✨الجزء 5✨ السما حاكت من خيوط الشمس الذهبية زربية تفرّش عليها العين همومها وتنسى القلوب كْروبها... هياضر توسداتها طيور الرحمان و نشدات فالعلالي.. عود ناصر وصل لمكانو مْقصَّد...كانت البلاصة مهجورة غير الخلا والقيفار... واد جا بين الجبال الشامخة سبحان من رسّاها لامسات الغمام ... وقف العود بين ربعة الشجرات متلايمين على جبل عالي وما علا منو غير الرحمان فسماه الواقفة بلا عمدان .. نزل ناصر باش يشوف راسو فين... وبدا يعيط بسمية الهادي... و ما حس تا لقا راسو مكتف و ترمات عليه شبكة وهزوه ربعة دخلوه من بين دوك الشجرات فعمق الجبل.. مكان كيبان ليه فاللول والو.. غير الظلام و صوت خطاوي للي هازينو.. شوية بدا شعاع خفيف كيهرس العتمة و دخلو وسط غابة فيها خيمة كبيرة دايرين بيها شلا خيام و حطو ناصر قدام كبيرهم للي كانت عندو واحد الهيبة آي واحد وقف قدامو بزز منو يحدر ليه الراس... لونو خمري و عينيه كيسان.. طويل و عامر من الكتاف وصوتو يزعزع الطير من فوق الجبال...كان جالس وسط الخيمة على كرسي بحال العرش من جلد النمر وموراه راس نمر معلق... جالس جلسة ديال النخوة كتبين على القوة ديالو و بللي هو للي حاكم هاد الجبال ******* الهادي :(وقف عند راس ناصر للي كان مكفي على رجليه ومد سيفو كيحركو حداه ) فكوه... شكون نتا...وكيفاش عرفتي مكانا و شكيدير عود وردية معاك ناصر :( بغا يوقف ناصر وهو يحط الهادي السيف على كتفو و نغزو بيه باش ييبقا جالس فالأرض) أنا ناصر صيفطني عندك سالم من قبيلة أيت عدي تعرف ليا لمن هاد الخنجر وتنعت ليا طريق مولاه الهادي : ( خدا منو الخنجر وبدا كيقلب فيه) عرفتو.. ومالو ما جاش راسو ناصر :( تغرغرو عينيه) حيت هاد الخنجر بيه باش تقتل الهادي : شكاتقول... واش سالم مول الوشمة بين الكتاف علامن داوي..ونتا ناصر حفيد عدي صاحبو ناصر : اه.. هو الهادي : ( دوز يدو على قفاه وهو كيتحسر و رجع سيفو لبلاصتو و وقف ناصر) مدوزتش أنا وياه قليل.. دينو فرقبتي ... كان باغي سالم يلاقينا شي نهار و معمري ظنيت غانتلاقاو بسباب موتو .. مقلتيش ليا عود وردية بنت القايد شكيدير عندك؟
(عاود ليه ناصر شنو وقع ليه وكيفاش عاوناتو وردية)
الهادي : هادا خنجر من خناجر رجال الباهي.. ولد بنت عم السلطان اليازيد... صيبتو بيدي... أنا للي صنعت باش تموت أ صاحبي سالم... الباهي داير جماعة ديال القطاطعية وحتى حد ما سايق ليهم الخبار من غيري أنا و للي ضايرين بيا .... كينشل القافلات و يسرق التجار الكبار و يلصق ليا التهمة... مشيع الخبار بللي أنا ورجالي ورا كل سريقة... حتى ولاو ناس القبيلة مبريين منا.. وما لقينا غير هاد المكان بعيد على عيونهم و مدام وردية عوناتك غايكونو شدوها... خاصني نعتقها منهم لطرات ليها شي حاجة نحرك القصر بللي فيه شاف فرجالو و قاليهم يوجدو السلاح و يتسناو أمرو... من زمان باغي غير منين يدوز للباهي (شد ليه فيدو و زيرها وقال ليه من اليوم أنا وياك اليد فاليد حتى نجيبو حق حبابنا) ناصر: بغيت غير نعرف شنو درنا ليهم باش ينتاقمو منا بهاد الطريقة شنو دار با فيهم كاع... والله ويطيح بين يدي هاد الباهي تا نفرتكو ونلوحو لكلاب العسة ينهشو لحمو... الهادي : سمعني مزيان.. سخونية دمك ما عندها باش تنفعك.. و كثير شي مع الباهي..