الحلقة 33 : .
ادم : معناها .... الملكة !!!!
.
نورسيل : هاااي ... معناها انا الملكة .
دورو كامل لجيهة الصوت ...لقاوها دخلت من الثاقة . ايمان تشوكات من كمية التشابه بينها و بين اسيل ..الاختلاف الوحيد فالشعر . وفي نفس الوقت حست انو لازم ترجع خطوة ...
شافت معاها نورسيل وتبسمت .
نورسيل : اه ...عيييت توقعت انو تكون ساهلة اني ندخل منا .
اسيل : علاهادي كنتي ديما تراقبي فالثاقة .
نورسيل : يما ختي واش تفهم ...ماشي ڨاع كي خوها .
ادم : كيفاش هاذ الشي يصراا ؟؟؟ .
نورسيل : قلت انا انو اسيل هي الملكة ؟؟؟ وحدك .
العكس راني قلت انو انا الملكة بطريقة غير مباشرة .
ادم : طريقة غير مباشرة ؟؟؟
نورسيل : ايه خبرتك انو اسيل تقدر تمشي ....راك علابالك انو الحراس برك الي محتفظين بقدرات خارقة ...
ادم : يعني ختي وبسبة انها حارسة رايحة ترجع تمشي .
نورسيل : ايه علا خاطر قوتها درك ضاعفت ..والوشم بالتحديد في رجلنا . الوغ سيداتي سادتي حصرو هكا تشو ...
راحت حدا اسيل و هدرت . .وهي تتبسم .
نورسيل : كنت ديما نسقسي روحي ..
اسيل : واش ؟
نورسيل : لوكان نقص شعري نجي شابة !!؟؟
اسيل : هههه ودرك .
نورسيل : اكيييد شابة هههه حضنتها .و هدرت ...اليوم تقدري تمشي و فالوقت هذا بالتحديد .
اسيل : يعني درك نقدر نمشي ؟؟؟
نورسيل : ايه نوضي .
جات راحا تنوض عاونتها ايمان ...كانت مسندا روحها نص علا ايمان نص علا نورسيل ...بالرغم من ايمان حبت تبعد عليهم اما ...حست ب برودة مع دفا خلاها تقدم ......شافت معاها نورسيل و هدرت .
نورسيل : راني حاسة روحي ضعيفة قدامك .
ايمان : على العكس انا الي راني حاسة روحي ضعيفة نقدم خطوة و نرجع خطوة .
نورسيل : هههه 2 ملكات في نفس لبلاصة .
ادم : و زوج حراس تاني ....شاف مع ختو وتبسم .
طلقوها ....وفجأةً بدات تمشي .....تمشي بكل مهارة والضحكة في فمها وصلت عند خوها ...حضنتو ..وهدرت .
اسيل : طول عمري نحلم نمشي ... .
ادم : حمدالله .
راحت عندها ايمان و حضنتها .
.
بعد مدة ...نطقت .
نورسيل : خيرتي لاغوب الحمرا !
اسيل : كيفاش ؟
نورسيل : كنت متوقعة تجيبي السودا .
اسيل : يعني كنتي تشوفي فينا ؟
نورسيل : راني ديما معاك ...اما درك تولي نتي الي تعسيني .
____________
عند نزيم حس انهم طولو ...راح عند مدام سلوى .
نزيم : معليش نطلع نشوفها .؟
م. سلوى اكيد بني . الدار دارك .
.
راح طلع فالدروج لقا قدامو بزاف بيبان ...هدر مع روحو ..وين راهم ... فجأةً تحل باب من لبيوت و خرجت منو و هي تمشي ...والضحكة في وجها .... شافها ...عينيه تحلو شاف مع رجليها رجع شاف مع وجها .
بعد معرفت انو حاير ضحكت ....و هدرت .
اسيل : نزيم .
فجأةً عينيه ولاو حمووورة من الغش ....رد بصوت يخوف .
نزيم : كامل كذابييين . رايحين تخلصوها غالية و نكشفكم ..وصلي الرسالة هادي لخوك ...راح و خلا الدموع في عينييها ....واش يقصد ؟؟؟؟ كانت حاسبتو راح يفرح كيشوفها تمشي ....كان باين انو حبها كيما حبتو ....وعلاش هاذ النظرة .
خرجت عندها لقاتها واقفة و تبكي . .
ايمان : اسيييل واشبيكي ؟؟؟ كاش ما يوجع فيك اهدري ؟؟؟؟
اسيل : هذا ....حطت يديها علا قلبها و كملت تهدر ...هذا يوجع .
نزيم😡اسيل😥
