🏹سهم الغرام🏹
بقلم :راضية عابل ✍️
✨الجزء 3✨
شاف فيه الفقيه و طبطب على كتفو وقاليه
الفقيه : يالله بات معايا هاد الليلة و غسل حالتك و عمر معدتك رآه الكرش الجيعانة ما كاتخلي العقل يخمم، رتاح وريح عودك او وَرْدو و ديك الساعة مولاها ربي، الليل طويل عاود ليا قصتك و قصة الخنجر و فالصباح يحن مولانا
**********
(فدار القايد)
القايد: كيفاش يدخل البراني للقبيلة و أنا ما سايق خبار وداك الفقيه ما بغاش يدخل سوق راسو، ولا فاتح ليا دارو دار الظيافة يدخّل من بغا ويخرّج من بغا
بنت القايد(وردية) : يهديك الله أ بّا تلقاه مقطع بيه الحبل و بغا يعاونو مسكين ونتا زعما منين وارث هاد الحرفة أ ولد عمي تموت على توصال الخبارات، فمك مراجل يموت على شعيل العوافي
القايد: كوني تحشمي و سيري فوتي عليك جرة الرجال يالله تحركي عليا من هنا خارجة لمك غا طالقين ودانكم تسرح، ونتا زيد قدامي تجيب غا الخبارات الزينة بحال كمارتك
********
سمع الفقيه الدقان فالباب ، ديك الساعة كان ناصر متكي على هيضورة وعند راسو قنديل كيفكر فحالو وما جرالو حتى وقف عليه القايد او ولد خوه
القايد : شكون نتا و منين جاي و لاش
الفقيه : هادا ولد بنت ختي جاي يحيي معايا صلة الرحم أ سيد القايد
القايد : و ما حشمتيش تكذب ونتا فقيه يا حصرا و كبّة من الشيب ولد ختك ولا عمتك، زيدو قدامي بجوج
الفقيه: مكنعرفوش أودّي..دير خير ما يطرا باس ... رآه جا كيسول على الهادي ولد معمر عندو شي خنجر بغاه يعرفو ديال من
القايد : (شاف فناصر وهو ماد يديه.. ) هاااا لّي قلنا وا دابا مزيان أرا ليا الخنجر لهنا و زيد قدامي ونتا أسي الفقيه هادي دوزتها ليك المرة الجاية غادي نتفاهم معاك
خداو من ناصر الخنجر بزز و داوه سدو عليه فبيت المونة فدار القايد حتى يشوفو شنو يديرو معاه، فيه ما يطويهم بجوج على ربعة يبرد فيهم الغدايد بحال يلا عفط على بخوشة ولايني مبغاش يزيد فيه والعافية تشعل كمّد تفرعينهم عليه وسكت بغا يقدي غراضو ويسَلْ شوكتو بلا دم
تناصَصْ الليل وحدر خواميه وهي تخرج بنت القايد كتسلت سرقات الساروت والخنجر و حلات على ناصر
وردية: با ما فقلبو رحمة ولا شفقة وراني سمعتو كيهضر مع شي حد و فاش وراه الخنجر قالليه لآخر هادا ديال جماعتي وقالو بلا شوهة وبلا ما يسيق شي حد الخبار نعت ليه طريق الغابة زعما هي فين غا يلقى الهادي، وتم غادي نعرفوه شكون ومنين جاي ولاش
نوض دابا معايا قبل ما يحصلونا و نمشيو فيها لا نتا لا أنا
ناصر: ونتي كتعرفي هادا للي هضر معاه باك
وردية:(كتوشوش ليه غير بشوية) لا ولكن ظاهر من لباسو و حروشية كلامو جاي من القصر حيت با ماكايدير بحساب حد غير لا كان من القصر مشفتوش حيت كان عاطي بالظهر واا زيد دابا... اش سماك الله بعدا
ناصر: سميتي ناصر ونتي
وردية : انا وردية
جراتو وراها و خرجو بسليتة بلا حس، عطاتو عودها و مدات ليه الما و الماكلة وخنجرو و قالت ليه خليك ملثم رآه لشافك شي حد وعرفك غاتمشي فيها هاد المرة وكون بدلتي لباسك حسن و بلامة تكوّد العود رآه عارف طريق الهادي
ناصر: شكون غادي يعرفني رآه تا حد ما شافني من غيرك، كيفاش العود عارف طريق الهادي
بنت القايد: ماشي وقيتة الحديث هادي من بعد وتفهم يالله، الله يكون معاك أولد الناس هادا جهدي عليك
ناصر: عمر خيرك ما نساه وغادي يبقى دين على رقبتي
#يتبع...
✨️الناس طوب وحجر.. تعرفهم وقت الرّْخو و فالضّيق
والطريق حالفة تا تلاقي لَعْدو و الصْديق✨️
أنت تقرأ
سهم الغرام
Tiểu thuyết Lịch sửفراشي النوم جفاه و طابو جناب الليالي حتى طرزتي معاني العشق فظلام ديجاني
