فوط + كومنتار 😒
دار ادهم يدو ع الباب شاف يد سبقتلو منعتو .. شافت هي فيه بصدمة مكانتش متوقعتها منو تبسمت سلطانة بفخر اما قمر برنوسها كان حاجب عليها الرؤية شاف فيه ادهم باستغراب
مالك : مايجيش تخرج من تحت جناحك يا ولد حمداني ... المرا طول عمرها تبقى تحت جناحها راجلها بعد ما تخرج من جناح بوها ... وانا راح نجسد دور الاب ليها ونعيش اللحظة اللي حرمتني منها
هبطت احلام راسها عرفت روحها هي المقصودة مكانش غيرها شاف فيه ادهم عاقد حواجبو .... اما قمر كي سمعت الهدرة جات باش تطلع برنوسها شداتو سلطانة عليها مانعتها ... ميش حابة تتخلط اكثر ما هي مخلطة تعرف قمر طايرة مع الطيور وميش راح تتهنى حتان تبربش في الماضي
ادهم : شكونك !!!!! شفتك ذاك النهار في المجللس !!
مالك : انا مالك خو جدك وعم باباك وجد ق........ ميش وقتو ضكا وانا اولى بيها تخرج من تحت جناحي
غمضتلو سلطانة عينيها برضى طمنت ادهم ... شاف فيه بشك ... العيون الزروقة هاذو عملة نادرة شايفهم عند قمر موش شايفهم في حتى بلاصة خلاف خزرتو ميش مستراحلها زير على كتفها بلا ما يحس قرستو قرسة مسمومة من يدو كتمها في سرو ... خرجت قمر تحت جناح جدها مالك وبو امها اللي متعرف عليه شي احلام دموعها يطيحو بصمت من فرط المشاعر اللي تحس بيهم هي تحرمت من هاذ اللحظة وماعاشتهاش سوا من اب ولا جد ولا اخا ولا شي .....
مع خرجت قمر من لاصال تضرب البارود قاوي بلا حبسة تخطفت لأنو طرطق فوق راسها زير عليها ادهم يهدي فيها كان الهول والغاشي برا مكانش كيفو الزرنة ... الفرسان ... الخيول الموطوات مسركلين الطومبيلات من كل الانواع هزها صحابو يعيطو ويغنيو ويضحكو " ادهم تاعنا زوج وتهانا اي مامايا " قلبو الحالة بالفليميجان والفلومبو عطاوه زوج شد هو واحد ولوخر مدو لقمر والكاميرا ماب تصور والنساوين يزغرتو ركبها من القدام بحكم هو اللي يسوق متعافر مع روبتها وركب هو في الكوتي تاعو وديمارا هو في مقدمة الكورتاج شاف فيها ساكتة على غير العادة تبسم حاب يستفزها
ادهم : تقول لابسة خيمة يا دين الله تاع هاجر ارحم متعرفيش تخيري مره
طلعت البرنوس من على وجهها خلات غار لافوال على وجهها
قمر : كيما نتا جاتك الكوستيمة تعيف كتانها تقولو مخدوم بالخيشة يشوفك مصمم الازياء يعتزل فسدتلو الاطلالة وروحتلو هيبة الكوستيم
ادهم : مهدرت والو .... هدرت كلمة رديتي عشرة
قمر : اممم مرة اخرى وش تهدر معايا تعرف اللي فمي متبري مني
ادهم : ضك نشوفوها تحسبلك راح نخليك على هواك فمك زافر ونخليك ترجعيلي ا الهدرة !! نعاودلك التربية من دارة وجديد
أنت تقرأ
ليل بلا قمر ❤️باللهجة الجزائرية❤️
Mystery / Thrillerقصتنا هذه المرة تدور في عشيرة آل حمدان ... اين يوجد فيها كل الوسوم .. الخوف .. ولظلم .. والفرح والحزن .. التفكك .. التوحد .... مجرد لقاء صادف وعابر ... يتحول الى اقامة ابدية لديهم .. لتدخل تلك الفتاة قلوبهم ... لتدون في سجلهم العروشي .. برضا الب...
