اخبر عيناك الجميله ان تكف عبثاً بقلبي 🤍

29

واقفه تناظر النجوم بظلام الليل والريح تتخللها بهدواء
همسة عهد بخفه : ليتني نجمه
محمد ابتسم من خلفها ورفع حاجب : الناس تتمنى القمر ترى
التفت عهد وناظرته بجديه واشرت له للكراسي القريبه : تفضل حياك
قعد محمد بشموخ وناظرها بحده : خير وش تبين
عهد قعدت قدامه وصبت له شاي وبهدواء : باخر مره انت قلت ماراح تلمسني يكون زواج على ورق لين نلاقي حل
محمد ميل فمه ورفع حاجب : اي وبعدين
عهد رفعت راسها تناظر النجوم : ابيك تحلف بكتاب الله على انه يكون بيننا زواج ورق وماتلمسني ابد
ضحك محمد بخفه : اذا ماتصدقيني مو شغلي
تنهدت عهد وغمضت عيونه بحده لثواني ومن ثم التفت تناظره بسخريه : مستحيل اثق براعي بنات
محمد ابتسم بهدواء : زين حلي مشكلتك
عهد بعصبيه : وكانها مشكلتي وحدي وانت
محمد ذاق الشاي وميل راسه : ماعندي مشكله انا بتزوج زوجه صالحه تحترم زوجها وتنظف وتطبخ وتعطي زوجها حقوقه كااامله
عهد وقفت بصدمه : كذااااب تو المره الي فاتت قلت انك مجبور ومابتلمسني
هز محمد اكتافه بعدم مبالاه : مافيه رجال وحرمه يجتمعون ببيت واحد ومايصير شي في النهايه انا لي رغبات وعندي زوجه
رفعت عهد كوب الماء ورشته على محمد : خسسسيس وش اتوقع من راعي بنات الا
وقف محمد بلحضه وماتركها تنهي كلامها شدها وحملها بين يديه لقرب النافوره وغرقها وابتلت كلها
طلعت عهد تشهق تدور ذرات الهواء وتناظره بخوف وعصبيه : مجنوووون صاحي انت
محمد ضحك : قولي شكرا او كنت بطلع لعمي طلال قدام اخواني وانا مبتل وبعدها وش تتوقعين ردت فعله
عهد بجنون : كنت بفضحك لابوي واقول له انك راعي بنات يالحيوان
رفع محمد حاجب يتمالك اعصابه وبحده : مره ثانيه بعطيك كف وغير كذا قولي لعمي طلال الي تبيه وش دليلك اصلاً
طلعت عهد من النافوره ترتجف من البرد وتناظره بحده وماتدري وش تقول : والله يامحمد ان تزوجتني غير اني اجعل ايامك سود
محمد ضحك بسخريه على منظرها : حاولي
راحت عهد بعصبيه تضرب الارض برجولها وتدعي على محمد وماتسكت
اما محمد يناظرها ويعض اسنانه بقوووه متمني لو انه عطاها كف من البدايه
تنهد محمد وقرب من النافوره وبلل حاله وراح للمجلس
التف خالد وضحك وماقدر يسكت ويزن يحاول بخالد يسكت اما جاسم منصدم ويشتت نظره بين طلال ومحمد
ابو عهد وقف بقلق : عسى خير ياولدي
ابتسم محمد : خير ياعمي طاحت عهد داخل النافوره وطلعتها وتبللت
وقف يزن واستاذن واخذ خالد يسحبه لبرى البيت
ضحك جاسم بخفه على الكذبه ووقف : اجل ياعمي نستاذنك قبل يستبرد محمد
ابو عهد والي فاهم الكذبه ومستحي : الله معاكم ياعيالي
طلع جاسم ومحمد وخالد يضحك على محمد من قلب ويزن معصب من خالد
محمد ناظر خالد بحده : منت صاحي تضحك كذا قدام الرجال
