اخبر عيناك الجميله ان تكف عبثاً بقلبي 🤍

16

صحى خالد وتبسم بسخريه متذكر برائتها لما كانت تتكلم معاه امس وقف وراح الحمام يتروش
طلع من الحمام واخذ بدلته الرسميه ونزل الصاله يدور على ابرار لقاها نايمه على الكنبه امام التلفزيون اخذ بطانيه وغطاها وتبسم بهدواء : ليكون تخاف تنام وحدها
قفل التلفزيون الي كانت تشاهد الرسوم المتحركه
وحط لها ملاحظه على الطاوله وطلع
وقف خالد امام بيته وناظر محمد الي مبين من شكله معصب : خير يارب من صباح الله معصب
محمد ناظره بحده : نايم بالعسل وينك من الصباح ترى عدى الصباح
تبسم خالد وبسخريه : لاتحسدني على العسل روح تزوج من مسكك
محمد بعصبيه : تحرك وانت ساكت جاسم منتظرنا بالكوفي
خالد رفع حاجب : تعال انت معي بسيارتي ما اضمنك تسوق بعصبيتك
قرب محمد وركب السياره معاه وتحرك خالد يكتم بسمته على عصبيت محمد
وقفوا في الكوفي وقعدو عند جاسم
خالد غمز لجاسم : اطلب ليمون يهدي اعصابنا شوي
محمد ناظره بحده : اقلب وجهك ياحيوان ترى للحين ماعصبت
خالد رفع حاجب : كل ذا وماعصبت
ضحك جاسم بخفه : عسى خير وش عندك محمد
محمد ناظر للبعيد وعض شفاته : ابوي خطب لي
ضحك خالد من قلب
التف له محمد بعصبيه : انت صاحي
جاسم يضحك : دامك معصب يعني وافقت
محمد ناظر جاسم مقهور : ليه هو سالني اصلاً مخليني مثل الحرمه متكلم وانتهاء الامر
خالد يحاول يرجع جاد : وشلون ترفض وابوك توه سلم من الجلطه
محمد ناظره بحده : وافقت تطمن
جاسم رفع حاجب : ومن سعيدة الحظ ذي
محمد كشر : تقصد قصيرة الحظ
ضحك خالد : انت شايفها من قبل او ماتعرف عنها شي
محمد اخذ العصير يطفي عصبيته : عهد بنت طلال
جاسم عقد حواجبه : ابو عهد معروف بطيبته وشهامته
محمد ميل فمه بسخريه : ايييه وبنته لسانها اطول منها تخيل
ضحك خالد من قلب : دعواتي استجابت
محمد : بركاتك ياشيخ
ضحك جاسم وخالد ومحمد يناظرهم مقهور
جاسم تبسم : متى شفتها يالخاين
محمد : عمي طلال وطويلة اللسان راحو لبوي وكنت مستقبلهم ولاجل يطلعونا ويتكلمون براحتهم خلوني عزمتها للكفتيريا
ضحك خالد : بالله كم عمرها محمد
محمد رفع حاجب وفاهم صديقه : اكبر من حرمتك البزر
خالد : بالله كم عمرها
محمد تنهد : 18
خالد رفع حاجب : عشر سنوات يالمجرم
محمد وسع عيونه بصدمه : الي يسمعك مايقول متزوج بزر اكبر منها بـ 12 سنه
ضحك جاسم من قلب على هواشهم : تمام اسمعوا
التف خالد ومحمد يناظرونه بتركيز
جاسم شقة بالسمه وجهه : امي وافقت اخطب ليلى
خالد ضحك : مبروووك والله شكلنا بنتزوج بنفس السنه
محمد ابتسم : مبروووك جاسم والله يتمم لك
جاسم : تتحداني يكون بين زواجي وزواجك شهر
محمد رفع راسه بغرور : اتحداك انا ، انا بتزوج بعد الشهر من خالد وانت حاول تكون بعدي بشهر
رفع جاسم حاجبه بصدمه : تو كنت معصب ومجبور وحالتك حاله وش قلب حالك
ضحك محمد : نشطت معاكم
خالد ماوقف الضحك : الله يعين بنت طلال
