الحلقة 14 :
صوتو ....صوتو مستحيل نغلط فيه نفس الصوت الي هدر معاي ...زعما نكون غالطة يا ربي . ماراهوش يشوف معاي اصلا ...ايمان بركاي ربي يخلق من الشبه اربعين حارتلك فالصوت ؟ ....اه قلبي شحال شباب .
آدم : يا طالبة . نتي ..اي راني نحكي معاك .
. دورت وجها ل وراها و رجعت شافت معاه .
ايمان : انا ؟؟؟؟
ادم : و علاش كاين واحد خلاف غايس هنا غيرك نتي ؟؟
. لانفي كامل يضحك ..حبسهم بصوتو .
ادم : كل واحد فيكم يحكم فمو ليه ... ول من درك نبدا نخرج . ونتي عاوديلي واش كنت نهدر .
ايمان : ااا اممم ايي
ادم : هزي حوايجك و برا .
ايمان : استاذ !
ادم : منعاودش هدرتي هزي حوايجك و برا .
. تعمرو الدموع في عينييها ...من المستحيل يكون هو . هزت روحها و جات خارجة ... كوصلت حدا المكتب تاعو قاللها بصوت غير مسموع ..يكفي انها هي سمعاتو .
آدم : ماشي قتلك ...متبكيش! نتوجع . افهمي .
. شافت معاه مشوكيا ....حالة فمها رجع هدر معاها بصوت مسموع .
ادم : خير ؟؟؟ مزلتي هنا ؟
. خرجت تجري ... واشبيه هاذا واش حاسب روحو ...هو ؟؟ متأكدة اني سمعتو ...شكونو و شكون انا ؟ علاش يتبع فيا كانت تهدر بصوت مسموع قاطعها بصوتو .
آدم : متحكيش بصوت مسموع يشوفوك يحسبوك مجنونة .
ايمان : ن نتا ؟؟؟ ماشي كنت لداخل ؟
ادم : عادي خرجت ...نسيتي بلي انا الاستاذ هنا ؟ وزيد منقدرش نخليك بعيدة . ابقاي حدا لونفي .
ايمان : نبقا بعيدة ؟؟ شكون نتا ؟
ادم : ماشي وقتو . المهم العميل الي يحقق فمقتل والديك . كان معانا فالكور . علا هادي خرجتك .
ايمان : نزيم ؟؟؟
هدر مع روحو " و تعرف اسمو "
ادم : هدر معاك ؟
ايمان : ايه و راهو شاك فيا زادا هههه .
ادم : متضحكيش
ايمان : متبكيش.....متضحكيش ...
. قدمت ليه و شافت مع عينيه و هدرت .
ايمان : شكون نتا و علاش راك تبع فيا وعلاش تتوجع ؟
ادم : نتبع فيك ؟
ايمان : ايه ...مع الاول مكنتش متأكدة من الصوت ...اما درك راني شميت ريحتك .
ادم : هههه ايه و راكي قريبة بزاف تاني .
. شافت فالمسافة الي خلاتها بينها و بينو ....حمارت دخلت في بعضها . بصوت مبحاح نطقت .
ايمان : ادخل . انا راني هنا . كتخرج نحكيو .
ادم : والله ؟؟ وليتي تمدي اوامر تاني ...مليح مليح .
.
قاعد فلونفي ...حس لپروف طول ...محبش يبين روحو ل ايمان كان حاب يهدر مع الاستاد آدم . . مع طول قرر يهز روحو ويخرج .
جا خارج حبستو وحدا : منظنش انو الاستاذ قاللنا اخرجوا .
بلا ميرد عليها . جبد بطاقتو و راها .. ..حلت فمها و سكتت . خرج طول بلا ميشوف ردود فعلهم . عرفو الي هو هنا باش يحقق معاها . بصح الي ميعرفوهش انو هو جا يحقق مع الاستاذ ....
. خرج لقاهم مع بعض ...ستغرب ..
نزيم : احم .
ادم دور لعندو و فنفس الوقت غطاها ... .
ادم : واش عميل ...عجبك الدرس ؟ راك حاب تبدل خدمتك ؟
نزيم : هههه ايه . راني حاب نحكي معاك .
ادم : تحكي معاي ؟؟ علا واش ؟
نزيم : على انفراد .
ادم دور ليها و شاف معاها هدر .
ادم : روحي ...بصح متبعديش بزاف .
ايمان بلا متحوس تفهم ردتلو .
ايمان : داكوغ .
__ بعد ماشافها راحت قعدت في كرسي قريبة منهم ...رتاح و دور لنزيم .
ادم : انعم بواش نفيدك ؟
نزيم : نشوف انو مكانش داعي اني نعرف بروحي من الاول عارفني . تعرفها ؟
ادم : طالبة عندي ؟ كاين شي .
نزيم : كاين شهود شافوك فقريتها . من نهار الاول الي بداو فيه الاحداث
ادم : هههه ومنبعد ؟؟؟ نظن انو القرية سياحية !
نزيم : المشكل ماشي هنا ...المشكل انو اختك تاني تواجدت تم .
___ ادم الزبل طلعلوا ...بلا ميحس حكمو من تريكو تاعو و جبدو ليه .
ادم : ختي ؟؟؟؟ ومن وين تعرف ختي نتا ؟
نزيم : منعرفهاش ...نتا الي راح تعرفني بيها .
ادم : هههه راك واثق من روحك بزاف .
نزيم : ايه ....واش دير بنت شابة ..وحدها في قرية بعيدة علا دارها ...و بالتحديد من اليوم الي صرات فيه الجريمة الاولى .
ادم : هذا سبب يخليك تشك فيها ؟؟؟ راك متأكد انك تخرجتي من امريكا ؟
نزيم : اه ....و عارف حياتي تاني .
------ دورت ليه شافتو حاكمو من لكول و يهدر ...عينيه ثلج ...كان فبالها انو نزيم جاي يحكي معاها ... من لداخل كانت ترعش ...في لحظة حست انو غطاها خاطر حس بيها . وقفتو قدامها وهي وراه خلاتها تحس براحة ...راحة عندها شحال محستش بيها .
ادم : مراحش نخليك تشوف ختي و راني متأكد انو ماش هي .
نزيم : الكاميرات شافتها .
ادم : مستحيل ...افهم ختي متمشيش ... من الي كان في عمرها عامين مخرجتش من الدار .
نزيم : متمشيش،؟؟؟؟ راك تقول انو ختك عندها اعاقة فرجليها ؟؟؟ بصح الكاميرات تبينها انو قاعدة تمشي .
ادم : علا هادي راني متاكد و نقلك انها خاطيها . بلاك وحدة تشبهلها .
نزيم : راح نزيد نحقق فالنقطة هادي ...اما لكان لقيتها ختك ...راح تخليني نهدر معاها .
ادم : اكيد .
____ شاف معاها رجع شاف معاه .
نزيم : بنت مش نوغمال .
ادم : شكون تقصد ؟
نزيم : والو .
-------،دور و راح جيهة سيارتو الي كانت قريبة للكلية ركب فيها و الف سؤال في راسو ...
. بعد ما راح ..شرلها بيدو تاع اقعدي تم .
دخل للمحاضرة ... كمل محاضرتو ...اما تخمامو كان مشتت من جيهة في ايمان و من جيهة في ختو اسيل الصغرونة تاع الدار ...الي مخلاو حتا طبيب الا وراحولو . وزيد مريضة اكتئاب من المستحيل تخرج من الدار .
ايمان💕
