ألواح القدر (الجزء الأول و الثاني)

#البارت_الثاني_عشر

قالت جومانا بصوت مختنق له :
_ خدت عهد على نفسي اني دايما هرفع راسي لفوق و مش هسمح لأي حاجه تخليني اوطي رأسي أبداً ، من ساعه اللي حصل و انا كل حاجه بنسبه ليا عادي و بتعامل بلا مبالاه مع كل حاجه ، حتى لما فوقت و عرفت اني اتخطفت كان الموضوع بنسبه ليا عادي ، اللي خلاني اتحرك و أحاول اهرب اني مكنتش عايزة اموت دلوقتي ، مكنتش عايزة اموت و انا مش لاقيه مبرر للي هي عملته فيا!

نظرت لنديم و دموعها تنساب من عينيها و اكملت بقهر:
_ انا مش عايزة حاجه من الدنيا دي كلها غير اني اعرف ليه عملت كده في حياتي ، ليه دمرتني!!

قال نديم في محاوله منه لتهدئتها :
_ انا مش عارف ارد اقولك ايه عشان اياً كان اللي هقوله مش هيساعدك في حاجه ، بس انا هسمعك يا جومانا قولي كل اللي عندك و انا سامعك عيطي و طلعي كل الغضب و الحزن اللي جواكي و انا معاكي مش هزهق و مش همل من اللي انتي بتقوليه ابدا!

قالت جومانا له :
_ بقالي ست سنين مش بسأل نفسي غير ليه هي عملت جريمه زي دي دمرت عيله هاديه و دمرت حياه ابنها و حياتي ، و حياه و سُمعه راجل كان الكبير قبل الصغير بيعمل ليه الف حساب ، ايه اللي يخليها تعمل كده؟!! انا من كتر م السؤال كان شاغلني روحت دورت عشان اعرف ليه الإنسان بيخون ايه اللي يخليه يدمر حياته بسبب الخيانه ملقتش غير أن دي غريزة الواحد مولود بيها مهما تعمل الشخص ده هيفضل خاين بس انا مقتنعتش بردوا كأني مش راضيه أصدق عنها أي حاجه وحشه و بحاول افتكر ليها الأحسن!

صمتت و أصبحت تتنفس بصوت عالٍ حتى هدئت و قالت :
_انا حكيت ليك انت عشان لما كنت هترجع مصر اكيد كنت هتسأل عني أو اقل حاجه هتقرا المعلومات اللي الظباط جبوها عني و هما بيدوروا عليا بعد م اتخطفت.

اجابها نديم بتفهم :
_ متخافيش محدش هيعرف الموضوع ده و احنا مش بندور في البيانات الشخصيه اووي الا لو احتاجنها متقلقيش.

اومأت جومانا و هي تمسح دموعها ثم قالت :
_تمام تمام .

نظر إليها نديم بتفحص ثم جذبها اليه و عانقها بقوه و قال :
_ عيطي يا جومانا.. كملي عياط.

لتنفجر جومانا في البكاء مرة أخرى بين يدين نديم لتقول من بين دموعها :
على الرغم من انها بوظت حياتي و دمرتني بس هي واحشاني اووي يا نديم واحشاني اووي.

ليربت نديم علي ظهرها و هو يحتضنها و قال :
_ادعليها بالرحمه.

رفضت جومانا ببكاء و قالت:
_ مش قادرة..مش قادرة ادعليها بالرحمه... رغم أنها واحشاني اووي بس انا مش قادرة ادعليها بالرحمه و مش عارفه اسامحها يا نديم مش عارفه.