ناصر : ايوا مللي هكا مزيان ندخلوه حتى حنا دخلة عيساوية من غدة خللي واحد من رجالك يذيع الخبار بللي واحد الفقيه سوسي كيجمّد الْما و يثقب بعينيه الصخر جا للقبيلة باش يجمع شي عشوب و تباخر و هو غايجي برجلو عندي وداك الساعات خللي الباقي عليّ، مللي قلتي ما غانصور منو والو بالقوة والسلاح ندخل معاه سوسة فعظامو الهادي: نجربو على الله، غير هو خاصك تتنكر باش حتى الى حصلتي و هربتي وبغاو يقلبو عليك ميعرفوش شكلك ،غادي نضبر ليك فشي لحية غير قصيرة و لباس ليه الشان باش متبانش كبر من عمرك.. وتقدر تأثر على حريم القصر .. خليك جالس جنب الواد دير راسك كتعزم حتى غادي تلقى كلاب الباهي واقفين عند راسك اودي الهم لا كثر يضحك، عنداك تدهش قدامهم بين بللي راك فقيه و حافض سواريك، باش يخافو منك...و يديرو بحسابك
وصل الليل جمع الهادي رجالو وخرجو ملثمين كيقلبو على وردية فالغابة و فالجوايه للي موالف الباهي كايقصر فيهم ما خلاو حتى قنت حتى وصلو لواحد الخلا عامر بالنخل كان الباهي داير فيه قصارة ما قدروش يقربوا من الخيمة بزاف حيت كانو ضايرين بيها بزاف ديال الحراس كثر من الهادي ورجالو، وعاد خلي للي لْداخل الهادي :(هضر مع رجالو لي كانو جهد عشرين واحد) ما موالفاش ليه يجمع هاد الرجال كاملين الا لكان غادي ينشل شي قافلة كون يصحاب ليا هاكة نجيب الرجال كاملين ما زال ما كمل هضرتو بانت ليه وردية مدخلينها شي غازيات معاهم للخيمة من بعد ما نزلوها من قفص وكيشطحوها بزز منها ورجال الباهي كايقربو منها ويتلمسو فجسدتها للي كان مكشوف جزء كبير منها وهي بحال لا مخمورة الهادي ما قدش يصبر ما زال و رجالو ضورو وْجوهم حشمانين من سيدهم، ودنيه بداو يصفرو و تم قاصد الخيمة كون ماواحد من رجالو حبسو ****:ما تغامرش أمولاي و تدخل فمعركة غادي نخرجو منها خاسرين راهم كثر منا بزاف، نفديوك برواحنا ولايني رآه تقدر تضيع منك لالة وردية فمرة الهادي: رآه ما يمكنش نشوفهم دايرين فيها هاد الحالة وتقول ليا صبر كي ندير نصبر ما جا فين يكمل هضرتو حتى سمعو قافلة ديال التجار جايين جارين جمالهم و رجال الباهي ضارو بيهم للي أسروه أسروه وللي قتلوه قتلوه و داو الغنيمة ورجعو يحتافلو بحالاّ ما وقع والو سمع الهادي الباهي هاز كاسو وكيقول للرجال الباهي: هاد الكاس ديال الغنيمة و هاد الثاني ديال بنت القايد للي غادا تكون عشايا هاد الليلة حيث ما بغاتش تكَر والثالث غادي نخليه لناصر ولد عدي ما جا فين يكمل جغمتو حتى بداو رجالو كيطيحو واحد مور لآخر... هجمو عليهم رجال ملثمين فكو الأسرى و كبيرهم رجع ليهم للي تنشل منهم.. الهادي ديك الساعة قرر يهجم هو ورجالو ولكن فات الفوت حيت الباهي قدر يهرب هو و للي بقا من رجالو ودا معاه وردية... الهادي بغا عقلو يخرج حيت ما لحقهاش تقول الأرض سرطاتهم رجع الهادي كيف المجنون للجبل نقز من عودو كيف الثور الهايج و مشى للخلوة ديالو للي كانت فكهف النمورة بقا جالس و قدامو العافية شاعلة و فيديه خشبة كيمضيها جمع يديه بعصبية وهو كيضغط على الفكين ديالو تقول سنانو غادي يطرطقهم و طلق واحد الصرخة خلات النمورة يهربو من حداه... وردياااااااا
