فوط + كومنتار
تململت في بلاصتها حاسة بدفا موش طبيعي ميش الدفا اللي والفاتو عقدت حواجبها باستغراب .. هاذا ماشي فراشها هذا مريح لدرجة كبييرة حلت عينيها وخزرت لسسقف ... حتى السقف ميش تاع دارهم المثقوب والمبلل ناضت بجذعها العلوي لقات روحها ميش لابسة قشها حلت عينيها بصدمة وسترت روحها باللحاف ... هي وين راهي ..وش جابها هنا .. كيفاه حتان وصلت هنا ... علاه ميش متفكرة ولا شي طاحت عينها على قشها المنشور فوق كرسي كان مغسول شافت بجنبها تدور في الغرفة بعينيها تلمح كشما تلقى حاجة تدل على بلاصتها طاحت عينها على امها
اللي راقدة نص رقدة على فوتاي مكسرة مره غمضت عينها بتعب راسها رايح يطرشق ناضت من بلاصتها حفيانة لمت روحها فاللحاف وراحت لبست قشها اولا ديراكت لعند أمها عدلتها في بلاصتها وغطاتها بنفس الغطا اللي كانت متغطية بيه
قعدت في الارض شادتلها يدها بقووة والدموع في عينيها
قمر : سامحيني يا أمي تعبتك بزاااف سامحيني يا غالية تهدت صحتك علاجالي
باستها من راسها ومسحت على خدها بحنية يديها
قمر : راكي تعبانة بزااف يا أمي ربي يجازيك على صبرك بصح وعد مني والله نخرجك من هاذ العيشة المرة
باستها من جبينها والدموع يطيحو بلا حبسة
قمر : يا أمي قلبي محروق بزاااف على ليل وين نلقاه ضك ولا وين باش نلوج عليه ... هاذاك خويا وصاحبي الغالي هدية الغالي ... هدية بابا ضاعت مني يا أمي كيفاش نقدر ضك نعيش بلا بيه هااا بيتنا تهد كلشي ضاع
بكات بردت قلبها مسحت دموعها ومنعت شهقاتها يخرجو ميش حابتها تفيق .. التعب ظااهر على وجهها ضحتها منين رايحة تتراجع اكثر قسوة الزمان خذات من زينها وجمالها بزاااف
ناضت من بلاصتها لبست باسكاتها اللي كانت نشفت شافت في أمها نظرة اخيرة وخرجت لازمها تحوس على ليل
شافت في البلاصة اللي فيها مبهورة كلشي متحوف على حقو ... في قصر ... كأنها في حلم . محتاجتش تفكير كبيير باش تعرف بلي هي في قصر الاغا ضاق بيها صدرها ثم ... زربت خرجت بسرعة ماشافها حد لحقت للبوابة حبسوها الحراس
" وين رايحة يا انسة ... وشكون نتي !! "
قمر : خارجة وين رايحة نروح ... انا بنت احلام
هزولها راسهم بايه وفتحولها الباب ... مدام هي بنت الخدامة .. هاذي حاجة متعنيهمش ماهمش ملزومين يحرسوها ولا يتابعوها .. بصح نظراتهم مغفلتش عليها قمر تقززت منها
قمر : رخيييس متحشمش اني قد بنت بنتك ياوحد الشارف الشايب بقاتلك عطسة وتموت مزلت تستصغر وتشوف في حرمة الرجال
قحرتلهم قحرة حادة ومشات مكملة طريقها معلابالهاش حتى وين ماشية ... اول بلاصة جات في بالها مزرعة السي حسان .. مترددتش لحظة تروح ليها دخلت منين موالفة تدخل متأكدة ميش رايح يخليها بقات تحوس الداخل اسطبل باسطبل مكانش غلبوها دموعها
أنت تقرأ
ليل بلا قمر ❤️باللهجة الجزائرية❤️
Mystery / Thrillerقصتنا هذه المرة تدور في عشيرة آل حمدان ... اين يوجد فيها كل الوسوم .. الخوف .. ولظلم .. والفرح والحزن .. التفكك .. التوحد .... مجرد لقاء صادف وعابر ... يتحول الى اقامة ابدية لديهم .. لتدخل تلك الفتاة قلوبهم ... لتدون في سجلهم العروشي .. برضا الب...
