الحلقة 13 :
_______ بعد سمانة على الاحداث الي صراو ايمان خلاص قرت انها تروح للجامعة و تبدا تقرا ....متقدرش تبقا قاعدة فدار ...توحشت شوفاتو ..المجهول ...كانت كل متخرج من الدار تحس بيه كالظل معاها . يعسها . الحاجة الوحيدة الي تأكدت منها انو مراحش يأديها ....اصلا لوكان جا حاب يڨيسها راهو قتلها كانت عندو قداه من فرصة .
ناضت دخلت لدوش دوشت و خرجت لبست سڨمت روحا هبطت تفطر .
شحال صعيبة تنوض متلقاش ماماك موجدتلك لفطور اه يا دنيا ...كملت فطورها و خرجت ....بدات تمشي بلعقل ، بصح محستش بيه شافت الساعة عرفت بلي توخرت راحت تجري ركبت في طاكسي كريا و ديمارات بيها للجاميعة .
___________
ناض الصباح متوحشها ....حالف اليوم يقتل روحو بالضرب غير باش يشوفها . ول ديما يحط روحو في مواقف خطيرة .باش تجي .
صقر : ايه يا ندى واش درتي فيا . ليوم نجيبك نجيبك . راح للكوزينة حكم موس في يدو . تكا عليه حتا حس بوجاعو ...والدم سال .
__كانت راقدة حست بالسطر في يديها خرجت تجري ...... وصلت لدارو دخلت طول ..
مع شافها ناض يضحك صباح الخير ارنوبة
ندى : صقر متبطلش علينا اللعب هدا ؟؟؟؟ علاه ادير هكا راني نتوجع معاك و واش هادي ارنوبة؟؟؟
صقر : شوفي واش راكي لابسة
ندى شافت مع روحها لقات روحها لابسة بيجامتها مرسوم فيها ارنب . شافت معاه بغش و قاتلو .
ندى : صقر ليوم عندي جاميعة تعيش متديرش فعايلك هادو هكا يحكمني التوسويس وقادرة نكدبك ونتا تكون صح تحتاجني .
صقر : واش ندير ....واش رايك نوليو نسكنو مع بعض ؟
ندى : شوف ا سيدي !!!! علاه ا ماما ولدتك و نسيتك ؟
صقر : ايه بلاك مدام الي ولدتني نساتني صح .
ندى : نتا تاني يتيم ؟
صقر : اممم
ندى : سامحني .
صقر : ماشي مشكل . نوصلك للجامعة ؟؟
ندى : اممم داكوغ نروح نلبس حوايجي و نعدي عليك . منطولش .
صقر : داكوغ ارنوبة .
___________
وصلت للجاميعة سلكت الطاكسيور و هبطت . دخلت للكلية نتاعها ....توجهت ل لونفي لقاتهم برا يستناو ...تبسمت و عرفت بلي جات فالوقت ول خلينا نقولو الاستاذ الي مجاش فالوقت .
جا حارس الكلية طلب منه يدخلو علا خاطر الاستاذ راهو فالطريق .
دخلو كامل ...حكمت بلاصة بعيدة علا الناس اصلا كانو يشوفو معاها و يهدرو ....
فجأة الغاشي كامل سكت .......لبنات عينيهم ولاو قلوبة من المنظر الي يشوفو فيه .
شافت للجيهة الي يشوفو فيها ... بهتت ... راجل طول عرض ...اسمر عينيه كحل و شعرو كحل ولي كمل عليهم لحية خفيفة .
دخل بلا ميهدر شي ....وصل للمكتب و قال :
آدم : السلام عليكم . انا استاد الهندسة آدم . نتمنا نتعاونو و نعڨبو لعام هذا بخير ....
شاف معاهم لقاهم الكل باهتين فيه غيرها هي ... شافت معاه شوفة مفهمهاش .
هبط راسو وتبسم ... هدر بصوت غير مسموع .
( بدينا من درك فالأحاسيس الغير مفهومة هههه )
لبنات بالنسبة للي واجهو اشكال فالكرونيك ركزو برك فيها و ماشي مشكل كي متفهموش حاجة كلش راحة نبينو من الحلقات الجايين بالنسبة للحلقات الجايين مرايحاش ندير فيهم غموض و تخربيط بزاف راحا نركز في شخصيات القصة هكدا باش تفهمو مليح.
💕
آدم