طلع محمد السياره من البرد وطلع يزن وحرك السياره وراحوا
ناظر جاسم خالد وضحك معاه : تتوقع من غرق الثاني
خالد ويمسح دموعه : اكيد عهد غرقته الاوله
ضحك جاسم وبح صوته : انا اشهد انها بعشره رجاجيل
وضحكوا الاثنين لين انحنوا
،
بسيارة يزن
محمد مشغل المكيف على الحراره وقاعد بعصبيه
يزن بطفش : من جدك انت وياها اخرتكم تبللون بعض
محمد بحده : الود ودي اعطيها كف يربيها من جديد لكن الصبر لين تنور بيتي واربيها زين
يزن هز راسه بحزن ماوده محمد يعاني بزواجه يكفي اهله معنينه ماهو ناقص زوجته : تدري ليه تبي تكلمك اليوم
محمد وجن جنونه لما تذكر كلامها : الزززفته تخيل تقول لي احلف بالمصحف ما المسها هذا وانا معطيها وعد لكن تقول ماتوثق براعي بنات انااااا تقول لي كذا
يزن عقد حواجبه : الا صحيح اهي ليه تقول لك كذا
محمد بحده : لما نزلنا الكفتيريا حقت المشفى كان فيه بنت تاشر لي وتتبسم
ابتسم يزن : وطبعاً انا ترد الجميل ماتتركه ابتسمت لها بعد قدام عهد
هز محمد كتفه : ايه يعني اذا ابتسمت اصير راعي بنات
يزن ضحك بخفه : بالنسبه لها ايه
محمد بعصبيه : والله اني اصير راعي بقره لعيونها لكن تصبر لين نتزوج
يزن بجديه : ترى بعد بكره الملكه
محمد ناظره بصدمه : وشووو
يزن رفع حواجبه : والعرس بعد شهر جهز حالك طلال متكلم مع عمي حمد ومتفقين على كل شي
محمد بصدمه : وشلون ما ادري بشي
يزن بفضول : مدري وش نية عمي حمد لكن طلال متكلم انه كل شي تحدد
صمت محمد بصدمه ماغير رموشه تتحرك
وقف يزن السياره وتنهد : تعال ندخل البيت وتغير ثيابك وبعدها يصير خير
نزل يزن ماخذ معاه محمد للبيت
،
عند جاسم والي وقف السياره عند فلته
نزل خالد مبتسم : اتوقع ان محمد فوق العصبيه بينصدم بقوه من خبر ملكته
جاسم رفع يدينه باستسلام : مالومه والله حتى الحرمه عندها خبر وطالبه الرجال تتكلم معاه واهو ياغافل لك الله
خالد تنهد : الله يعين محمد ويزن بيقدر يهديه
جاسم ميل فمه : الود ودي اروح له لكن الوالده بتكون وحدها وماوصيت عليها احد من بدري
خالد هز راسه : والبزر مجننتني بالرسايل
تبسم جاسم : قول زوجتك
رفع خالد حاجب بحده : فكني منك يكفيني واحد
طلعت ابرار وقربت من خالد بسعاده ومبتسمه : بنرجع البيت
ناظرها خالد بحده والتفت ابرار تناظر جاسم واستحت : اخبارك اخوي جاسم
جاسم منزل راسه ومبتسم : بخير انا استاذنكم بشوف الوالده
راح جاسم لداخل واخذ محمد السياره واتجهوا للبيت خالد بحده : ليه ماتقعدين عند الغاليه
ابرار بصدمه : من جدك خالد حاطني هناك اربعه ايام بدون ثيابي واغراضي والله استحيت واحس حالي خايسه
تنهد خالد لما استوعب الموضوع : وليه ماتتكلمين من بدري كنت اخذتك تجمعين لك اغراض وارجعك لهناك
ابرار بزعل : استحيت اتامر عليك وانت مشغول وبعدها كنت اراسلك وترد عليا بجفى وماعاد اقدر اتكلم
