها فتحت اعينيها لترى من ذلك، لتجد أمامها رجل غريب عنها ، لتصرخ جومانا قائلة :
_ ايه ده! انت مين
حاولت النهوض لتجد ان يديها اليسرى مقيده بيد ذلك الرجل الغريب الذى استيقظ لتوه من صراخها ، لتدقق جومانا النظر في وجهه لتهدء عندما تجده ذلك الضابط الذي كانت تساعده ، ليقول لها الضابط بتأفف :
_هو انا كل م اصحي الإقيكي في وشي
قالت له جومانا و هي تشعر بالضيق و الاشمئزاز منه :
_هو انت تطول
نظرت جومانا حولها لترى انها بغرفه تشبه غرف الفندق ، لتقف و تقوم بجذب يد الضابط معاها ليقول لها :
_مش واخده بالك من أيدي يعني.
_ بقولك ايه سبني اشوف احنا فين.
اعتدل الضابط و وقف امامها قائلاً بسخرية :
_و عرفتي احنا فين!
نظرت له جومانا و قالت :
_ بص من منظر المكان شكلها اوضه نوم
اصطنع الضابط التفاجئ و قال بسخرية :
_لا بجد! أحلفي؟ ابهرتيني كنت بحسب اننا في المطبخ مثلا.
نظرت جومانا اليه بضيق ثم اردفت :
_من اثاث الاوضه و  العلامه اللي في الحيطه دي بتقول اننا في فندق.
قال الضابط بإستمتاع من تحليل جومانا :
_ امم و اي كمان
صاحت جومانا به في ضيق :
_هو انت بتتكلم معايا كده ليه مش انت اللي المفروض تشوف حل في المصيبه اللي احنا فيها دي.
سألها الضابط قائلاً :
_ انتى عارفه عدا علينا قد ايه فاقدين الوعي او احنا فين من علي الخريطه اساسا او مين اللي كلبشنا ب الطريقه دي ؟
أجابت جومانا :
_هيكون عدا علينا قد ايه يعني كام ساعه مش اكتر و اكيد اللي كلبشنا في بعض هما هما الناس اللي خطفوني.
ابتسم الضابط ابتسامه صفراء و قال :
_ علامات الضـرب اللي في وشك شكلها عدا عليها تلت ايام او اكتر لان وشك مش وارم هو مزرق بس.
جومانا بصدمه :
_ ايه!!
_  ايوا مالك مصدومه ليه احنا بقالنا تلت ايام او اكتر فاقدين الوعي ، و لو خدتي بالك انا المفروض واخد رصاصه و كنت بنزف و انا حاليا واقف علي رجلي عادي اهو.
جومانا و هي تتحسس وجهها :
_ انا وشي ازرق؟!! و كان ورام؟ انا اتشوهت؟!!
قال الضابط بأستنكار :
_نعم ياختي؟!! هو ده اللي لفت نظرك في الكلام اللي انا قولته؟!!!
_بس خلاص احنا لازم نخرج من هنا في أسرع وقت.
فحصت المكان بنظرة سريعه ثم قالت :
_بص مفيش كاميرات هنا ف اكيد برا الباب ده في حرس ولا بلطجيه واقفين برا عشان منهربش فإحنا هنخرج من البلكونه و ننط في الاوضه اللي جنبنا و نهرب منها
نظر لها الضابط بتفحص ثم قبض علي معصمها بقوه و صدمها بالحائط و قال لها :
_انطقي و قولي حالا انتى مين و مين باعتك بتشتغلي تبع حساب مين ، ولا انتى جايه من جهاز مخابرات تاني؟ انطقي.
الصدمه ألجمت لسانها و لم تستطع النطق ليقول الضابط بغضب و هو يقبض معصم يدها بقوه سببت لها الآلم :
_ردي عليا انتى مين
اغمضت جومانا اعينيها و قالت بهدوء:
_سيب أيدي
نظر لها الضابط ثم خفف قبضته علي يديها :
_ افندم! فين الاجابه بردوا؟
صاحت فيه جومانا بحده :
_بقولك سيب ايدي
ترك الضابط يديها و نظر لها و قال :
_سؤال واحد و عايز إجابته مين زقك عليا؟
قالت جومانا بتعجب :
_هو انت بجد!!! يعني انت بجد بتسأل واحده انت شايفها و هي مخطـوفه وسط شويه عيال و شوفت كل اللي حصلي و الضرب اللي اتضربته عشان تقولي مين زقك عليا!!
