الحلقة 52 :
بعد موصلو للبحر ....هبطت تجري ....نحات صباطها وتجري .....تلعب كشغل طفلة صغيرة وهو يشوف فيها ويضحك ....
ادم : ارواحي وين راكي رايحة .
ايمان : شحال توحشتووو ...مرسي ادم .
ادم : ممم
بعد عليها ...ونحا تريكو تاعو ....بقات ساهية فيه ...ضحك علا جنب و راح يعوم .
تتبع فيه بعينيها ...وتضحك ....بدا يقرب للماء ....يلعب فيه برجلو ....لبنات الي كانو لتم ...كل وحدة تكحل عليه وعلا بدنو ...فاقت من سرحتها ...لقاتهم قاع يشوفو فيه وهو في نص لبحر ماخد راحتو ....تبدلت شوفاتها رجعو كلهم غش ..وغيرة ....حس بزعافها ..دور شافها كيفاش تخزر للبنات ...خرج من لبحر وراح عندها ..
.بدنو كلو سارد...شعرو يقطر ...شافتو هكيك مفاقتش بروحا ..لقات روحا هزت المنشفة و لواتو بيها ...قدم ليها وهدر بصوت تسمعو غير هي .
ادم : بركااي ...لبحر هاج من هيجتك .
فاقت علا روحها وبعدت عليه ....
ادم : من واش راكي زعفانة .
ايمان : مراكش تشوف فيهم كيفاش راهم يشوفو معاك .
ادم : هههه ومنبعد ؟؟؟
فافت مع روحها خدودها ولاو حمر ....
قدم ليها وقال .
ادم : غرتي ؟؟؟؟
ايمان : اه ..علاه نغير ..
زاد قدم ليها كتر ...حطت يدها علا صدرو ...شي ثانية ودزتو ..
ايمان : متقدمش .
ادم : عاودي واش درتي
ايمان : وشنو ؟؟؟
ادم : حطي يدك علا صدري
ايمان : اه ؟؟
ادم : ديري الي نقلك عليه
....شافت مع لبنات لقاتهم مزالو يشوفو معاه ...حطت يديها علا صدرو وقدمت ليه .....غمض عينيه .....فجأةً دزها بكل قوتو....طاحت طاح هو علا ركبتو .....حاط يديه علا راسو من الشي الي شافو ....عيط بكل قوتو ....من لوجاع الي يحس بيه .....هي تاني مكانتش قل منو ...يدها علا صدرها ...مخنوقة وتشوف معاه ...خلعها صوتو ...والي زاد خلعها كتر ...الموجة الي تشكلت وراه ...والناس تجري ....في لحظة حست او لمحت انو لبحر تقص علا زوج .....اما فجأةً رجع كلش لبلاصتو ....حتا وجاعها خف شافت معاه لقاتو حل عينيه ....ناضت قدمت ليه وقالت .
ايمان : آدم ؟؟؟راك مليح .
شاف معاها عينيه عيانين ...تبسم نص تبسيمة و قال ....شفت شي ...منيش عارف وشنو هو ...ول شكون هو ....اما حاس روحي شفتو من قبل .
ايمان : واش شفت ؟؟؟
ادم : راجل ....راجل وفي يدو حاجات .....
__________
كان ماشي ....حس بشي ...حس بحاجة ماش نوغمال ....حبس و دور وراه ...كان عارف انو كاين الي راه يعس فيه ....ملقا حتا شي ...رجع يكمل طريقو حبس ...من الشي الي يشوف فيه .....حل فمو وعينيه .....روحو كاملة ولات ترعش ..خرجت جملة من فمو .
مستر الكس : مستحيييييل ...ن نتاااا....ر. ..راك حي .
__________
بعد مارجعت للدار ....طلعت لبيتها وتخمم ...
اسيل : مممم زعما نكون غلطت كي هدرتلو ...اووه اسيل واش درتي الطفلة حكاتلك ونتي رحتي حكيتي لخوها ...اما كان يعرفو ...اما نعيطلو خير ..
كتبت رقمو ....وعيطتلو .
اسيل : الو نزيم .
نزيم : وي اسيل سامحيني ...خليتك وحدك.
اسيل : لالا معليش حبيت نسقسي الا راك بيان ...حسيتك ماش نوغمال .
نزيم : لالا راني مليح ..
حست بروحها مخنوووقة ...بدات تتنفس ...سمعها تخلع .
نزيم : اسيييل ؟؟؟؟اسيل راكي مليحة ..
اسيل : ن نورسيل ...نورسيل كاش مصرالها ...قفلت الخط وخرجت تجري .....عارفة وين راهي رايحة .
من جيهة وبعد ما كوپات عليه ...عيطولو .
نزيم : الو ؟....وشنووو....درك ؟ راك متأكد ..اوكي راني جاي ....هز مفاتحو بزربة وخرج من جيهة يخمم عليها وفالي قالتو ومن جيهة يخمم علا الجريمة الجديدة
___________
كانت تمشي ....حست بوجاااع .....شعووور قتلها ملداخل ....جامي حست بيه ....حاجة باردة بزاف ...الشر ...القوة ...كلها خارجة منو ....طاحت علا ركبتها ...حست بوشمها يحرق فيها ....بعد مدة لقات اسيل قدامها ......حتا هي كانت كيفها .....
اسيل : نورسيل ؟؟؟وشبيك ....
مكملتش كلامها لقات 2 رجالة جايين عندها ....عرفت انهم خطر عليها وعلا ختها ....هزو سيوفهم وراحو قاصدين نورسيل .......لغاشي الي لتم تخلعو .....ولاو هاربين .....
___________
وصل للجريمة ..لقاه مذبوحة ....نفس الوضعية تاع جريمة القرية الاولى ( خالتي حليمة ) ....جا يقدم اما سمع صوت ...كان بعيد شويا ...سمع صوت ناس تجري وتعيط ....هز روحو وراح يجري لمصدر الصوت ...
.
بعد ما هربو الناس الكل.....شافت فيهم قاصدينها ....حست بقوة في رجيلها قوة خلات الطريييق تولي صحرااا.....تشكلت وراها عاصفة رملية....ضلامت الدنيا ....كانت مجرد دقيقة ...دقيقة وبلعتهم الارض .....
.
بقا حال عينييه من الي يشوفو .....خرجت كلمة من فمو .
نزيم : اسيل!!!!!
ادم💕
