سهم الغرام

سهم الغرام 🤍 الجزء 42

🏹سهم الغرام🏹
بقلم :راضية عابل ✍️

✨42 الجزء ✨

وهو يجي واحد من الرجال لعند الهادي يخبرو بمكان ناصر.. قاليه بللي خديم فالقصر جابليه خبارو.. و قاليه بللي طاح بين يدين الباهي و ساجنو هو و اليزيد و صفية وعاود ليه على حوال البلاد كيف ولات بعدما شد الباهي الحكام..... جمع الهادي رجالو  و بداو يجبدو السلاح من المخازن و يوجدو فالنمورة .. بداو يدرسو كيفاش يدخلو القصر باش يعتقو ناصر، ورسل الهادي رجالو ينقنقو الاخبار فالسوق و الزناقي باش يعرفو رجال الباهي فين منشورين.. وزرع بركاكة فالقصر يجيبو ليه شحال ديال الجنود قدر يضم لجيهتو.. رسمات نورية للهادي القصر او وراتو كل قنت فيه منين يدخلو و منين يخرجو او وراتو بلاصة الباب المخفي للي فجنان الرمان .. او وراتو منين يقدر يدوز لمخازن الباهي ديال السلاح.. حيت كانت كتبعو فينما مشاا و عرفات وكارو كاملين
نورية: الباهي عندو خمسة ديال المخازن .. واحد فالسوق و جوج فالغابة و واحد فالقصرالرايب و واحد فرياض ذهبية للي فطريق القصبة هادشي لمكانش بدلهم مللي حصلني ديك الليلة... بالحق منضنش يبدلهم حيت هاد البلايص بوحدهم للي ما مكشوفينش
الهادي:  قولي باب جنان الرمان لينا بلاصة فالقصر كايدي...
نورية: كدوز على قبة الحكام و كاين جناح السلطان عاد جناحي
الهادي:ضروري غادي يكون حاط العسة على ديك البلاصة.. ماشي ساهل ندخلو من تم... دازت يام وهما كيفكرو ويخطو
********
لرجعنا للقصر غادي نلقاو ناصر كيدَوّز جميع انواع العذاب فحبس الباهي كان  فزنزانة  مغموقة كيدخل ليها شعاع قليل من واحد الشريجم قريب للسقف و ريحة العفن عاطية منها .. واقف  ويديه مربوطين بسلاسل مدلية من السقف .. ورجليه مصفضين بالحديد و الجلاد واقف عند راسو  وكينزل عليه  مخلا فيه حتى بلاصة ما شحطهاش  حتى ولا كلو دمايات..  دخل عليه الباهي وهو هاز كاس ديال الشراب فيدو و بدا يمسح ليه فالجرح بمنديل غيثة
الباهي: هاني رجعت عندك تاني.. هاد الكاس كنت مخبيه نشربو مللي نتلاقاك أولد عدي .. وهاد المرة غادي نوصلك على طاسيلتك للي غادي تكون توحشتي

ناصر:(هز  وجهو من الأرض بزز ودفل على الباهي وقاليه) غيثة من الماضي... دابا ما كينش فقلبي من غير نورية...
دار الباهي عند الجلاد وبدا كيضحك شوية دار بالزربة تاني جيهة ناصر وضغط ليه بجهد على الجرح  حتى عض ناصر على شنايفو وكتم صراخو...و شدو بالجهد من شعرو ورجع ليه راسو اللور
الباهي: كدفل على السلطان أ وسخ رجليا..نورية هي لي عمرها تكون ليك... نقطع ليك داك اللسان دابة ولا شنو.. بلحق لا... غادي نحرق ليك وجهك بهاد الجمر كيما باك حرق ليا وجهي  و عاد ندوزو لشي لاخر  ونشوفك واش غادي تقدر تستحمل.. يالله الباهي حما السيف وجايبو لوجه ناصر وهي توقف عليه ذهبية ومعاها حارسها
ذهبية: وقف... خلي ليا أنا هاد الشرف..باراكة عليك غير عائلتو هادا بغيت أنا للي نقتلو... سير نتا لقبة الحكام رآه وصلو عندك تجار السلاح
الهادي: تهلاي فيه مزيان.. ديري حقك حتى نتيا
كيف مشا الباهي.. حارس ذهبية طرطق للجلاد عنقو و بداو كيفكو فناصر والحارس سول ذهبية
****لاش أمولاتي باغة تعتقي عدوك
ذهبية؛ أنا بغيت انتقامي يكون كامل... بغيتهم يتقاتلو قدامي بجوج باش نحس بنشوة النصر..وزيدون أنا مرا عادلة خاص كل واحد فيهم يكون عندو السلاح باش يتقاتلو بنزاهة ههه.. نقص من الكلام و طلق راسك.. فاش تخرج غادي تلقا عود ناصر برا حطو عليه وطلقو رآه غادي يوصلو فين مالف كيديه وغبر نتا

هزو على كتفو و خرجو بالسر من الجهة اللورانية ديال القصر.. كان ناصر فاشل ومغيب بسباب الجلد لي تجلد وبسباب الجوع والعطش و رجليه للي كانو فوق لهيب العافية... ذهبية دارت راسها سخفانة حدا الجلاد باش ما يتكشفش أمرها

..... يتبع......