سهم الغرام

سهم الغرام 🤍 الجزء 29

🏹سهم الغرام🏹
بقلم :راضية عابل ✍️

🌙 الجزء 29🌙
داز هاد النهار مزروب.. ومغازل الليل حاكت نجيمات نشرات نورها فكل القنات... ناصر مثقل اللعب حتى يجمع خبار على الباهي باش يطيحو طيحة ما يتكعدش منها.. وحس براسو بحالا  ولاو عليه العينين... صفية لي كانت شوية وتفضحو و نورية للي عتارفات بحبها ليه وغاتولي حاضياه فالداخلة والخارجة  قطع تفكيرو خديم للي جا طالبو للسلطان
...
فقبة الحكام.. كان السلطان جالس على عرشو... و شاد من لحيتو و كيفكر فشي حاجة...حتى دخل الخديم او وراه ناصر.. تحناو عاطيين التحية للسلطان
اليازيد :زيد أسي الطاهر... قول ليا شي خبار على السوق هاد ليام؟
ناصر: التجار فرحانين أ مولاي سلعتهم تباعت و الحركة مشية عندهم وكيدعيو معاك بطولة العمر
اليازيد: مقامك عاد عالي عندنا  بعدما جاتني خبار بللي كاتعاون الناس فالقبيلة و كتجري فالخير... داكشي لاش عيطت ليك باش نذاكر معاك شوية... ولايني قبل خاصني نعرف أصلك وفصلك و من اينا قبيلة.. وعلاش لاّ تجيب ناسك هنا يقربو ليك
ناصر : أنا أ مولاي عايش جوال ما عندي تالي ولا والي... يتيم من صغري ما عارفش أصلي.. غير واحد الراجل كان من الرحل رباني و علمني تجارة الثوب وبقيت ملاوح بين القوافل.. حتى جابتني القدرة لبلادكم أ مولاي
اليزيد: عينيك ما غرابش عليا...عيت نتفكر لمن شبهوني ما عرفتش (بدا السلطان كايسعل حتى داز ليه الدم من فمو)  مسحو وقال ليه ما تجيب سيرة هادشي لحتى حد...و حاجة اخرى نبغيك تحط عينك على الباهي وتبقى وراه رآه ولاّ هاد ليام مقجر على الناس.. نبغي للي دارها ماهياش توصلني... راك عارف مصلحة البلاد فوق كلشي.. وصاحبك لا بغيتي ليه الخير خاصك تردعو على الفعايل السايبة للي كا يدير... يمكن ليك تمشي
ناصر:  أمرك أمولاي.. كون هاني.. من هاد الناحية
مللي كان خارج من القبة بان ليه خيال تحرك بزربة وصوت خطاوي....تبع الصوت وهو يخرج فقنت مسدود... كاين غير حيط يعني كون كان شي حد داز من هنا غادي يلقاه.. حنا راسو وتم راجع ولكن شاف شي حاجة للي غريبة... زليجة  فذاك الحيط كتبان محفرة من الجناب.. تحنا و دق فيها سمع الصوت خاوي... وهو يقيصها تدفعات ليه وتحل باب صغير فالحيط... تلفت وراه ملقى حد وهو يدخل 

... يتبع...