سهم الغرام

سهم الغرام 🤍 الجزء 11

🏹سهم الغرام🏹
بقلم :راضية عابل ✍️

✨الجزء 11✨

السلطان : الباهي الشكاوي كترو عليك هاد ليام... عيقتي على التجار.. كل مرة منزل ضريبة جديدة بلاما تشاورني ما ترجع ليا...من وقتاش كيخرج شي مرسوم بلاما يدوز على عينيا بلاما نختم عليه بطابع الحكام... و الفلاحة مبقاو لاقيين ما ياكلو ولا يوكلو... رخف شوية ما بغينا فوضى العواشر هادي الناس مزيرين.. وهادي التالية ليك ما تعاودش دير غا للي قالها ليك راسك
و نقص شوية من دوك القصاير رآه ريحتك عطات...و  هملتي للي عليك..... متخلينيش نفكر نعزلك من بلاصتك.. واش رباعة ديال القطاطعية ما قدرتي تشدهم ليا.. كل مرة جايني  بسبة.. إلا مكنتيش قادر عليهم خليني نجيب لي يشدهم ليا فنهار
الباهي: ولايني أمولاي... الضرائب رآه هما باش كانوكلو الجيش ومنهم كانزيدو نصلحو البلاد
اليزيد: على انا جيش داوي واش حنا داخلين فحرب وما فراسيش... قول كتخسرهم فالقصاير... وانا إصلاح درتي هاد العام .. مللي شفتيني رخيت ليك طغيتي... تبدلتي وما بقاش حالك عاجبني

( ذهبية دخلات و هي تقاطع هضرتهم)
ذهبية  هي بنت عم اليزيد و أم الباهي..  جناح الحريم كلو  كايمشي على يديها و كدّخل  فكل كبيرة و صغيرة فالقصر و  مكاينش لي يهرس كلامها ولا يعاود معاها الهضرة و حتى  اليزيد كاي شاورها فشحال من حاجة... حاجة وحدة هي السلطانات بنات اليازيد للي ما ليها حكام عليهم ... أصلا حتى وحدة منهم ما كترتاح ليها من غير صفية حيت عينها فولدها كتقيل تبحلس عليها... ولكن كيف الباهي كيف مو باغين نورية.. الباهي باغيها حيت قلبو عشقها ليه.. و ذهبية باغاها حيت هي العزيزة عند باها و ما كيرفض ليها تا حاجة ولا ولات كنتها غادا تسهال ليها  الطريق لشحال من حاجة... الحاصول ليام جاية و غانعرفو حكاية كل واحد داخل هاد القصر و سرايرو و شنو مخبي

ذهبية: مال مولاي خاطرو خاسر... الباهي دير بكلام السلطان.. كلامي معاك من بعد.. سير شوف ما تقضي دابا

مللي مشى الباهي قالت ليه رخف عليه شوية رآه غرامو لنورية تلفو و قضى عليه.. هضر معاها تاني بلاك قلبها يلين.. حتا لين غادا تبقا بلا زواج رآه العمر غادي ويطير
اليزيد: كلشي بزز تال الزواج بالخاطر.. وراك عارفاني مانقدرش نقلق نورية للي قالتها هي للي تكون... المقسمة فالسما غا تكتاب ليه وليها

فهاد الوقيتة ناصر كان فجناح الباهي كيقلب على  شي حاجة للي تبين بللي هو كبير القطاطعية... الساعة ملقى والو من غير منديل غيثة يالله غادي يهزو و هو يدخل عليه الباهي
الباهي : شكادير هنا
ناصر ما عرف باش تبلى
ناصر: والو.. كنت كنبخر ليك فراشك باش تشد فيك عين المحبة
الباهي : ما شميت ريحة تا حاجة
ناصر: رآه عادي حيت الجواد للي كيبخرو ماشي أنا... متبقاش تسولني فخدمتي.. قول ليا واش عادي يهضر معاك السلطان مقنزع
الباهي: وراك قلتيها.. السلطان.. يعني هو حر يهضر كيف ما بغا.. وزايدون نتا باقي ما سخنتي بلاصتك بديتي تدخل فللي بعيد عليك.... فالقصر شوف بعينيك و فمك مزموم... حسن ما تجيبها فراسك
ناصر: أنا غير معجبنيش الحال.. كيبان ليا بحالا نتا للي عليك كلشي و هو مدي شنعة السلطان... نتا للي تستاهل داك العرش.. ونزيدك رآه نتا للي ملي تكون داوي معايا قاد فمك لا غضبو جوادي من كلامك شوف واش باقي نفعك بشي حاجة
بقى ناصر كينفخ للباهي راسو و يحرش فيه.. هو هادشي لي باغي غير يفتن بينهم
الباهي:(تزير  ولايني دار ودن ميكة حيت كون واحد خر غادي يدفنو فبلاصتو ولايني بان ليه هاد الفقيه لين قلب نورية عليه) كلامك صحيح أ سي الطاهر ولكن ماشي وقتو هادا( و حيد ليه المنديل من يدو)
ناصر: قول ليا شنو حكاية هاد المنديل
الباهي: موحال تعجبك قصتو... مولاتو رشاو عظامها.
وشبعو فيهم الكلاب
ناصر : (كتم غيظو) عجبني عطيه ليا
الباهي: غا طلب حاجة أخرى أ سي الطاهر.. هادا عندو ماليه غادين يجيو ليه طوال الزمان ولا قصار.. خلينا من ها د التخربيق، الليلة كاينة قصارة مبرعة و ضروري تمشي معاية.. نزهاو و تنشط شوية و ينشطو جوادك باش يقضيو ليا الغراض على حقو و طريقو.. وجد راسك  واحد الساعة وهانا معاك
ناصر : ملقى كيفاش يتهرب منو قاليه العشوب للي قلت ليك قبيلة خاصني نمشي ليهم
الباهي : وا جمعهم على خاطرك... الليل طويل وما كيحلا الصهير تال جوف الليل.. هاك هاد البركة و فطريقك شري ليك شي لباس وحيد عليك هاد الدرابل... .. 
ناصر: ما سولتكش بعدا لاش ديما داير هاد القناع مضرق نص وجهك.. واش شي توحيمة
الباهي:عينيه حمارو وظهر عليه العصاب... جاوب ناصر بصوت غليض...مخبي سباب عذابي... مضرك وجهي المشوه للي بسبابو  يمكن مبغاتنيش نورية... حرقت لي كانو سبابي  وسباب موت بآ و عذاب مّي ألف مرة و مبردش قلبي وما يبرد حتى نصفيها ليه...
ناصر: شكون هو؟
الباهي: بعيد عليك هادشي خليك غا معا جوادك و حروزك..هادي التالية  ما تعاودش تجبد ليا هاد السيرة.. نقص منك كثرة السوالات.. . سير قضي غراضك بلاما تعطل وتعطلني معاك
**********