فطريق الرجوع للقصر كانت نورية راكبة هي و مهدية فكروسة فلون النحاس وكلها منقوشة.. باينة للي صايبها صنايعي على بوه و جدو و كيتقن صنعتو .. من الشوفة كتعرفها ديال القصر.. جارينها جوج خيول والوصيفات للي مشاو معاهم للواد كانو تابعينهم فكروسة آخرى نورية: شحال هادا ما دازت عندنا وردية ولا سولات فيا ماموالفاش ليها.. غير كتسمع حس النزاهة حدا الواد كتهز بنديرها وتجي تجري مهدية : سمعت داك للي ما يتسما (الباهي) كيقول بللي سافرو مالين دارهم كاملين وحتى وردية معاهم..حيت القايد عندو شي شغل كنت غانقولها ليك غير معرت شنو للي دهاني نورية: العجب... وردية غادا تسافر ومتجيش تسلم عليا هي الملحة دودات لا... لا.. كاينة شي إن تما مهدية: رخفي على الباهي واخا تولي تردي عليه غير السلام.. راه لسولتيه عليها غادي يقوليك... غير عرفي شكاين و نفريه تاني نورية: مكنحملوش شنو ندير من عند الله ما كيرتاحش ليه خاطري..ولايني داكشي لي بانلي غندير.. غادا نرطب معاه تا نعرف شكاين.. مدام سمعتيه هضر.. غايكون فراسو شواقع... وردية تغبر عليا.. العجب
كانت الطريق من الواد للقصر زربية وحدة.. مبهجة و الجو زوين.. السما صافية و خيوط الشمس كترقص فوق الوديان و العيون...و صوت الفراخ متناغم مع قدام الخيل للي غادة دقة دقة كتمايل شوية وقفو ونزل للي صايك الخيل كايشوف جذع شجرة قد ما يجعل الله... حابس الطريق فديك اللحظة كان ناصر راجع من الواد على عودو بعدما رجع لباسو لي متنكر بيه وهو يوقف حداهم ناصر: ياكما نعاونكم فشي حاجة نزلات نورية هي و مهدية من الكروسة وهو يقول ليهم ناصر غير دخلو من الشمس قاصحة عليكم... جاوبو اللي كان مكوّد الخيل وقاليه تحامينا عليه و ما قديناش نحركوه... نزل ناصر من على عودو و مشى هز الجذع فرمشة عين بوحدو و بَرْمو على الطريق.. بقا كلشي حال فمو من القوة للي عطاه الله.. شكروه وكملو طريقهم مهدية: شفتي يا لالة مللي كفض على درعينو كي مفتولين...هز الشجرة غا بصبع... لا خاصني نضور براسي ويلي ولا عندنا الزين فالقبيلة... الخير غا دايع وما عارفين ليه... ديك النعمة كاملة تبقا ضايعة
نورية : قولي تبارك الله.. شفتي الرجال كي دايرين... خاف علينا من الشمس و ما حتاج عوين حد قضى الغراض وزاد مع الطريق كيف النسمة ما طمع فينا ما تعفر.. ماشي بحالك حاضية ليا داك المصمصم قبيلة.. عاجبينو زغيباتو و نافخ علينا صدرو.. تقولي غا عتروس محصلاه شتا براير فوق شي جبل مهدية:لاواه وقداش قلتيها... ما قلتي طاوس ما قلتي غزال.. داك القلدة كلها معجبكش... وا عويناتي كيحبو الزين اش ندير فعينيا.. أنا هكا زهوانية... حتال رمضان ونصومهم معاية نورية: باز ليك .. شحال فرحت مللي راجل شامة سافر و غاتجي دوز معانا رمضان.. كتعمر عليا هي و وليداتها القصر مللي كتكون... رمضان هاد العام غايدوز عندي غزال ههه... اللمة ديال العائلة على طابلة الفطور مكاينش بحالها .. باراكة غير الغمة للي كاينة طول العام مهدية : خاصك تشوفي رمضان كيف كيدوز برا القصر ألالة ... السوق كيكون عامر و الخير مدفك... والجيران كي دَوْقو بعضياتهم من اللي كتب الله.. و مور الفطور الصبيان كيخرجو يلعبو تا يشبعو.. . و مينعسو تا يدوز الطبّال فوقت السحور.. و صوت الهلاّل فالفجر كيكون حلو... وصلات الكروسة للقصر و نزلات نورية غادا لجناحها...و الوصيفات تابعينها
القصر من برا البني ديالو عاطي للعين و ما ليه مثيل فالبلدان.. ومن الداخل كبير ما كبير غير الله و عامر جرادي... جرادي السلطانات بوحدهم و حديقة السلطان الخاصة بوحدها.. الكثير من الخصات... يرويو العيون العطشانة للخضورة و الورد فايح فاللوان و الأشكال..وسقف بيوتو عاليا.. من العود المنقوش و حيوطو من الزليج البلدي الحر... كلشي فيه كيبري إلا قلوب ماليه
بقات غادة و كضحك مع مهدية حتى خرجات ف الباهي و ناصر لي سبقهم.. . زعما (سي الطاهر) يالله غادا تخنزر وتجمع الضحكة وهي تنغزها مهدية.. رسمات تبسيمة مغشوشة على وجها و أمرات باقي الوصيفات يمشيو
#يتبع.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
