🏹سهم الغرام🏹
✍️بقلم: راضية عابل
✨الجزء 20✨
فالسوق كانت مرا لابسة سلهام وملثمة واقفة فمحال ديال الحرير دايرا راسها كتقلب فجودة الثوب.. وقف بعيد منها راجل عاطيها بالضهر
****: بلاما دوري.. رآه حطيت ليك الأمانة تحت الثوب الثالث فصف الحرير الحمر.. لوحي الفلوس فالكروسة للي غادوز من حداك مللي تخرجي من المحال
و فرمشة عين طار تقول الأرض سرطاتو
هزات المرا شغلها وهي كاتلفت شمال و يمين.. خباتو تحت شمارها وقادات سلهامها و خرجات.. اول كروسة بانت ليها لاحت فيها كموسة ديال الفلوس.. ومشات بخطاوي زربانا من السوق تقول شي حد تابعها
*****************
دخلات شامة لجناح نورية لي كانت ناعسة كيف شي ملاك.. سبحان اللي صورها.. الفم مرسوم.. و الحنيكات حمرين عكري منهم.. والسالف طايح على السرير رطب حرير..نسجي منو قفطان ويشيط الخير
شامة: (جرات الغطا على نورية غير بالمهل) صباح النور لالة نورية.. نوارة القصر.. اليوم النهار اللول فرمضان ناوية دوزيه فالنعاس.. فيقي باغة نتكلم معاك
نورية: صباح النور.. رآه مجاني نعاس بالليل داكشي لاش تعطلت..
شامة: جاك النعاس أنا ما جاني... هاي هاي هاااي... الحب و ما يدير.. شكون هادا لي طير النوم من هاد العوينات الفاتنات
نورية: يهديك الله.. مكاين والو من هادشي... غير رجلي كانت ضاراني وصافي
شامة: أمممم... وا خلينا من هادشي.. نوضي نهضر معاك
نورية :(ناضت وهي كتحك عينيها وتقاد شعرها).. خبار الخير
شامة: ما عجباتنيش الحالة للي لقيت عليها با.. غادي وكيضعاف و خاطرو ضياقت.. عاودي ليا ياكما بيه شي علة ولا شي هم شاغل بالو
نورية: الله يهديك أ شامة هادشي وكان للي مفيقاني عليه.. وراك فينما كاتجي كاتقولي ليا نفس الهضرة.. رآه غير البعد كيخليك مللي تجي يبان ليك الواحد تبدل
شامة: معرفتش.. هاد المرة حاسة بللي بيه شي حاجة
نورية: نوضي يا الهبيلة.. شغادي يكون عندو وهو ضاير بيه ميات حكيم.. و حنا ديما قبالتو.. و الخدم كيخدموه الليل قبل النهار.. وراك عارفة مولاي لكانت شي حاجة كايخوي عليا قلبو
شامة: وراه لداكشي خاطري مهنانيش و جيت نسولك ليكون قالك شي حاجة
نورية: مالكي غادا توسوسيني.. كون راه باغي يتزوج هههه
شامة: حتى شاب عاد علقو لو حجاب... كون عينو فالزواج كون دارها مللي كان مزال شباب.. وزايدون الحريم للي فالقصر حتى وحدة ما تحمر الوجه
نورية:و من امتى السلطان كيختار سلطانتو من الجواري.. مولاي كون عينو للزواج كون خدا خالتي ذهبية للي من حسبو و نسبو.. هو من بعد مي حرم العيالات
شامة: نسيتي ليامات للي كان ولاّ باغي للي يخلفو فالعرش او ولاو الحريم داخلين خارجين للقصر
نورية: و كنا صغار ديك الساعة.. تا نتي أ شامة الله يهديك كاتعقلي على شي حوايج بّا براسو يكون نساهم
صفية: هاي هاي.. الخواتات الحنينات.. مجمعات بلا بيا ايوا الغدر هذا
نورية: على من امتى نتي كتشاركي معانا اللغا و الكلام
صفية: ايوا هانا جيت مالكي رمضان هذا حتى هو غادي نتناكرو فيه
شامة: العجب هذا.. مات شي حمار فالدوار
صفية: نمشي بحالي يمكن.. للي درتو ما عاجب.. ترضى العين يغضب الحاجب
نورية: لاواه لاواه.. أجي ونتي غير على سبة.. جلسي نجمعو شوية
بقاو كلام يجبد كلام.. قولها وضحك عليها حتى جبدات صفية موضوع ناصر
🌙#يتبع..... 🌙
أنت تقرأ
سهم الغرام
Tiểu thuyết Lịch sửفراشي النوم جفاه و طابو جناب الليالي حتى طرزتي معاني العشق فظلام ديجاني
