سهم الغرام

تقديم

كان حتى كانْ... كان الجد و الجدة فالجنان يدورو
وكان الحفيد تحت الكرمة يشوف فالحميّْمات يطيرو
كان الخبز فالفرّاح من الكُشّينة عاطية ريحتو
والشمعة فخيمة الوْليَّد مهرسة عتمة ليلتو
يجري وليد السّراح حتى يعيا ويرجع لحزّيت جدتو يلوح جسدتو
تعاود ليه الخبير حتى طيب نعيستو
حكايات شلا مثال و حكام فيها تدسو ومن جيل لجيل ثْوَرثو
تبدا قولها و تزينو بكان حتى كان كانت السبولة فيامنا حادرة راسها هازة الثقل والرحى تتسنى زرعها والمهراز يغني لعطريتو لي منها كيثمل
فخيمة فراشها حصير والبال ساكنو الهنا و مْنخَّل همومو وراخي الحمل
النسا ملثمات قاصدات الواد  هازات القلة فالكتاف
أو وليد السراح يتْختَّل وراهم كساتو دربالة مرة بنعالة مرة يجري حافْ
عطشان لشوفة من اللي فقلبو رشكات #سهم_الغرام حمقاتو وفشبابو رزاتو وعاد يتعاف
وْناستو  يجمع صبيان القبيلة ينسج ليهم من خيالاتو خرايف ...حكاوي العشاق فزمان تمنى يكون هو وليد السلطان، ويتمناو العويتقات يحلمو بوجهو يظهر ليهم ويتشاف
واخة تسمعوني قلت هبيل وعقلو زهق
غير زعمو و عليه تلمو رآه ما يضرب بحجر ما يصرفق
اليوم جايب لينا حكاية يبداها و يقول......