سهم الغرام

سهم الغرام 🤍 الجزء 26

🏹سهم الغرام 🏹
بقلم :راضية عابل ✍️

✨ الجزء26✨

فجناح نورية
مهدية: لالة جبت ليك ما يفرحك.. خبار على وردية
نورية: حلفي هي رجعو من السفر
مهدية: لا لالة.. مرسول سيفطو ليك السي الطاهر
نورية: ومالو ما جابو راسو.. ولا مشغول بحبيبة القلب لي مخلياه هايم و غارق تال شوشتو فالهم
مهدية؛ كيفاش
نورية: والو نساي عليا.. عارفة راسي الزهر ما عندي للي نزرعو ورد يطلع هندي..أري نشوف المكتوب
مهدية: أنا للي ما تفهمش ليا.. كيفاش وصل المكتوب للسي الطاهر.. إذن عارف طريق وردية..
نورية :سكتي خليني نقرا بعدا

*** سلام الله عليك أ سلطانة.. أنا وردية رسلت ليك باش ما تبقايش مشطونة عليا... لوكان تعرفي ما داز عليا يشيب راسك وتبكي الدم وتقولي ليا الله يا وردية وشحال بقيتي فيا
الحاصول.. أنا دابة على خير و مع الهادي... فالقريب غادي
نتلاقاو تاني.. منقدرش نبان هاد ليام حيت الباهي حالف فيا.. حضي منو وتاقاي شرو  رآه قاطع يدو من رحمة الله.. وما تجيبي سيرتي ولا سيرة هاد المرسول حتى يفرج الله
الطاهر رآه هو للي عتقني منو وماسايق حد الخبار...
مللي تسالي كلامي  حرقي المكتوب وحضيه حتى تاكلو النار

نورية: الطاهر.. يا الطاهر.. وراك شلا سرار...
مشات فداك الليل لجناحو و دخلات عليه بلا موجب شرع...  حقها القصر قصر باها وهو غير ضيف فيه.. لقاتو جالس فشرفة الجناح كيغني ومجايب خبار حتى وقفات عليه

🎶🎶🎶
قـولــوا للالــة غيثــة مــولاتـي
جــود بوصالك عــل العشيـق يـا أم الغيـث
قولـــوا لالة غيثـــة رانا بيــك كـنستغـــاث
روفي على فريد هواك وغيثيه
ياللِّـــي بهــواك ملكـتـيـــه
لاش على لجمار ارميتيه
يا دُرّة العواتق حبك وهواك ساكـن الـذَّات
الــذَّات فانيــة ما تقـــوى للتِّيـه
والعقــل بجمالك حــزتيـــه
بالبها والزيــن املكـتـيه

غير كمل الغنية وهو يحس بالغاشي معاه جبد سيفو وضار

نورية:(بقات ساهية فصوت الغنا للي جاها بحالة سامعاه من قبل).. ما وعات تا سمعات صوت السيف مللي تجبد
نورية؛  فالنهار تنغّمني بالكلام الموزون و بالليل تتغزل بغيري.. كي درتي ليها.. بادي بالغدر من اللول
ناصر شاف فيها مدهوش...
ناصر : كلامك غالط... غيثة سمية المرحومة مي و اليوم اللول فرمضان تفكرتها غير ظلمتيني.. رآه ما قصدتك وبحت ليك على للي فقلبي حتى كنت مأكد منو
نورية: (فرح قلبها.. واخة ما قنعاش بكلامو.. المهم زالت الغمة للي كانت خانقا جوفها) اه... سمح ليا مشى بالي بعيد.. أصلا ماشي شغلي.. أنا جيت غير نفهم. كيفاش وصلك مرسول وردية
ناصر: ياك نتي بغيتي خبار عليها وجبتها ليك.. لاش كتقلبي على الحجا منين جا
نورية: قالت ليا عتقتيها من الباهي... عاود ليا شنو وقع
ناصر: بلامة تشغلي راسك.. المهم هي مع الهادي  وراها بخير.. نساي عليك هادشي قبل ما تجبدي علينا نحل الباهي.. و تصرفي بحالة مقريتي مرسول ما وصلاتك خبار
نورية؛ صافي مللي غادا نتلاقاها.. غادا نعرف المخبي
عطاتو بالظهر وتمات غادة خارجة حتى شد فيها
ناصر: ديتيها زين و رزانة و نقولو حتى الزعامة...حيث ظاهر ليا ما كيخوفك لا سيف لا غيرو.. مللي جبدتو ما تحركاتش رمشة من عينيك.. ولا ياكما غالط
نورية: ايوا جرب و حكم
ناصر؛ نتي قد كلامك
نورية: السلطانة نورية عمرها ما رجعات فكلامها
ناصر: لا ربحتك..توللي ديالي
نورية؛( سلات منو السيف بلاما يشعر وحطاتو على عنقو وقالت ليه) أنا حرة غرة ما ديال حد.. نتا للي لا خسرتي غادي تحكم على راسك تبقى حياتك كاملة فظهري
نصل ناصر سيف كان معلق فالحيط وبداو يتبارزو
تدهش من القوة ديال نورية وكيفاش محكمة فالسيف و ما مخليا ليه فين يزهق حتى سخفاتو.. كون ما غفلها ورش عليها الورد للي كان مزين صينية النحاس كون ما قدرش يحيد منها السيف
حطو على عنقها وهي عاطياه بالظهر وهمس فودنيها وهو كيسمع صوت أنفاسها الزربانة
ناصر: الورد ما يليق ليه غير الورد..غلبتك أبنت السلطان.... (لاح سيفو وحيد ليها شي وردات كانو على لباسها وهو كيشوف فعينيها)
ناصر؛ 🎶🎶 النظرة فرموشك تعجبني وعيوني ما تعيا ولا تمل
لامن يعذر حالي لامن يرفق أ غزالي ويحن
تسنيت جوابك هادا شحال حتى قلتي كَلْ
روفي عليا أشهدة العيان بجواب يريح بالي لي جن

نورية شافت فيه والتبسيمة على وجها و قالت ليه
🎶🎶
زيان حالي وقلبي ما عاد خالي
نتا الغالب وانا المغلوبة هادي ما جات فبالي
جوارحي بيك وهنو و عاد مقامك عالي
جدت بالوصال وعهدي بيك تصون وصالي
نورية ليك من اليوم هادا عهد ما يبلى ولا يسالي

... يتبع