سهم الغرام

سهم الغرام 🤍 الجزء الاول 1

🏹سهم الغرام🏹
بقلم : #راضية_عابل✍️

✨الجزء: 1✨

باسم الله بديت وعلى رسولو صليت ، ياللي ما جلس فْلمَّة العجايز وسمع الحكايات، يقرب حدايا نديه لزمان ألف ليلة وليلة من الروايات.. حكاية جمعت بين كل حاجة فالدنيا و عكسها فكون المعجزات ، الغرام و عداوتو مع الكره و الانتقام و الظلم و سَجّانو(العدل) بسْلاسل الفَطْنة والحكام، والقوة للي مْزيغة الشبان و الشيب للي حْناو الراس وهزلو بسبابو سَلاطين الْقوام...
حكايتنا نبداوها مع شاب من زينو ما بقى راجل فالقبيلة يتقال عليه زين، ومن رزانتو وتباتو تعطى المثل و من قوتو وشجاعتو تفرقوا سيوف الحروب وتقطع راس الخوف و هزلْ
ايوا بالمهل أجيو نسجو معايا خيوط حكاية ناصر وسهام الغرام للي 🏹رشكاتها فيه ليام
*********
دخل ناصر لابس لباس القبايل شعرو شْهبْ و عينيه خضرين مايلين للزيتي كيبريو مع ديك الشميشة للي ضاربة فيهم.. ظاهرة عليه القوة و الرزانة لواحد الخيمة كبيرة، واسعة و عريضة أو واخة تسمعو خيمة رآها خيمة و أشمن خيمة مفرشة بالزرابي المنسوجة بيدين العيالات الحرات الغرات و مزينة بخوامي الحرير والشموع مرشوكة فكل قنت وريحة العطور فيها تنسيك الهموم و تخليك تشهى تبات ليلة وحدة من لياليك سهران فيها تشوف سما العالي شحال مخبيا من نجوم وشحال لامّة من حكاية مغروم

ناصر: الليلة عرسنا أ غيثة اليوم غادا تكوني ليا ، ليا بوحدي أ لالة غيثة الساكنة جوارحي و المضوية ظلام عينيا
غثية : لسانك الحلو كيتلف ليا العرف و يخليني غير ساهية فكلامك المعسل، أنا ليك من نهار تولدت وغانبقا ليك حتى نموت أ تاج راسي، وا خرج من الخيمة قبل ما تجي يمّا و البنات و يشوفوك وتوللي حاصل، رآه ماشي مزيان تشوف العروسة قبل ما تحنّي
ناصر :كتجري على زمانك و ها هو غادي
غيثة جيتي كي شي وريدة مفتحة طاح عليك السر أ زينة البنات
غيثة: حشومة عليك كاتحشمني أناصر وا سير صافي، سير دابا يكون سالم كيقلب عليك
****************
(فخيمة سالم)

ناصر : ها واحد السلام عليكم
هاي هاي ريحة العطور مدوخة القبيلة تقول نتا العريس ههه... وا حاول علينا بلاما طلق علينا زينك هاد الليلة توللي مدوخ العويتقات
سالم: يهديك الله أ ناصر فين نبان قدامك و الله أ صاحبي ما سايعاني الارض بالفرحة كنتسنا نهار عرسك كتر منك باش نتهنا من سير و اجي بيناتكم دايريني مرسول الغرام قهرتوني
ناصر: هههه باز ليك أ سويلم عرفتي أ صاحبي مكرهتش كون كان خويا منصور معايا اليوم مكينش شي حد لي غايفرح ليا قدو
سالم: ياك و أنا فين خليتني ولا زعما نتا حاسبني غير صاحبك، أنا بعدا يشهد الله عازك كتر من راسي غير آمر رقبتي تفديك
ناصر : عارف اللي كاين على شكون من غيرك للي عمر بلاصتو ولكن منصور كان التويمي ديالي و موتو خلاني نحس بللي مبقيتش مكمول نصي الثاني رشاه التراب خلاني ولد 5 سنين ولدابا ما نسيتوش و كل ليلة كنشوفو فمنامي محروق كيما مات, قلبي ماعرفت مالو مزير وخاطري مقبوط
سالم: الله يهديك واش الليلة عرسك ونتا باغي تنكدها على راسك نوض زيد قدامي نضربوها بتحمحيمة فالعوينة و نشربو شي كاس ديال أتاي معشب باش توكض معايا شوية
ناصر: غير سير نتا أنا غادي نمشي للمقابر نترحم على منصور ومن بعد نتبعك
سالم: وايلي على المقابر ما لقيتي ايمتى غا اليوم ، نمشي أنا نتحمحم وا باز ماعرفنا شكون العريس؟ وا سير هانا كانتسناك ما تبطاش

