فوط+ كومنتار
طريق كاملة والسكوت مخيم في الطونبيل ... كان يخزرلها من التروفيزور والندم يوكل فيه ... هو بنيتو قاعد يتمسخر وهي خذاتها بجد وتفزعت شاف في ملامحها ... رغم الحالة اللي كانت فيها الا انو هاذ الشي ممنعش انو زينها يظهر ركز في عينيها كانوا عالم اوخر
الحاجة سلطانة بحدة : اخزررر قداامك
فاق بروحو وركز مع الطريق شافت فيها كانت حاطة راسها ع الكارو تخزر لبرا سرحت بيها الذكريات لبعيد كانت تتفكر في باباها الللي كانت ملازمتو في كل بلاصة يروح عليها .. حتى انها كانت صغيرة كانت تروح تصلي معاه في الجامع مع الرجال كل الاوقات ... كانت ملازماتو في مجالس القرآنية وهزت منو كللشي ... كان هو القدوة ليها حتان داتو الموت منها وحرمتو منها وهي مزالت صغيرة تحتاجو وتحتاج نصائحو سرحت بيها ذاكرتها لليوم من الايام .. شهد على فرح وحزن اليوم اللي فرح فيه بابها بشهادتها الاخروية قبل الدنيوية
Flash back
قمر : بااااابااااا باااابا بااابا
جرات ليه بفرحة كبيرة بطقم الصلاة تاعها دخلت لذيك المزرعة فرحانة المنورة بحال الجنة .. ارض واااسعة فيها من خيرات ربي دار ليها بعد ماسمع صوتها والفاس كان فيدو يحفر باش يزرع نكزت عليه تعنكشت في ظهرو شدها بقوة ودورها ليه ... دورت رجليها على كرشو
شعيب : اييييه وش سر الفرحة هاذي يا ڨمووورة
قمر : يااا بابا الاسبوع الجاي باش يديرو مسابقة وباش انا نختم
باسها من راسها بمعزة : ماشاء الله يابنتي نشاله ديما تخليلي راسي مرفوووع وفخر بيك ذاك يوم الفرح اللي مكانش كيفو نستناه بفارغ الصبر يااارووحي
قمر : بابا بقالي كان ربع واحد تنجم تقرا معايا باش نحفظو !!
شدها من نيفها وهو يضحك
شعيب : اكييد ياروح باباها شحال عندي من قمر انا ... هيا باش نوريلك الكادو متاعك تاع الختمة منقدرش نأجلو
قمر : يااااااااي هيااااا
Back
قاطع ذكرياتها يد سلطانة وهي تتحط على يدها عدلت روحها ومسحت دمعتها اللي طاحت
سلطانة : لباس !!
همهمتلها شاف فيها جواد من التروفيزور للمرة الثانية ... يوصل الكلام لحلقو باش يعتذر ويطلب منها السماح ويتراجع اخر دقيقة
رجعت تكمشت في بلاصتها ضامة ذرعيها لصدرها تحاول تدفي روحها والظاهر باش تجيها الحمى كان راح ينحي لافاست تاعو سبقتو سلطانة اللي نحات الشال متعاها وغطاتها بيها تبسمت قمر معاها شافت في جواد بقحرة تتوعدلو ..
أنت تقرأ
ليل بلا قمر ❤️باللهجة الجزائرية❤️
Mystery / Thrillerقصتنا هذه المرة تدور في عشيرة آل حمدان ... اين يوجد فيها كل الوسوم .. الخوف .. ولظلم .. والفرح والحزن .. التفكك .. التوحد .... مجرد لقاء صادف وعابر ... يتحول الى اقامة ابدية لديهم .. لتدخل تلك الفتاة قلوبهم ... لتدون في سجلهم العروشي .. برضا الب...