هز خالد راسه وعض شفته بندم انه ظلمها
ابرار بصوت خافت حزين : اعتقدت انك سعيد قدرت تتخلص مني وماعاد دورت
خالد بندم : ماني متعود اسال عن حد تو ماتعودت عليك
ناظرت ابرار للبعيد بحزن ونزلت دمعتها بكلام خالد وشكل وجهه الحاد الي مايبين غير الي اعتقدت انه قسى
،
دخل جاسم الصاله وقرب من امه بندم متذكر انه انجن وعصب عليها قعد عند ارجولها ورفع راسه يناظرها وبحزن : زعلتك يمه
ناظرته ام جاسم بحزن ولمعته عيونها وبصوت باكي : انا الي زعلتك ياولدي قوم اقعد قربي
رفض جاسم يقوم ومسك رجولها وحطهم بحضنه : عصبي يمه عليا واضربيني بعد بس دمعتك لا اشوفها بعيونك ارجاك
نزلت دموع ام جاسم وغطت وجهها بيدينها
حس جاسم بوجع قلبه وقبل رجلها : افداك يمه لاتبكي جعلي اموت ولاتنزل دموعك
ضمته ام جاسم بضعف ومن بين شهقاتها : فال الله ولا فالك بعيد عنك الموت ياولدي
ضمها جاسم اكثر ونزلت دموعه ومتمني لو انه صار له حادث ولا عصب على امه ومتندم حيييل
،
بصباح اليوم الجديد والي كانت احداثه هاديه جداً
بالنسبه للمى قعدت تصلي استخاره وراحت مع عمار وامهم المحكمه ومنتظرين حكم المحكة يرجع لهم كل اموالهم الي اخذها عمها
،
عند عهد نامت بعد ما التمست الجنون وصحيت بهدواء تجهز للملكه وحالفه تكون حياتها مع محمد جحيم لين ينفصلون
،
عند ابرار قعدت تنظف البيت من الغبار وتجهز اشوية ثياب اذا وداها خالد لام جاسم تكون جاهزه وردت تناظر صورة امه وتتمنى لو كان عندها لامها صوره على الاقل بعد ماتاملت صورة ام خالد دخلت الحمام تاخذ دش لاجل تنتعش ورمت حالها على سرير خالد تستنشق ريحته وراحت بالنوم ناسيه حالها انها باقيه بثوب الحمام
،
عند جاسم صحى وفطر مع امه بحب وانطلق للمحكمه وقابل خالد واشوي وجونه لمى وعمار وامهم ومرت جلسة المحكمه بثقة خالد ومنتظرين حكم المحكمه وارجاع جميع املاك صالح لعائلته
وبعدها راحو جاسم وخالد للمول منتظرين محمد ويزن
،
عند محمد الي صحى بكسل والضيقه ماليه صدره حاول معاه يزن الا انه ماقدر يغير جوه اخذه بالاجبار وراح يلاقي خالد وجاسم اكيد يقدرون يغيرون جوه
تنهد يزن لما حس ان بينهم فجوه الي عاشوها بدونه ومايقدر يسكر ذي الفجوه ببساطه
،
نرجع للمى والي واقفه بغرفتها وعمار وامها قربها
ام عمار : والله جاسم كفو وماقصر معانا
لمى ميلت فمها ببسمه محرجه : وش رايك يمه
عمار ناظر للمى بعتب : من معاملت جاسم يبين ان ماله نيه يجبرك حتى ماقرب منك واحترم ذا الشي لو ان ودك همدان تاكدي وانا اضمن لك بعد ان جاسم مابيعارض
ام عمار بحب : هذي حياتك يمه فكري بالمستقبل والي بتعيشين معاه
لمى بتردد : يمه بنروح بكره الحفله
عمار ابتسم بحب : ايه عازمينا عيب نردهم لزوم نروح
نزلت لمى راسها تخفي بسمتها والكل ملاحظ
،