_ مهو اللي بتعمليه ده مش طبيعي.
جومانا بذهول :
_ بعمل اي مش طبيعي اني بحاول مموتش ابقي مش طبيعيه! عشان مش جبانه ابقي مش طبيعيه؟ عشان عندي الشجاعه اني أقف قدام اي حد ابقي مش طبيعيه!!
قالت جملتها الأخيرة بصراخ ، نظر لها الضابط بإنهزام ثم قال لها :
_ تمام سوري علي اللى عملته ، ممكن تقوليلي خطتك ايه؟
نظرت له جومانا و هي تحاول تخبئه ابتسامتها لتتصنع البرود و تقول له :
_ بص احنا هنخرج من البلكونه دي و ننط في البلكونه اللي جنبنا و نبقي نخرج و نهرب و كل واحد يرجع بيته
الظابط بتفكير :
_ طب نفترض ان البلكونه اللي جنبنا في ناس و ممكن يعملوا شوشرة
جومانا ببساطه :
_ انت ظابط بقي المفروض تتعامل انت مع المواقف دي.
قال الضابط بأستنكار :
_هو ايه اللي انت ظابط اتعامل مع المواقف دي.
_ ايوا هي كل حاجه عليا انا حطيت الخطه و انت عليك التنفيذ.
نظر لها و هو يحاول منع نفسه من اوساعها ضربا ليقول في غيظ :
_تمام ، تعالى ورايا
خطى خطوات نحو الشرفه و فتحها ليتفاجي انهم على مستوي ارتفاع عالٍ للغايه ، قال الضابط :
_ انتي متخيله اننا هنمشي علي ارتفاع عالى زي ده في حته ضيقه زي دي
جومانا بهدوء :
_ سيبها علي الله.
نظر لها الضابط ثم قفز  بحذر خارج سور الشرفه ليمسك ف الحائط بيده اليسرى ، بينما كانت جومانا تحاول القفز بجانبه لتنجح بالنهايه ليكونوا واقفين على سور رفيع بلكاد يستطيعوا الوقف عليه ليخطوا الضابط خطواتٍ بطيئه بحذر بينما كانت جومانا محتضنه الحائط ، ليقول لها الضابط : _متخفيش انتي مربوطه فيا
نظرت له جومانا و قالت :
_انا مش خايفه انت خايف
ابتسم لها الضابط بخفه و قال :
_سيبها علي الله زيك
اكمل الضابط طريقه بحذر لكن كانت جومانا تقلقه و تفقده توازنه بسبب وقوفها المستمر ليقول لها
الضابط :
_ بطلي تقفي كل شويه و حسبي لتقعي ، امسكي نفسك كويس عشان لو وقعتي هنمـوت احنا الاتنين.
كان يتحدث بينما كانت جومانا تنظر في جهه محدده ولا تعير اي انتباه لذلك الضابط
لتقول جومانا بذهول :
_ باريس!!
_ نعم بتقولي ايه؟
ابتسمت جومانا و قالت ببهجه :
_ بقولك باريس..إحنا في باريس برج إيڤل هناك اهو.
نظر الضابط في اتجاه ماتنظر اليه ليرى برج إيڤل يحلق في الآفق ليتفاجئ بجومانا تقول له في حماس :
_ اعمل حسابك لو خرجنا من هنا عايشين لازم تصورني عند البرج ، مش كل يوم الواحد بيصحى يلاقي نفسه في فرنسا.
لينظر لها الضابط بأندهاش و تعجب و يقول لها :
_ احنا حرفيا بين السما و الأرض و ممكن نمـوت في اي لحظه ، و سيادتك عايزة تتصوري عند برج إيڤل!!! فسحه هي؟!!
قالت جومانا و هي تتقدم بحذر بجانب الضابط :
_ على فكرة انا قولت لو خرجنا من هنا أحياء و بعدين انت لو بتمشي بسرعه كان زمانك وصلت للنحيه التانيه ، مكنتش بلكونه هندخلها هي.
_انا بجد عايز اعرف انتى ازاى بارده كده و كل حاجه عندك سهله اووي كده!!! انتى شايفه الدنيا ازاى؟!!