نفس الحاجة بالنسبة للباهي للي دوز على رجالو العذاب ديك الليلة بسباب القافلة للي فلتات ليهم وبسباب هاد الملثم للي خرج ليه من الجنب، شك فالأول بللي الهادي، ولايني هو عارف الهادي من قامتو و طاح ليه فبالو بللي يقدر يكون ناصر حيث ما كاينش للي يقدر يزعم يهجم عليه من غير هاد الجوج و أمرهم يحبسو وردية و ما يقرب جيهتها حد حتى يجيبوها ليه لرياض الغازيات حيث مادام ما تكلماتش غادي يحولها لغازية باش يربيها ***************' الغد ليه ديعو رجال الهادي الخبار للي كيف النار دغيا وصلات من واحد لواحد حتى سمع الباهي بودنو جوج عيالات كيهضرو على الفقيه السوسي مول الكَرَمات ومن كلمة وحدة خرجو اشاعات وشلا كلام و حكايات... كانت حبة رملة ولات جبل غايريب بالكذبات نطقات وحدة فيهم وقالت لجارتها ****:ياختي كيقولو عليه سوسي على بوه وجدو.. كيجمد الما فالطاس و يهز الخط .. يقيص البيضة تولي جوج..يحيد الثقاف ديال ميات عام و يدير المحبة و القبول.. دزت عليه غير دابا حدا جنب الواد.. غير شاف فيا حسيت بلحمي بورش طالبين التسليم.. ودوزي عندي دوزي.. نديرو شي وقيّت ونطركوه.. كي شتي يا ختي الراجل سعر عندي ولا غا يضرب ويزكل
غير سمع الباهي هاد الهضرة رشكات فيه النبلة وصيفط رجالو يجيبو ليه هاد الفقيه لي كيتكلمو العيالات عليه، حيت التشعويذ بحالو بحال القمر حدك تبداه و تعطي بالراس لطريقو ويدوقو فلوسك ماليه معمرك تفرق عليه، كتولي فيك لولة،تبات و تصبح عليه.. الله يتبتنا ويتبتكم.. وداكشي ما منو والو غير كيعيشوك فالوهام و يخليوك لا فضل لا راس مال.. فالاخر كتلقا راسك جيتي تفك تا كتوللي مرزي فصحتك و خاسر دينك ودنيتك ********* {جنب الواد} كان جالس ناصر فوق صخرة جنب الواد و سهى ف صوت الما المتناغم مع صوت الطيور للي كتسبح للواحد الأحد.. و كيبانو ليه من بعيد شي وليدات كيلعبو حتى وقفو عليه رجال الباهي
***** :السلام عليكم أ الشريف.. واش نتا هو الفقيه للي جا جديد للقبيلة؟ ناصر : (كان ناصر داير راسو كيهضر مع شي حد من ماليه زعما.. شاف فيه و أمرو بيدو يسكت.. شوية نطق ) اييه ولقيتوني أ سيادي غانوض نيت نقلب فين نبات باش الصباح نرجع لقبيلتي
لاواه... السي الفقيه كلو جا تال قبيلتنا وما يلقاش فين يبات و ما يدوزش يشوف مولاي الباهي و يكرمو، خايبة تال المعاودة ناصر: ما بغيتش نتقل عليكم
الله يا ودي مرحبا بيك راك ضيف عندنا فقبيلتنا و كتير شي عند مولاي الباهي..ضيافو مكيمشيو غير فرحانين و مكرومين.. اش سماك الله اسي الفقيه ناصر: الطاهر مول البركة.. منردهاش فوجهك الضيف ما يتشرط. 🌙..... يتبع.... 🌙
المربوط بسلاسل الهوا والغرام... ما يتلام ما يتعاب على فعالو الروح العطشانة والقلب الولعان هما سباب هوان حالو
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
