🏹سهم الغرام🏹
بقلم :راضية عابل ✍️✨الجزء 7✨
مشى ناصر مع رجال الباهي،.. فالطريق كان كيفكر كيفاش غادي يقدر يتحكم فراسو مللي تجي عينو فعين الباهي... غير وصلو رحب بيه و ناصر كون صاب يتلاح عليه يقبرو فبلاصتو.. .. دَخْلو للقصر على أساس صاحبو باش ما يصيق ليه حد الخبار.. بدا يسلم عليه ويمجد فيه تقول كيعرفو من زمان العكس ديال ناصر للي قلبو تزير و لونو تخطف... وحس بالعافية شعلات فداتو..واخة هو فالأصل رآه ما شافوش حيت كان مغطي النص فوجهو بقناع و غير شي بلايص قلال اللي كيبانو منو و صعيب ملامحو يتميزو... مللي مد يدو وسلم عليه حس بالدنيا دارت بيه.. هو دابا داير يدو فيد عدوه
الباهي: نهار كبير هذا أسي الطاهر، جيتي فوقتك.. قالو ليا كنتي ناوي تمشي بلاما تزورنا،كي درتي ليها
ناصر: (تحكم فراسو للي كانو عروقو بارزين كيغليو و جاوبو) أنا مجايش فزيارة لهاد لبلاد، عندي واحد الغراض نويت نقضيه و ما نعزم الرحيل حتى نضّي الشغل ونحط كل حاجة فموضعها..
الباهي: و أما هو هاد الغراض ؟للي صعابت عليك سهالت علينا أسي الطاهر
ناصر: طلب التسليم.. الجواد للي معايا مكتخفى عليهم مخفية فعمق البحر .. ولا فجوف الصخر.. . و مكتصعاب عليهم صعيبة ولا مصيبة... وها واحد منهم دابة خبرني بمرادك مني
ياك عيتي ما ضور بيها... وهي منخلاك
ريقك طاح عليها وهي ما معبراك
أمر الباهي رجالو يخويو الصالة و كمل ناصر كلامو بلامايتسوق
دّآت ليك العقل والقلب و عقلها ما مسوق، وقلبها ما حاس بيك ما حان ليك، ما بغات بيك ترفق
ولَيني دواها عندي نجيبها لبين رجليك راكعة تزاوك
الباهي: وهادشي للي بغيت ولا تقضى غراضي و تبلغ موراضي نغرقك ذهب و ياقوت و تولي ذراعي ليمن بلحق ما تقاس منها تا شعرة..هااه على ليام... مللي تولي قبيلة حكموها لسياد و الشرفة كبارها متكلين على الدجالين يقضيو غاراضهم شنو غاتكون عاقبتها
ناصر : بالمهل كيدخل الجمل للقدر.. وترسّي السفينة فالبحر.. إلا ما عارفش بقات غير ليالي معدودة لشهر رمضان و أنا وخدامي كنكونو ضعاف.. صبر عليا حتى يفوت رمضان وليلة سبعة و عشرين نرجع و نضي ليك الشغل
الباهي: مرحبا بيك... واكل شارب ميخصك خير حتى وكان يفوت رمضان ما مزروبينش تا حنا.. أنا وراها وليام تابعانا
عيط الباهي لواحد من رجالو و قال ليه من اليوم السّي الطاهر واحد منا منبغي لي يقلقو ولا حاجة تنقصو ،ديوه وريوه جناحو وتهلاو فيه
ناصر: علم رجالك وخا يشوفوني فنص الليل كنضور فالقصر ما يوقفوني ما يكلموني.. غانبدا نعزم ليك على كل قنت فالقصر.. باش منين ما دزتي تبقا هي تفكر فيك.. و جناحي نبغيه يكون قريب منها باش دغيا تشد فيها الخدمة.. وما يدخل ليه حد فغيبتي.. رآه ماشي بوحدي للي غانسكن فيه... ذنوبكم على ريوسكم
الباهي: كون هاني.. خود راحتك بحالة فدارك وكتر
ناصر:(ايييه... حالف نحرق قلبك على كاع للي دايرين بيك.. و نخليك تبكي الدم عاد نفصل راسك على جسدتك)يتبع...
✨️ضاق خاطري من حر الشوق و الفراق زاد عذابي حتى الصبر عليا جار
زيد فصبرك يا قلبي ولا تلوم فحالي مازال طويل المشوار✨️

أنت تقرأ
سهم الغرام
Ficção Históricaفراشي النوم جفاه و طابو جناب الليالي حتى طرزتي معاني العشق فظلام ديجاني