خطأ طبي

Part 54

داليا....

اسبوعين اني مشغولة وية سارة وامتحاناتهة والحمد لله كملت ع خير
ياسر جان مشغول بخسارتة يطلع من الفجر يرجع بنص الليل يريد يعوض الخسرة وهم يعرف منو الباك البضاعة

من يجي هلكان مابي حيل يرفع ايدة حتة مرات ينام بملابسة ميكدر يبدل محد من اهلة عرف بالصار لان مراد يقلقهم وهو متعود يتحمل كل النتائج وحدة ماعدا سوالف العشيرة المتخلص كل يوم مشكلة وهو لازم يلحك لكلشي

فوك هذا كلة خالة يومية تسألة ع الهدية ليش مجبتهة ليش بيت اهلهة اعرفهة حتة تقهرني وهو هم مينطيهة مجال دائما يكوللهة هالشي يخصني هالشي راجعلي

واني المرض تعبني كلش بس مااكدر اروح اراجع صح عندي فلوس لان بابا مسويلي حساب بس بالدوام خط واخاف يكول لياسر والعصر مااطلع رغم هو ميمانع اطلع وحدي بس الة احد يوصلني للمكان الاريدة بس اخاف يتحسس علمود لفلوس ضلت حسبة توديني وحسبة تجيبني لحد ما قررت اطلع من الدوام بدون محد يدري طبعا

وصلني ابو الخط للدوام مافتت ولا محاضرة رأسا طلعت للمستشفى واجراءات كومة لحد مدزوني لطبيب اختصاص شكلة مو طبيب انما بنجرجي مال اوادم بس من لاجارة بقيت اسلوبة زفت

كالي متزوجة اهلج اي احد وياج

لا جاية وحدي

كالي شنو جايتني وحدج ماعندج احد

دكتور هالشي يخصني اجي وحدي او لا الفحوصات موجودة وكلشي كامل بس اريد اتأكد اذا جان ورم مثل مكالولي

اي مو كايليلج سرطان شتتأكدين بعد وعلاج اذا تريدين تتعالجين روحي سافري لان هنا ماكو علاج والورم منتشر براسج كلشي ميفيدج

حقارتة أذتني نفسياً مجنت مهتمة للمرض بكد ما أسلوبة الواطي أذاني

كمت كتلة اشكرك ولو واحد مثلك ميستحق كلمة شكراً مهنتك انسانية وانت ذرة انسانية ماعندك واسلوبة حقير لابعد درجة

كالي احترمي نفسج اني دكتور

مخليتة يكمل كتلة دكتور ع نفسك
كمت اخذت غراضي وطلعت حرامي بس لكشفية بذاك المبلغ وفوكاهة هو ابو الراهي لا اسلوب لا ذوق لا احترام لا انسانية

رجعت للكلية بس شنو دمي محترك حتة راسي كام يوجعني رحت للسنتر اشتريت مي علمود اخذ مسكن كوة هديت نفسي جنت متمنية اسحلة واطيح حظة بلة اجاه طفل لاسامح الله شراح يتعامل ويا ولة وية اهلة او ناس كبار بالعمر حسبي الله علية

انتضرت لحد مهديت وخابرت الخط كتلة كملت وهو هم مااتأخر رجعت للبيت مسطورة بس مجبورة اكمل اليوم ماريد اسمع حجي يغثني اكثر بدلت ونزلت اشتغل واني ساكتة علاقتي بيهم صايرة ع كد السلام رغم شكد يسار يحاول يحجيني او يكلي امشوا نطلع بس اني انغلقت ع نفسي