محمد رفع حاجب : تشكر الله كل يوم
جاسم ناظرهم متبسم بسعاده : شعور حلو نتزوج مره واحده يااالله تتم لنا على خير
خالد ناظره باهتمام : ومتى ناوي تروح تخطب
جاسم ناظرهم بحيره : والله مدري شلون ومتى وكيف لكن بحاول ارتب اموري واشوف اعمامي واخوالي
خالد هز راسه : تاكد بنكون معك باي وقت واي شي
ضحك جاسم : غصب عنكم بعد انتم اخواني
محمد دق صدره : خلاص بكره نروح نخطب لك
جاسم بصدمه : لا لا لا ويش الي بكره صاحي انت
خالد عقد حواجبه : ليه لا جاسم وش منتظر
محمد رفع حاجب : ليه من بيسبقه وياخذه ترها عمياء
ناظره خالد بحده واشر على جاسم الي تكلم بعتب : محمد مايهمني ان كانت تشوف او لا ليلى لي من انولدت ومابتنازل عنها لكن ماهو بذي السرعه بكره توها وصلت من السفر خلها لبعد يومين او ثلاثه
ناظر محمد لبعيد وكل الي يهمه هو سعادة صديقه واخوه لكن وشلون بتسعده عمياء
تنهد خالد وناظر جاسم : جاسم بروح اخذ ابرار والعصر نجيكم ان شاءالله نسلم على الوالده
تبسم جاسم : حياااكم تنور والله انت والمدام كلمتك ابوك
خالد بانزعاج : مدري عنه
جاسم : خالد لزوم تكلمه ان رضاء تشاركتو الفرحه وان زعل الله معاه على اساس يدري وين الله حطك
خالد هز راسه : نروح له بليل بعد مانطلع من بيتك
تبسم جاسم بهدواء وناظر محمد الي مبين مهموم : عهد موافقه
محمد ناظره وتبسم مستحيل ياخذون خاطرهم من بعض وهذا الي مخليهم مستمرين بالمخوه : مدري باين ابوي وعمي طلال متفقين وافقت او لا مثلها مثلي
رن جوال محمد وتنهد من المتصل : عمره طويل ابوي
تبسم جاسم وخالد وفتح محمد التلفون : هلا يبه
ابو بندر بسعاده : محمد البشاره ياولدي
محمد ميل فمه ببسمه : عسى قالو تطلع اليوم من المشفى
ضحك ابو بندر : البشاره اكبر من ذي خطبتك بكره باذن الله اطلع من المشفى ونروح على طول نخطب
فها محمد بصدمه : بكره
ابو بندر : اييه تعال الحين ابيك تجهز كل الي بقوله لك والاهل بطريقهم بعد جايين نبشرهم انا وانت
تدارك محمد صدمته وماحب يكسر فرحة ابوه : تامر يبه
قفل محمد التلفون وناظرهم وابتسم بكسره : بكره الخطبه تجهزوا
ناظروه بصدمه من السرعه
خالد : باين عمي حمد وطلال متفقين من قبل على كل شي
محمد هز راسه : ايييه والحين شلون لو طلعت هي بعد مجبره ومحد يبي الثاني
جاسم رفع حواجبه بواقعيه : حاولوا تتقبلو بعض باي طريقه
وقف محمد وابتسم بكسرة نفس : عن اذنكم الحين وبكره نتواصل متى نروح الخطبه
خالد تبسم : ماعليك الله يسهل وبتلاقينا الاولين عند بابك
جاسم يحاول يفرفشه : فاولت عليا بخطب بكره وجاك الفال
محمد ضحك بخفه : الله ياخذه من فال كنا مرتاحين بالعزوبيه
راح محمد يحاول قدر الامكان مايبين كسرة النفس الي سواها ابوه ، اجل يبه تسويني مثل الحريم مثلي مثل عهد تجبرني على شي مابيه وليتك حتى كلمتني قبل تعطيه كلمه ليتك يبه ماكسرة نفسي
