ليل بلا قمر ❤️باللهجة الجزائرية❤️

البارت 28

فوط + كومنتار

دخلت للفاكيلتي تاعها وراحت للكلاستها ... مشات حكمت بلاصة في اخر الصف  و طلقت روحها ع الكرسي تتفرج في وجوه جديدة ... فوڨيرات اول مرة تشوفهم ... حاسة بالملل ميش عاجبينها العباد .... شافت في طفلة تشورلها من بعيد ضيقت عينها ... مبعد باش تفكرت بلي نائلة دارتلها براسها تاع وشنهي

نائلة : ارواااحي هنا بلاصة فرغانة

قمر : لاه ماتجيش نتي !!!

نائلة : ارواحي برك ... هنا في اللول خير

قمر : اكي كفرتي .. انا نجي نقعد نقابل الاستاذ ... كيما راني اني مليحة

هزت نائلة ادواتها وناضت شافت فيها قمر  عاقدة حواجبها ...جات حطت حوايجها ديراكت وقعدت سلمت على قمر

قمر : تقعدي هنا طول !!

نائلة : وش معجبكش الحال ! اني رايحة ديزولي يلا كان ديرونجيتك

جات نايضة رجعتها قمر

قمر : لالا .. مكان والو اقعدي برك .. اصلا معنديش صحابات

نائلة : مالا انا صحبتك منا والجاي

قمر : هه ان شاء الله ... مزال مجاش البروف !

نائلة : منقراوش 😂😂

قمر بصدمة : وشنهي منقراوش ! كيفاش منقراوش هاذي ! تسما جيت من شعبة الاخرة باش في اللخر منقراش !

نائلة : تحوسي تقراي !

قمر : باينة .. حنونتي هاذا القانون الجنائي الموديل المخير عندي نقراه بلا كلل ولا ملل

نائلة : مالا انا عكسك مانحبوش

قمر : هو الصح .... ولاه مجاش الاستاذ .. تسما مانقراو لا تيدي لاكور

نائلة : مع الاسف .. والاستاذ دا كونجي مالادي .. دار اوبيراسيون على قلبو

قمر : ربحت على جدي 

شافت فيها نائلة باستغراب .. تلم في ادواتها في كرطابلها

نائلة : وش تديري !!

قمر : نلم في قشي

نائلة : لاه !

قمر : مروحة وشنهي لاه !

نائلة : مزال قانون المدني كور

قمر : نزيد نقعد ! هنا ! امبوسي

نائلة : بربي متقوليليش برك هكذا العوام اللي فاتو كي متقرايش موديل تخرجي تروحي

قمر : باينة ... ودي عايزة كلام

نائلة : كيفاش ماجوريتي

قمر : ابن عممممي وش تسقسي ... هيا تخرجي ولا تقعدي !

نائلة : معليش يخي رانا في بداية السنة نجي نجي

خرجو مع بعض كروشات نائلة في ذراع قمر وطلقو الريح لرجليهم  يمشيو هاذيك الطريق الكبييرة الطويلة العريضة .. بين الباب والكلية تاعهم ( كيما حنا نطيحو 10 كغ في الطريق 😂)