عند عهد اختارت الفستان الاسود والاكسسوارات السوداء مع الحذاء السوداء
تاملتهم بعيونها السود وابتسمت بسخريه
اتصلت وتاكدت من الصالون ونبهت على الحرمه تجيها بكره بدري لجل تتجهز قبل يجونهم الحريم
راحت عهد تتاكد من الشغالات وتجهيزات الفلة للحفله واتصلت بالمطعم تتاكد من حجز العشاء وتاكد عليه
تحت صدمة ابو وعهد واستغراب ام عهد الي يناظرون بنتهم ومو مستوعبين الي يصير على حد علمهم انها منجبره لكن الي يصير الحين ياكد لهم العكس
ابو عهد بغرابه : وش عندها عهد اليوم
ام عهد ابتسمت : عهد حتى لو ماتبي بتكابر قدام الضيوف الي بيجونا بكره
هز ابو عهد راسه بحب : تشبه ابوها ماتطيح حالها قدام احد مهما صار
ضحكة ام عهد بهدواء : الله يستر من الي بعده
ابو عهد تبسم بثقه : انا واثق من محمد
،
في المول قاعدين بهدواء يشربون القهوه المره ويناظرون محمد تحت تعجب يزن من تصرفهم
محمد بطفش : عسى كملت القهوه
خالد هز راسه : لزوم تشرب قهوتك كلها
محمد رفع حاجب : يكفي حياتي مره ماناقصني قهوه مره
جاسم تنهد بقلة حيله : زين اشربها بالاول
محمد غمض عيونه بصبر : وبعد ما اشربها
تبسم خالد : بنوصل لحل
محمد بعصبيه : وش بيفرق اذا كملتها او لا
جاسم حط يده على كتف محمد : مثل مشكلتك وش بيفرق اذا عصبة او تضايقت بتبقى المشكله موجوده
خالد حط يده على كتف محمد الثاني : وبالنسبه لك انت رجال ماهي مشكله المشكله لها الي بتبقى بسجنك
شتت محمد عيونه بضيق يفكر بالي يقولونه
يزن ابتسم عليهم ادرك ان عندهم طرقهم الخاصه مع بعضهم حس يزن انه غريب بينهم مو اخوهم ابد
محمد ابتسم بسخريه : اشتريت البيت ذاك لاجل ارتاح فيه اهرب من الكل واختبي فيه انسى حالي وانسى كل الهموم اعيش فيه عالم ثاني وشلون برتاح والهم انزرع ببيت بعد
جاسم بجديه : محمد ماهو معقول ان عهد تتجهز للملكه وانت هنا حزين اهو بيتك بتعيش فيه بكيفك مو بكيفها
خالد عقد حواجبه بحده : تطول لسانها بتتعاقب تعصب بتتعاقب
ابتسم خالد بعدها وغمز لمحمد : اعتبرها بنتك الي فقدتها من سنين وبتعيد تربيتها
ابتسم محمد وناظر لخالد بطرف عينه : البزر زوجتك ترى
يزن ضحك : دامك ابتسمت خلاص انحلت والحين نتسوق لبكره ونتسوق لبنت محمد المفقوده
ضحك محمد : بتسوق لاجل عيونها وباخذ لها احلا الهدايا
ضحك خالد من قلب : ونشتري للبزر حقتي فستان
هز جاسم راسه مبتسم متمني انه يشتري اهو بعد للمى فستان
،
رجع خالد البيت يتلفت وعيونه تدور على ابرار تنهد ثم ابتسم بخفه وهمس : اكيد نايمه مابتنتظرني للحين
ناظر للاغراض الي بيديه حطهم في الصاله وراح غرفته دخلها في الظلام ونزع عنه القميص ورمى حاله على طرف السرير بتعب : الله يعينك يامحمد ماتدري من وين تجيك ولوين تروح
غمض خالد عيونه بارهاق من تفكيره وقلقه على محمد وتعبه من لفت المول الي ماتركو محل ماطبوه