سهم الغرام

سهم الغرام 🤍 الجزء 41

🏹سهم الغرام🏹
بقلم:راضية عابل ✍️

✨الجزء 41✨
مشات ذهبية لجناحها وبدات كترجّع ذكريات الماضي  ولا حققنا فعينيها للي الشر كيتقطر منهم غادي نشوفو فيهم صورتها وهي كدخل لدار فيها وليّد جالس مع مّو كيّاكلو ... وهي كتأمر خديمها يهز الولد يخَرّْجو ومن بعد كتقتل الأم بدم بارد و تّبعهم...
هاد المرا للي قتلات كآنت جارية عند اليزيد  حملات منو هدا شحال وهي تهرّبها ذهبية حيث وهماتها بللي غير غادا تولد أياخد منها اليزيد ولي العهد و يقتلها.. حيت الجواري عمرهم يوليو زوجات السلطان...

وغادي تتحول الصورة فعينيها لعافية شاعلة فقبيلة عدي وهي فوق عودها كتفرّج  او واحد من رجالها كيْهز  ولد صغير  تحرق النص فوجهو حيد ليه القلادة للي داير و علقها لولي العهد للي لاحوه تحرق حتى مات و العافية  مسحات ملامحو
هزّو الولد وغبرو من تم... وفاش وصلو للقصر عطاها الخديم عشبة تشرّبها ليه كل ليلة باش ينسى للي فات من عمرو و يتفكر غير اللي جاي

ذهبية :(تنهدات و قالت) خلّيت ولدك ألغالي يقتلك و يقتل مو و فالقريب غادي يقتل خوه التويمي... خديت بتاري منك... شنو كثر من هادشي ولادك كاي قطعو بعضياتهم، شتي كون تزوجتيني كون راك دابة جالس فعرشك هاني و ماشي تحت التراب.. وا تعانق ليا دابة مع الخديمة الذليلة للي فضلتي عليا
(هزات قرعة صغيرة ديال السم دارتها فشمارها و خرجات)
'******
فالقصر العالي وهو القصر للي ساكنة فيه السلطانة شامة كانت نورية جالسة فشرفة جناحها  ودموعها شلال حتى وقفات عليها وردية و الهادي للي كان ملثم باش ما يعرفو حد
شامة:(عنقاتها وهي كدّوّز يديها على راسها و كطبطب عليها) باراكة عليك من البكا راك قطعتي قلبي... حالتك ولات حالة و عينيك تغَرزو.. هانتي أ الحبيبة ديالي سمعي لكلامهم وديك الساعة ديري للي بغيتي..( خرجات وخلاتهم معاها)
عنقات  وردية نورية ومسحات دموعا وهو يحيد الهادي لثامو وجلس مقابل معاها وبدا كيعاودو ليها من اللول كيفاش حتى وصل ناصر  ولاش دخل للقبيلة عاود ليها سرار زمان للي تكشفات و للي كانو ضحيتها شلا عباد.. مابقات عارفة شكون تيق.. ودنيها للي سمعات بيهم بللي كان غير مستاغلها ولا كلام الهادي
الهادي: ناصر كيبغيك أ نورية تيقي بيا.. جلسي معاه و صفّيو الخواطر هو رآه من نهار مشيتي خرج كيقلب عليك كيف الحمق وما بقا بان ليه الأثر .. ما حيلتي نوصل ليك ما حيلتي ليه هو فين مشا ولا شنو جاري بيه
نورية: كيف ندير نتيق بهضرتك و أنا سمعت كلامو معاك و الكذوب لي كان كي كذب عليا.. كيف نتيق وهو كل كلمة قالها ليا وكل حاجة عشتها معاه كانت بهوت و كذوب؟
الهادي: صحيح خبّا عليك حقيقتو و بدا غرامو ليك بكذبة ولايني ديك الكذبة ولات بصّح.. نتي سمعتي غير نص الكلام و ما سمعتيهش كيف هضر على عشقو ليك... واش كضني بللي غادي نجي أنا و وردية ضاربين هاد الطريق كاملة باش نوهموك بحاجة مكيناش
وردية: (تحنات جالسة على ركابيها وشدات لنورية فيديها ) واش عمري أنا بغيت ليك شي حاجة خايبة ولا غدرتك... رآه خويا ناصر بصّح كيبغيك.. و يعلم الله بحالو دابا ولا فين لاحتو القدرة
نورية:(مسحات دموعها بعدما رتاحت لهضرة وردية) خايفة غير يكون رجع يقلب عليا فالقصر و يدير فيه الباهي شي حاجة.. بلحق با و ذهبية ما يخليوهش يدير فالطاهر شي حاجة
وردية: سميتو ناصر واش ما فهمتيش كلام الهادي.. رآه باك و ذهبية عندهم يد فكل حاجة وقعات.. و آخر واحد تيقي فيه هي ذهبية ياك المرسول لي صيفطت ليك أخر مرة قلت ليك فيه رآها باغة تقتل باك... فيقي شوية من هاد النية للي فيك  رآه داك القصر عندكم عامر غير بالقتالة
نورية: إنا مرسول؟ أه مرسولك..مقريتش شنو فيه.. كيفاش ذهبية باغة تقتل با؟
الهادي بقا كيشوف فوردية وكيرجع السمطة و فهم بللي المرسول للي مخلاتوش يقرا.. تصنتات لهضرتو مع ناصر و نسختها بالحرف لنورية... طلع ليه الدم حيت كذبات عليه و تصرفات من ورا ظهرو بلحق كتمها فقلبو وسكت
الهادي : نوضي معانا دابا باش نفكو هاد الحريرة و نعرفو شنو واقع
سلمات نورية على ختها و لبسات سلهامها وركبات على عودها وشدو الطريق
الطريق كلها و الهادي حادر العين من وردية و ما كيكلمهاش حتى وصلو للجبل.. دخلو يرتاحوا من عيا الطريق وهو يجي واحد من الرجال لعند الهادي يخبرو بمكان ناصر

.... يتبع...