سهم الغرام

سهم الغرام 🤍 الجزء 32

🏹سهم الغرام🏹
بقلم:راضية عابل ✍️

✨ الجزء 32✨
ديك الليلة ما باتش ناصر فالقصر...بات جنب الواد.. الليل كُلّو هو  يفكر ويخمم حتى قرب الفجر عاد داه النعاس... فاق الصباح على صوت النسا كيصبنو  و ينشرو فوق الصخر.. لقا عودو مبعد شوية مشا جيهتو حتى وقفات عليه  مرا لابسة حايك كحل و معكزة على عصا  كانت هي الواشمة
الواشمة : مهموم و ضاقت بيك الدنيا.. ما تغركش رآها فانية.. دابا تديهم كيفما دآت للي قبلهم.. لوح حزانك فهاد الواد عاد سير أ وليدي وتسنّا  فرج الله ، رآه قريب
(بقا ناصر كيشوف فيها وما عندو كانة يتكلم لا معاها ولا مع غيرها)

الواشمة:كل سلطان حكامو بوحدو و العدل تباع و تشرى فسوق الدلالة
و كل طمّاع ما بلغ مرادو حيت تبع طريق الجهالة
باب التار سدو بقفل من حديد.. قبل لا توحل وما تلقا مقالة
لا تولي كيفهم بعد ما عيبتيهم تتعاب  و يصغار لك الشان
و تظلم عباد ذنبهم تبلاو بالغرام وعشش ليهم فالوجدان
المخفية فعمق القلب ما لك عليها سلطان أولد السلطان
المخفية فعمق القلب ما لك عليها سلطان أولد السلطان

ومشات وخلاتو كيفكر فكلامها... ركب على عودو ومشا للقصر ، كيف دخل لجناحو لقا نورية.. غير شافتو طارت عليه بتعنيقة

نورية: حرام عليك تخللي بالي مشغول من جيهتك.. مغمضش ليا جفن البارح... الباهي ما خلا فين قلب عليك... خفت يكونو غير تلقاو ليك القطاطعية ولا مشيتي بلاما تقولها ليا

طلعات ريحة شعرها مع نيفو و خلاتو هايم.. ديك الضمة للي دايرا ليه خفات عليه شوية حر دفين بين ضلوعو... بقا تيقول فخاطرو.. نتي مالك ذنب.. غير غاتمشي بين الرجلين.. ما بغيتش نفطر قلبك كيما قلبي خلاوه دامي.. ولايني الغالب الله جيتي فالطريق
ناصر: مشيت جبت ليك مكتوب من وردية.. باش يصفى بالك من جيهتها... حيت عرفتك غادا تكوني مشطونة عليها.. راه غادا تزوج الهادي.. هاد ليام

يالله كيف رخات يديها منو و خدات المكتوب دخل الباهي
الباهي: نورية شفتك مْبكرا.. شكاديري هنا
نورية:عرفت بالك بقا مشغول على الطاهر جيت نشوف واش جا.. يالله لقيتيني غادا نصيفط للي يقولها ليك
الباهي:فين كنتي غابر.. مالك هاد ليام ماشي فكانتك.. راك مللي كتكون مقلق خاطري كيضيق عليا
نورية: عمري شفتك داير بالك مع شي حد ولا  خايف عليه كيما شفتك البارح.. وا باينة كتعز الطاهر نييت
الباهي: ما وليت كنرتاح غير معاه.. رفاقتو جميلة و الجلسة معاه نزاهة.. ياكما يصحابلك قلبي من الحجر.. رآه غير ما عارفانيش مزيان... ما عارفاش الباهي الحنين
ناصر: القلب عالقلب( قالها ليه فوق خاطرو)... وايلي عاد غاتحتاج تقولها ليا... لا مْحَنّة فوق محنتك 😏
الباهي : يالله معايا لجناحي بغيت نوريك شي حاجة.

.... يتبع