سهم الغرام

سهم الغرام 🤍 الجزء 46(الأخير)

🏹سهم الغرام🏹
بقلم : راضية عابل ✍️

✨الجزء46✨

دازت سنين على ما جرى... ناصر رجع لأصلو او ولا سلطان حيت ورث الحكام على باه و بايعوه كاع الرعية و ناس البلاد و زهرات معاه الدنيا حيث جمع بين الفطنة والمحنة وحسن التسيير وكلشي كان عزيز عليهم حيت طلع لباه فالحكام العادل وحاجتو ماشي ديالو ... القصر رجعات فيه الروح وعاد منظم خير من اللول... بلاصة الحريم بوحدها وبلاصة الرجال بوحدها
ناصر ما قدرش يسمح لليازيد حيت فينما كيشوفو كيتفكر الماضي وحيث هو أصل المشاكيل عطاه رياض ذهبية او وفر ليه كاع للي يحتاج و مللي كيتوحش بنتو كاتمشي تزورو
******
فالجردة الخاصة ديال السلطان للي كلها ورد فكاع اللوان و على أنغام الما الصافي ديال الخصات وصوت الكروان الي كيطرب و الطاوس للي باسط ريشو فلوحة زاهية من صنع الواحد المنان  كانت نورية و ناصر جالسين وقدامهم ميدة فوقها صينية ديال أتاي والفاكية و حليوات بلدية مْشَكْلة
نورية: الغالي... أجي أ حبيبي لعب حدايا بلاك طيح... جيبي خوك أ  نجمة
ناصر:( لي كان متكي ليها على رجليها وكيلعب بسالفها للي كيف سبيب الحرير...) خلي الولد يلعب يطيح وينوض باش يطلع راجل.. ونتي غير خايفة عليه من الهوا الطاير
نورية: هههه غرتي من ولدك أ سلطاني
ناصر : معلوم نغير ...  دخل معايا شريك.. ونتي كتزيدي تفقصيني... (بدا يعيب فكلامها أجي أحبيبي الغالي) باز
نورية:( حطات يديها الدافيين على خدودو و قالت ليه) نتا راك ماشي غير حبيبي نتا راك النبض ديال قلبي... أسلطاني المغيار ههه
جات وصيفة لعندهم وهي حانية راسها وقالت : لالة نورية كنبشرك... لالة وردية حن عليها الله وتفك حزامها.. تزاد مولودها الثاني على خير وبخير و رآها كتسناكم تشرفوها فجناحها
نورية : (سولاتها وهي كاتقاد فجلايلها) .... امتى هادشي... رآه باقي وقتها
جاها الوجع على غفلة و هبط الدري ساهل ماهل ما محنها ما سخفها.. ما جاب ليها حد الاخبار تا سمعنا غواتها وجات القابلة كتجري
(مشاو يطلو عليها وهوما فرحانين)
نورية: غير دخل أ مولاي ناصر  رآه الهادي هنا.... على سلامتك أ وردية يتربّا فعزكم
السلطان ناصر: (دخل وهو  يمشي هز التربية بعدما بارك ليهم حتى هو) ههه تبارك الله الهادي الصغيور، زيادة الرزق، شنو ناويين تسميوه؟
الهادي: الله يبارك فعمر مولاي، ختارينا ليه سمية لقبل عليها مقامكم.. منصور أ مولاي
السلطان ناصر:(  شاف فالهادي و تبسم بالقبول) من اليوم منصور غادي يكون هو المفشش ديال القصر تهلاو ليا فيه

*************
وليد السراح: تهز علام الفرح فالقصر ودام سبع يام و ليالي، رجعات الفرحة مالية المكان و مشات قصتنا من لواد الواد وبقيت أنا جالس معا وليدات الجواد

*****:ياء صافي سلات الحكاية أ وليد السراح

وليد السراح: مقلتش ليكم قبل ما تسالي الحكاية كان شي حد ملثم وحادر قب سلهامو و كيتفرج فالسبوع من بعيد... مللي شافو ناصر هرب وغبر ليه لاثر

*****:شكون هو؟؟
وليد السراح: وهداو عليا... تا أنا معرفتش شكون.. تبقاو علا خير حكايتي مشات مع الواد و خليوني نوض نمشي لخيمتنا لا تهول عليا حنة

🏹النهاية🏹