🏹سهم الغرام🏹
بقلم :راضية عابل ✍️
✨الجزء 24✨
مع أذان المغرب كانو الميادي مزوقين بكاع الماكل..كلشي كيشهي ...فوق طباسل الطوس الحر والجبانيات ديال العرعار فرق السلطان الصوم و بداو الماكلة.. ولاحظ السلطان غياب الطاهر(ناصر زعما) و صيفط وراه باش يجي يفطر معاهم..
اليازيد: ماشي حشومة صاحبك يفطر بوحدو أ الباهي.. من واجبك تكرم ضيافك.. ما عمرك عاودتي لينا عليه.... مينا بلاد جاي و اش حرفتو
الباهي : مبغاش يطفل عليكم أ مولاي.. (مالقا مايقول ليه وهو يقول) تاجر فالثوب أمولاي
دخل ناصر وكان ظاهر عليه مهموم وخاطرو مكدر.. لقى السلام وجلس قبالة نورية.. وحتى كلامو كان معدود وماكلتو قليلة
مدات ليه صفية التمر حيت كان جالس جنبها وقالت ليه رآه زولت ليك منو العظم تبسم ليها و سْها حتى عاودات كلامها.. خدا تمرة و عينيه مغرغرين، ونورية بحالة معجبهاش الحال حيت الفطور كلو وصفية كتحط ليه فالماكلة وتشكر فيه للسلطان..
ناصر : لاسمح ليا مولاي.. كانحس براسي عيان.. نعمة دايمة
حرك السلطان يدو زعما يمكن ليك تتفضل
الباهي حس بناصر ماشي حتال لهين وهو يتبعو.. لقاه جالس حدا الخصة ديال الما ودموعو فعينو
الباهي : مالك أ الطاهر معجبنيش حالك.. ياك لاباس
ناصر بزز باش جاوبو
ناصر:ما ماليش
الباهي: وا ميمكنش ونتا وجهك مجيف حتى الفطور ما فطرتي كيفنا
ناصر: والو رآه فايت قلت ليك فرمضان كنولي هاكة مزير بسباب للي معاية كيتسلسلو
الباهي: معرفتش.. حسيت بيك شي حاجة عكرات صفوك
ناصر: ما تشغلش بالك بيا.. شوية ونولي مزيان غير سير رآه اليوم ميعادنا مع لامين ديال التجار سبقني من بعد ونلحق عليك
بقا ناصر جالس جسدتو حاضرة والروح شاردة فيام زمان تفكر رمضان مع هلو وناسو كيف كان كيدوز ومشا بيه عقلو لقبيلتو وبقى سارح فليام الزينة مللي كانت الضحكة ما تخطاهش و البال كان هاني
(فلاش باك)
يامنة(ام ناصر؛) :ناصر شفت باك و سالم تعطلو
ناصر: هاوا شوية ويجي غايكونو فالطريق.. أنا صليت على برا الخيمة داكشي لاش سبقتهم.. جاي نجري لدوك الشهيوات للي ريحتهم كاسرة الخيمة
يامنة: فرق صيامك بتميرات بيدماا جاو أوليدي.. هاك
ناصر :(باس ليها يديها وشاف فيها وتبسم) لهلا يخطيك عليا حتى من التمر محيدا ليه العظم وموجداه ليا
يامنة: وعلى شحال عندي منك أ مرضي ميمتو
الغالي (بات ناصر) : هاي هاي الام و ولدها بداو بلا بينا أ سالم.. شوف كي سايرا توكل فيه.. تقول عندو عام
يامنة: لاواه أسيد الغالي... هاد العريش منك كي بغيتيني منتهلاش فعوينة وحدة للي بقات ليا.. يالله بداو فطوركم باسم الله
جلس سالم حدا ناصر وهو يقوليه بشوية أمضرا شقالت ليك
سالم: مد ليا نفطر بعدا مالك مزروب
ناصر: وا هضر أصاحبي رآه تسدات ليا الشهية
سالم: قالت ليك ميعادكم مور الفطور فالبلاصة المعلومة
ناصر؛ حلف بالله.. لهلا يخطيك أ سالم وخلاص... مدي مدي امي ديك المخمارة وديك الجبانية ديال العصيدة
سالم: ههه وا مسدودة ليك الشهية نيت
من ورا الفطور كان ناصر و غيثة جنب الواد مدرقين بصخرة وجالسين كيتعاودو
غيثة: شوية ونمشي رآه با لفاق وملقانيش.. حريرتي حريرة.. رآه مي مسكينة لي كاتغطي عليا
ناصر: وا هضري معاها تقوليه يقرب لينا العرس فعاوض هاد الحالة... كل مرة نشوفك قصم وتغبري عليا شهر... رآه كتخللي قلبي شحفان ويامي حزينة فبعدك
غيثة: وا غير صبر ما بقى قد للي فات و نعوضك فالجايات..
ناصر :هاكي هاد المنديل طرزاتو ليك عجوزتك فيه سميتك أ غيث قلبي
غيثة : لالة يامنة مسكينة...مكايناش شي بنت المرا للي غادا تكون عندها حماة بحالي... سلم ليا عليها.. توحشتها والله
********
الطاهر مالك شارد مهموم.. و ا الطاهر
ناصر: نعام أ غيثة
نورية: كيفاش غيثة.. شكون هاد غيثة
#يتبع
أنت تقرأ
سهم الغرام
Ficción históricaفراشي النوم جفاه و طابو جناب الليالي حتى طرزتي معاني العشق فظلام ديجاني
