سهم الغرام

سهم الغرام 🤍 الجزء 35

🏹سهم الغرام 🏹
بقلم :راضية عابل✍️

✨الجزء 35✨
كان الباهي كيهضر مع واحد من رجالو.. ماعرفت شنو قالو ولاخر مشا بحالو... تفرتك المجمع ودخل كل واحد لجناحو يلبي رغبة عيونو فالنعاس... ها للي كيحلم بجنان الورد كيجري مع حبيبو  فيه.. ها للي الفزعات... كيقفزوه بسباب ذنوب ماضيه

والا مشينا للسوق غادي نلقاو السقيل.. و عتمة الليل خاصها غير مرود وتكحلي منها.... حس الغاشي ما كاينش العساس كان غارق فالنعاس باينة شارب شي حاجة دوخاتو... وحس التنوعير فالخفا عاطية ريحتو... رجال الباهي ما خاطياهم فياقة البال وهو واقف عليهم حسكة.. والسلاح كيخرج من واحد المحال... المكاحل والبارود والخناجر والسيوفة غير مشتتين كيعمروهم فخناشي ويحطو فكرارس قد السخط
الباهي: طلقونا قبل لا يتسلط علينا شي حد.. و حللو عينيكم مزيان
وبحالة علمو الله كان داك الملثم حاضيهم من واحد القنت
تسحب ورا جوج رجال  كانو حاضيين الكرارس نزل عليهم.. جرهم هو و واحد أو وقّف بلاصتهم جوج من للي معاه وكان كيدور على كل كروسة ينزل على مولاها للراس يدوخو ويطلع بلاصتو واحد من رجالو
الباهي: يالله خويو عليا من هنا ونتوما ديو السلاح للبلاصة المعلومة
رآه الطريق مشرية مكاين للي يوقف ليكم ولا يلاغيكم

فبلاصة معزولة وقف الملثم او وقفو رجالو يالله غايبداو ينزلو السلاح من الكرارس و يغبروه على عيون الغاشي و هوما يدور بيهم الباهي ورجالو.. وبداو يطيحو فيهم واحد بواحد حتى بقا غير الملثم بوحدو للي  شدوه جوج رجال مكتفينو من يديه وما مخلينوش يتحرك

الباهي: ايوا يا ناصر طحتي بين يدي...( نزل من فوق العود ودار  ضحكة ديال الطنز) ... جيتي لجهنم برجليك
هاد المرة حساباتك خرجو فالصو.. صحابلك كل مرة غادي تفلت من يدي حط  السيف على عنقو  وقرب  باش يحيد ليه اللثام، وهو يفك راسو من للي شادينو و بدا كايتقاتل معاهم.. وهو يقول ليهم الباهي خليوه ليا ما يدّخل حد
بدا الباهي والملثم مقاتلين وكل واحد فيهم بين على مهارتو فالسيف و قوتو  .. واحد ما صور من لآخر باش ينقي سنانو، ولاكن فلحظة غفلو الباهي و قدر يرميه فالارض ويثبتو و يالله غادي ينزل عليه وهو يحيد الملثم لثامو.... بقا الباهي  مبرّق عينيه ومصدوم من لي شافو

....يتبع...