✨ الجزء34✨ تسمع الغوات ديال ولاد شامة وهوما يمشيو كيجريو جيهتهم لقاوهم كانو باغين يتخباو فالجناح ولقاو مهدية ميتة, تقلب القصر سفاه على علاه... شحال غوتات نورية وشحال بكات بغات تحماق.. ناصر غير شاف المنظر تفكر قبيلتو و بقات فيه نورية حس بيها مقهورة نفس قهرتو حيت مهدية كانت بحال ختها, غمض ليها عينها وخرجها بقا يواسيها، الباهي بقا كيشوف فذهبية وصفية للي ما دارو حتى ردة فعل و عاق بللي هوما ورا هادشي غير من عينيهم.. جرهم لبعيد وسولهم وهوما يقولو ليه شنو كاين.. خرج عينيه فصفية وهي تقوليه.. غير مجرد تفكر تأذيني... غادي يوصل لكل واحد فالقصر الحجة على فعايلكم كاملة من الصغيرة حتال الكبيرة *********** دازت ليالي كحلة فالقصر... ما حيلتهم للسلطان للي مهلوك ما حيلتهم للرعب لي شاع فالقصر وهما معارفينش القتّال للي كيدور بيناتهم كيف الحنش وخايفين ليكون قاني على شي فريسة تاني.... ذهبية و الباهي بداو يفصلو فالحكام ودارو شرع يديهم ولايني غير بالقياس... كانت كل ليلة نورية كتنوض مفجوعة و ناصر كيمشي يبقا معاها بالتخبية على الباهي خايف لا يحصل... كان خايف عليها و مقادرش يخليها بوحدها.. ومللي كيشوفها وهي ناعسة كيبقا ساهي فيها وكيحس بالندامة حيت كيكذب عليها... هي ما عليها والو ذنبها عايشة وسط ذيابة كايفيق قبل من كلشي... يجي عندها يطمن عليها و فوقت الفطور يجي يفطّرها بزز وبالليل ملي ينعس كلشي يرجع يونسها ويتسامرو وهو كيسرح ليها فشعرها حتى كاديها عينيها كيغطيها عاد يمشي لجناحو.... الباهي خلاص صفية لقات منين تلوي ذراعو هو وذهبية وحرمات عليه يصد جيهة نورية ولا يطوف حتى بخيالها... كانو مسايسين معاها حتى يوصلو للي بغاو عاد يسوسوها
طوالت ليام و داز العيد ديال رمضان ماليه بنة فالقصر بسباب السلطان للي ما كيهزش الراس وفواحد الصباح من عند الله ناض صحة سلام.. حيت ذهبية كانت كدير ليه غير نقطة ديال السم قبل ما يمرض باغة تقتلو بالمهل وبلاما يبان أثر السم عليه ولايني مللي طاح ودارو بيه الحُكام.. قدرو يشافيوه ونقص السم من داتو، وهنا قرر الباهي يتحرك ماشي غادي يبقا كيحسب ليه ليام وهو غير ما زاد شد فحبل الدنيا بسنانو.... أول ليلة من بعد موت مهدية غادي يدار فرح فالقصر بسباب السلطان للي تشافا .. وأول ليلة غادا نورية تلوح لباس الحزن و تقاد حالتها شامة؛ وانا على الحبيبة ديالي ومزينك بنية... هاد العيون ما يستاهلو دميعة وحدة.. لبسي وتعطري ودعي ليها بالرحمة... كون كانت متبغيش تشوفك حزينة.. وفرحي ببّانا للي رجع من الموت اجي نقولك واش بغيتي الطاهر يسمح فيك شوفي كي وليتي هاملا راسك او وجهك ذبال... مسكين كان يبات حداك فايق خايف عليك و ما ياكل تا تاكلي و يجي يسولني شنو كاي ضحكك باش يخرجك من همك.. خليه يطير عقلو مللي يشوفك الليلة نورية:الله يرحمها كانت هي ونيسي فهاد القصر خلات بلاصتها كبيرة.. وحتى نتي للي كنتي معمرة عليا غادا تمشي لدارك الليلة مور اللامة وتخليني شامة: ما سخيتش بيك ألحبيبة ديالي.. رآه كنت معولة غير على 15 يوم اللولة حتى صدقت مخرجة رمضان.. ليام دغيا كطير
بدات العراضة للي كان فيها كبار التجار والعيان.. والناس فرحانين بسلطان بلادهم للي تشافا حيت بعد مرضو الباهي طغى عليهم و جار... ناصر: شفتك ما بقيتيش ضرتي بنورية ولا جبدتي ليا حسها... رمضان تسالا واش ما ناويش نخدم ليك شي حجاب يجيب ليها التمام الباهي: أودي جيتي معطل.. خللي هاد الموضوع تال من بعد نعاود ليك... نورية هاد الساعة ساد كتابها حيت ضامنها ليا وللي قرب من ساحتها نفنييه... ناصر: ايوا هي نمشي بحالي سلات ساعتي الباهي: وتقول واش تزعزع من القصر راك وليتي عويني والجايات كثر..شلا فاش غادي نعول عليك من هنا القدام... صافي سخيتي بينا فهاد اللحظة دخلات نورية وكان زينها فتان يسلب العقل ويخلي الواحد تالف حيران... حتى حد ما نزل عينو عليها ديك الليلة... ناصر كان غادي ياكلها بشوفاتو وملقا جهد كيفاش يوصل ليها حيت الباهي حاط العسة عليها مللي شافها قلبو دق و حس براسو ماكيبان ليه حد من غيرها وسط هاد الناس... و صفية كانت باغة طرطق
صفية: شافت فباها وقالت ليه... ايوا مللي با ناض صحة سلام غادي يكون الفرح الليلة فرحتين بغيت نقول ليك بللي الباهي باغي يطلب يدي للزواج منكم أمولاي بقا كلشي حال فمو.. شامة و نورية طاح ليهم العجب .. كيفاش هادشي وقع وهوما عارفين الباهي كيعشق تراب رجلين نورية .. باينة القضية فيها إن... وافق السلطان حيت مور هاد المرضة ولاّ باغي يأمن على بناتو... كلشي كان كيبارك للعرسان و صفية مقاداها فرحة حيت وصلات للي بغات صفية: مبروك علينا أ راجلي الباهي.. فزت بيك فاللخر شتي للي كيصبر كيْنول الباهي: من بعد ونتحاسب معاك على هاد الفعلة.. مبروك عليك غير نتي.. كاعما تسبقي الفرح بليلة.. فزتي بذاتي... وعمرك تفرحي بقلبي ولا تحلمي بيه يبغيك... ساكناه وحدة وراك عارفاها شكون هي الروح هي العقل.. سمح فيها ومشا وقف مع راجل من رجالو.. خلاها غادا طرطق وكون صابت طير على نورية تغززها بسنانها .... يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