قال جملته الاخيره و هو يقفز داخل الغرفه المجاورة و ساعد جومانا علي الدلوف ، لتنظر له جومانا و تقول :
_كل حاجه سهله بس انت اللي قفل و قديم و معقد و فاكر نفسك في مسلسل رأفت الهجان
لتسدير و تنظر الي أنحاء الغرفه و تقول له  :
_ خد كل حاجه إيزي يا مان
الضابط بتعجب :
_رأفت الهجان!! ايه اللي دخل رأفت الهجان في اللي احنا فيه ،  و قفل و معقد انتي عارفه انا عندي كام سنه عشان تقوليلي كده
وقفت جومانا أمامه و قالت :
_سنك مش كبير
ثم غيرت حديثها قائلة :
_الظاهر ان مفيش حد هنا غيرنا ، و دور علي اي حاجه بقي عشان نفك بيها الكلبشات دي.
نظر لها ثم سحبها خلفه إلى طاوله موضوعه بوسط الغرفه ، ليجدا طبق فاكهه و سكـين صغير ليأخذ الضابط السكين و بدء بتحرير قيدهم و في ثوانٍ كان حَل وثاقهما.
أمسكت جومانا بيديها ونظرت للضابط و قالت :
_لو رجعنا بلدنا و جمعتنا فرصه سوا عيزاك تعلمني ازاى افك الكلبشات عشان قعدت بتاع ربع ساعه افك فيهم المرة اللي فاتت.
ليقول لها الضابط بذهول :
_ و انتي هتحتاجي تتعملي فك الكلبشات ليه اساسا؟!
نظرت له جومانا بضيق :
_ اهو ده كان رد ماما امل عليا لما لاقتني فاتحه اليوتيوب بتفرج علي واحد بيعلم الناس ازاى تفك الكلبشات ، اديني اتحطيت في موقف يخلني احتاج اعرف ازاى افك كلبش شوفت يا أستاذ بقي انا احتاجته في ايه؟!!
لتتركه و تذهب نحو مرآه موجوده بالغرفه و تنظر بها لتقول :
_ فين وشي ازرق ده م انا وشي حلو اهو و مش ورام ولا حاجه.
نظر  لها الضابط بملل و هو يتفحص المكان ثم أعطاها ظهره و لم يعير لها انتباه ، لتجد جومانا بعض مستحضرات التجميل موضوع بجانب المرآه لتأخذها و تبدء في وضع هذه المسحضرات علي وجهها في محاوله منها لإخفاء علامات الضرب الظاهره في وجهها ، لتجد الضابط اقترب منها و وقف خلفها ثم قال:
_انا تخيلت اني ممكن اتحط في اي موقف ممكن يحصل لبنى آدم في الحياه لكن عمري متخيلت اني ممكن اقف في اوضه مع واحده و هي بتحط ميكاب نهائي.
نظرت له جومانا عبر المرآة و قالت له و هي تضيف بعضاً من احمر الشفا :
_ ولا انا تخيلت ان اول مرة احط ميكاب فيها هتكون عشان اخفي آثار ضرب بالمنظر ده.
لتنتهي و تنظر للضابط الذي اندهش ان مظهرها جيد و ليس بالسيء لفتاه تضع مستحضرات تجميل لمرتها الأولى.
اما جومانا نظرت جانب مستحضرات التجميل لتجد تذكرتين لتأخذهم و تعطيهم إلى الضابط و تقول :
_ بتمني تكون بتفهم فرنساوي
نظر الضابط الي التذكرتين و قرأ ما عليهما لسرعان ماتغير ملامح وجهه ليقول بسرعه :
_احنا لازم نخرج من الاوضه دي فورا
جومانا بأستغراب :
_ليه في ايه
ليقول الضابط بتوتر :
_دول مش تذاكر دي دعوات لمزاد هنا في الفندق مش اي حد بيقدر يوصل للدعوات زي دي بسهوله ف احنا ببساطه كده خرجنا من كهف الدب عشان ندخل لقفص الأسد
قالت جومانا بقلق :
_ مزاد اي بظبط
الضابط بغضب :
_ احنا كنا متخدرين و متكلبشين و دي دعوات لمزاد ف احنا مليون في الميه كنا هنتعرض في المزاد ده
قالت جومانا بتوتر :
_طب احنا هنخرج من هنا ازا...
صمتت عندما أشار لها الضابط ب الصموت ليتفاجئوا بباب الغرفه يفتح و يدلف رجل و امرأه الي الداخل....
#ألواح_القدر
#حور_ساري