ركب ناصر على عودو و مشى لقبر خوه بقا كيهضر معاه...و مشعرش حتى داتو الغميضة حيت من فرحتو بزواجو من غيثة ما نعسش الليلة كاملة، مللي فاق ناض مزروب خايف يكون تعطل على العرس و تحيح عليه غيثة حيت عارفها مجينينة بقا كيقول فعقلو (واش أ ناصر وقيتة القبور هادي الحي ولا من الميت إلى غيثة ما سمحاتش فيك اليوم فالعرس راك مرضي، ما درت فيها ما يليق ديك الحمقة تلقاها كتقول هرب ليا ناصر ديالى ههه)
وصل لقبيلتو وتصدم من هول ما شاف لقاها غارقة فالدم و الدخان خارج من كل خيمة فيها معرف راسو باش تبلا واش فحلم من حلامو و لا فعلم...
قبيلتو كلها مقتولة، ها لي مليوح فالأرض وغارق فالدم ها لي معلق فالشجر ها لي محروق مشا كيجري لخيمة باه و مو لقاهم مرميين فالارض و فدمهم عايمين و الروح طلعات لمولاها عنّقهم و بقا كيغوت
مشات الركبة الحنينة و الكتف السّاندو
جرى لخيمة غيثة وكيتمنى ما يشوفش نفس المنظر، لقاها مليوحا ففراشها ومدبوحة و باين عليها أتار شي حد مكرفص عليها وماشي غي شي حد، باينا تناوبو عليها مسكينة و سالم مربوط ف ركيزة من ركايز الخيمة ومضروب بخنجر...
شد من راسو و بقا كيزدح فيه و كيغوت و عقلو غادي يخرج
لاش أ ربي لااااااش لاش مشيت و خليتكم...شوية سمع صوت سالم كينين
ناصر: سالم أنا هنا قول ليا شنو وقع شكون دار فيكم هادشي

(بقا كيجاوبو بصوت مقطع)

سالم: للي جاو كانو عارفين اليوم عرسك حيت مللي جيت نعتق غي..غيثة كانو كيهضرو معايا على أساس راني نتا كانو كلهم مغطيين وجهم بقناع كحل.. و واحد فيهم طيرت ليه صب... صبعو الكبير هو لي أمرهم يتعداو على غيثة ورشك فيا الخنجر و قال كيما حرق باك قلب سيدنا هاحنا كنحرقوكم واحد بواحد
خو..خو.. خود الخنجر للي مغروس فيا وسول فقبيلة ولاد عامر على الهادي ولد معمر هو للي غادي يقوليك شكون مولاه ما تخليش دم غيثة يضيع.. ( نطق الشهادة و مات سالم)
عنقو وبقى كيغوت كيف الحمق دار ناصر على خيام قبيلتو وحدة بوحدة ياكما يلقا شي حد باقي عايش وكل خيمة دخلها كيلقا ماليها مايتين ومسلمين الأمانة لمولاها

#يتبع

✨️الفرح ديال ماليه ما يدق باب للي بحالي
ويلا دق شكون يفتح ليه بعد ما جرالي✨️