وقف وخالد يناظر محمد من وراه : الله يعين محمد
جاسم تنهد : بيتخطى ان شاء الله
خالد هز راسه : بروح اخذ ابرار نتسوق وبعدها نجيكم
جاسم : حياااكم وانا برد البيت ابشر امي ترى للحين ماكلمتها عن زواجك
ضحك خالد : اجل لاتقول لها اني بجيها مع حرمتي خلها مفاجئه
جاسم تبسم : بقولها انك جاي وحدك
خالد : ايييه اشوفك بعدين
جاسم : الله معك
راح خالد لسيارته متمني لو انه فعلاً مقطوع من شجره الشكله امه كانت وحيده ابوها وامها وابوه مثلها يعني ماله احد لاعم ولا خال ولا ام وحتى ابوه ماهو له منشغل بحرمته الي منسيته خالد هي وعيالها
ناظر خالد للسياره الثمينه : وصلت ياخالد لكل الي تبيه دون حنان امي وين بالاقيه
تنهد خالد وانطلق بسيارته متجه لابرار
،
قعد عمار قدام لمى يتامل فيها بصمت
لمى تبسمت : عمااار ساعه من صحيتني وانت ساكت وش عندك تناظرني ومصحيني من بدري ترى ما وراي شي
ضحك عمار بحب : عندي لك بشاره
لمى تبسمت بحماس : قوول وش هي
عمار ميل فمه بخوف من الرد : فيه حد خطبك
ذبلت ملامح لمى وبهدواء : ماودي
عمار برجاء : على الاقل اسالي من هو مايصير كذا
لمى بحزن : ماودي ياعمار لاتجبرني
تنهد عمار وهز راسه : بتندمييين تراه مايتعوض
تبسمت لمى بهدواء : دامه مايتعوض الف بنت تتمناه يروح يشوف غيري
عمار ضحك : اجل لاتغيري رايك
وقف عمار : اجل تامري بشي بروح الشركه
لمى برقه : مايامر عليك ظالم
طلع عمار يفكر وشلون همدان بيرضى برفضها مستحيل يتقبل لين يقنعها همدان اكثر شخص عنيد وافضل شخص يقدر يقنعها
،
وقفت عهد بصدمه : وش بكره مستحيييل
ابو عهد ناظرها بهدواء : عهد انا ادرى بمصلحتك
عهد ببحة حزن : لكن يبه اتركني فتره اتقبل الموضوع ماهو كذا بكره وش ذي السرعه
ام عهد بحنيه : عهد يمه بكره او بعد سنه بياخذك محمد لزوم تتقبلينه وغير كذا بتتعرفون على بعض اكثر
عهد ناظرتهم بحزن وانكسار : الي تشوفونه
قرب ابو عهد منها وباس جبينها : بتعرفين اني دورت لك افضل رجال بتعرفين مع الايام
هزت عهد راسها بحزن وباست كف ابوها وراحت مع الدرج متجهه لغرفتها
ليييتكم تفهمون وشلوون اتعايش مع واحد مغرور وعيونه خلف الحريم وشلووون اتقبل الطويل ذاك
ااااه يبه ليتك تعيد حساباتك ترى ماهو افضل رجال
نزلت دمعه وحيده وامتدت على سريرها تضم الدب المحشو بوحده تجتاح صدرها
ام عهد ناظرت زوجها بعتب : قلت لك لاتستعجل
ابو عهد عقد حواجبه بعصبيه : منييره ترى عهد صارت حرمه وما بنبقى لها وغير كذا ترى زواجها متى ماقرر حمد بقول تم
ام عهد بصدمه : طلااال توها تو عمرها 18 سنه وش الي زواجهاااا
ابو عهد رفع حاجب : ترى انتي ماتحبي عهد كثري وانتي اكثر حد يدري بحبي لعهد وانا ادري ان محمد رجاال بيصونها ويداريها ولاتزيدي بالهرج
وقف ابو عهد وطلع من البيت
والله ياعهد لو تدري وش كثر حبي لك لكن الحرمه مالها غير زوجها ومحمد بيصونها ويحطها بعيونه اااه ياعهد