سهم الغرام

سهم الغرام 🤍 الجزء 28

🏹سهم الغرام🏹
بقلم:راضية عابل ✍️

✨ الجزء28✨
صبح صباح نهار جديد وشرقت الشمس الغايبة معنقة غيوم السما الصافية.. الجو فالقصر كان هادئ.. شي وصيفات كيتهامسو بيناتهم.. و شي خدم كينقيو الجردة... و السلطانات  مشاو طللو على ذهبية مللي سمعوها صبحات عيانة و رجعو جلسو مع باهم
شامة: حالتك ما بقاتش عاجباني أ با غادي و كضعاف و تكرم خاصك تشوف الحكيم فالقريب العاجل
اليازيد:  ما بيا والو غير مع شغالات العباد.. و مشاكيل هاد البلاد..
نورية: وا لابدا يشوفك الحكيم.. واش صحتك رخيصة عليك أ سلطاني..
صفية بقات غير كتشوف وساكتة.. طلبات الاذن من السلطان و خرجات من الجناح.. و بقات كتمشا فجنان الرمان... جلسات وهي حزينة تحت شجرة وبقات تحرك فالورد للي حداها وتغني مغبونة
🎶🎶🎶🎶
آمزين وصولك يا البدر الثاني لولا جفاك
وكلام حسودك والرقيب اللي ضاير بيك
قابل بشروطك حن وعطف علي هواك
سرّح مسجونك يا الجافي ونعامله بالفكاك
لأني مملوكك ولا يلك فيا حد شريك
ما حد نجومك ضاوية وهلالك بين الفلك
من قبل غيومك ينطفى ضوه ويخليك
لو جيت ندوزك صبت عقلي يا الجافي ما نساك
باقي محسوبك ما وفى ميجال نبريك
يتسكم شورك حتى نقول الله عليا هداك
وتعود لجورك يا اللي تكره من يبغيك

مع الكلام اللخر للي نطقات دهسات شحال من وردة بالغدايد.. معا علات راسها... وقف حداها الباهي للي بسباب نحلة دخلات فقناعو بغا يحيدها هو يطيح ليه.. مللي شافها شافتو كحل بالعما  .. بزربة غطا نص وجهو بالقناع.. وما عجبو حال تشوفو.. يالله غادي يبدا ينكر هو يتفكر هضرة ناصر اللي قاليه خاصو يعاملها مزيان.. باش دير ليه طريق مع نورية
الباهي: صباحك مبروك سلطانة.. نهاري غادي يدوز زين مللي صبَّحت بوجهك الضاوي.. شكاديري هنا وحدك بلا وصيفات
صفية:(تصدمات من هضرتو.. حيت فخيالها ما كانتش كضن يشوف جيهتها شي نهار) 
يسعد صباحي و صباحك و كيف بغا صباحي ما يسعد مللي صبّح عليك، مالك كدرق وجهك عليا... متحتاجش دير قناع نتا فعيني سيد الرجال....بان ليا  الجنان مفيهش ريحة بنادم جاني القنط وطلع ليا البشار فصحتي.. قلت نخرج نطلق رجيلاتي..
الباهي: ايوا مزيان.. نخليك فراحتك
صفية: (قالت ليه فنفسها راحتي ما تجي تال نهار تكون ليا) غير خليك لابغيتي
الباهي: ما نصيبش عندي شي شغال.. حتى نتشاوفو فميدة الفطور

... يتبع...