نتا بوحدك ما تقدرش عليه..أنا لي عارفو شكايسوا.. دكشي لاش متزربش.. كل حاجة غالطة غاديرها محسوبة ضددك و تولي غادي لحبل المشنقة برجليك.. خاص واحد فينا يدخل للقصر باش يمهد لاخرين كيفاش يدخلو... السلطان حاسب الباهي ولدو و دايرو هو قايد الجيش ومكيتحركش بلا بيه... حيت نمرود و السبع ميصور منو والو... مكينش حسن منك لي يدخل للقصر... حيت تا حد ما عارفك... خاص تعرف الشادة و الفادة على الباهي ورباعتو... و تاكل ليه عقلو حتى تولي دراعو ليمن باش تعرف نقط ضعفو... ولكن كيفاش غادي يتييق فيك و كيفاش غادي نوصلو ليه... حيت ماتقدش تقتلو فالوجه مباشرة... قبل ما توصل ليه غايكونو رجالو قطعوك طراف... واحد من رجال الهادي: كل ليلة سبت أ سيدي كيقصر فالغابة مع الشيخات.. هو ورجالو وكيعطيوها للسكرة .. قبل ما يشد فيه الشراب غادي نطلقو عليهم شي ربعة النمورة ونتهناو منهم ناصر:لا أنا بغيتو حي... بغيت نعرف قصة با معاه ونعرف كاع لي كانو واحد بواحد ديك الليلة وتعداو على غيثة و نعدبهم عاد نقتلهم و ما يهنا خاطري .. منين غا تجيب هاد النمورة بعدا الهادي : وقيلة مضورتيش عينك مزيان... كل واحد من رجالي شاد نمر ولا يكما سحابك قشاوش عيشورة.... كل قنت هنا فيه نمر... هادو هما ولادي و صحابي و عائلتي كيف ما هما فنفس الوقت عدياني وسباب طغياني... ناصر: ضروري هاد خينة ما تكون عندو شي حاجة منين غادي نلويو ليه دراعو غا فكر ألهادي االهادي: الباهي مضروب على الشياخ و القصاير... و نقطة ضعفو هي مّو..لي كسبها كسبو... و على ما عاودات ليا وردية... الباهي كيموت على تراب رجلين بنت عم مو... ويجيب ليها حليب العصفور غير ترضى تشوف فيه... ما خلى ما دار باش تبغيه او والو... دافعة عليه كبير و دايرة معاه كي المش مع الفار... حتى ولى فين ما كان شي فقيه يقصدو يدير ليه القبول معاها وهي غير ما زايدا ف كرهها ليه... حتى تبلى بالشوافات و الفقها باش يرطبو قلبها عليه... ونهار تولي حرير بين يديه حالف يغرق لي كان سباب ذهب و ياقوت... واخا تسمع بللي هو قايد الجيش... و لا كلمة فوق كلامو.. و منوض الخوف فالقبايل... ما تجيكش غريبة مللي تسمعو مضور بيه رباعة من الكهانة يقضيو ليه مسايل الغرام للي ملقا ليها حل ناصر: هادشي لي عاودتي عليه ما يخليش الواحد يفكر يقول رآه يتيق بخرايف الكهانة... على كل حال شغادي دير فوردية... هي دارت فيا غير خير مانبغيش تآدى بسبابي الهادي: كون هاني.. نتا غير سير فكر كيفاش غادي تعامل مع الباهي أما وردية مانرتاح حتى نجيبها هاد الليلة
#يتبع...
✨️اه يا الغرام الكاوي تعز من بغيتي و تذل قومان تبيتهم فالهم والشكاوي✨️
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
