سهم الغرام

سهم الغرام 🤍 الجزء 8

🏹سهم الغرام🏹
بقلم :راضية عابل ✍️

✨الجزء 8✨

(فجناح الأميرة لالة نورية بنت مولاي السلطان اليازيد)

كانت جالسة قبالة المراية كيف الغزالة .. سالفها واصل الأرض و ضحكتها تشافي العليل..كلامها خفيف على القلب.. و الشوفة فيها تفاجي الهموم... ضايرين بيها الوصيفات او وحدة منهم كتنقي التفاح وتمد ليها.. لوكان يشوف الباهي داك التفاح كايذاعب شفايفها وهي كتشكر فحلاوتو يقلع كل شجرة تفاح من البلاد و يحرّم ماكلتو
نورية:  (تكلمات وهي تشوف فمرايتها الذهبية) كي كانجيكم  أ البنات
وصيفتها مهدية: حْجاب الله عليك والحرمل خْضَر  وللي شافك وما صلى على النبي يعطيه الضُّرْ.. شهوة منك فهاد البلاد ما ليك مثيل لا فزين لا فقلبك الحنين..ما تحتاجيش تسولي على للي واضح وضوح الشمس و باين  أشميسة هاد القصر... االفم حمر ما يحتاج عكر والعيون شهدة العسل واتاها الكحل والخدود مطيبزات كيف  التفيفحات.. القد والقامة غزالة فقصر مولاي اليزيد
نورية:  ههه غزالة كاع... والصيادة الله يجيب... الزين ها هو والزهر لوكان نصيبو نسعاه، ما عمر شي حد حاشاه ليا
مهدية : وفين خليتي الباهي، يظل يعورط بيك مصاب تشوفي فيه
نورية: ذكرنا السمن و العسل تا هداك تحسبوه راجل.. أنا  بغيت للي يبغيني ماشي على زيني ولا سلطاني... بغيت للي يخليني تالفة مع جنابي و نبات بيه نهتهت... أربي فيين نلقاه
مهدية: وا هادشي عندك مزدوك الناس تقلب على الساهلة نتي باغة لي يشقلب ليك المخ.. قلبي السيرة ليسمعك الباهي ويتلفنا حنا نيت
(سرحات ليها شعرها و هي كتهضر) .. هملتي ألالة  هاد السالف... خاصني نمشي نوصي العطار يجمع ليا شي عشوب نوللي نشقق ليك بيهم شعرك... بالسيف ما يطيح شحال ما شاف الشمش...
لالة ما بقا والو لرمضان ايمتا غا نخرجو نشمو الهوا و نجمْعو مع البنات رآك مدة ما شفتي ضو سيدي ربي ما تبادلتي اللغا مع حد

نورية:( هضرات وتبسيمة خفيفة على داك الفيم اللي كيف الخاتم و قالت) .. أحياني عليك مللي كتقنطي.. كتوللي باغا تقبي الحيوط وربي كبير باش تخرجي... قولي ليا توحشتي عطيطيرك ماشي ديري السبة بشعري... الحمدلله ما خاصو خير
مهدية: ياك أ لالة حيت قلبي عليك...
نطقات وحدة من الوصيفات و بداو يضحكو على مهدية: وا قولي قلبك على العطيطير ههه... قولي لينا حنا هاد العشوب نجمعوهم ل لالة ولا باغة السبة يا العفيريتةهههه
مهدية: ما نقولش ليكم يا المسيميمات.. تكسابو بعدا الشعر باش تعرفو عشوبو.. يا المنتوفات يا  وجوه الدّْوازْ البايتْ يا محسوكات النص، تحركو من قدامي ولاّ قد القُب قد السطل
نورية:ههه.. لاواه لاواه يهديك الله أ مهدية لا تعصبيش
بصح واحد ليام كنتي كديري ليا شي عشوب ريحتهم على مزيناتها ونوضو ليا الخلفة...وقوّاو ليا الزغبة شنو فيهم
مهدية: والو غير كنسخن ألالة بنت سيدي زويتة بلدية ونلوح فيها التومة بجلودها و القرنفل و قشور اللوز و زريعة الكيف والزنجلان والزعتر واليازير و الخزامة وزريعة البصلة وشلا عشوب مشاو من بالي على سالفك مسبسب غير هكاك ألالة (شافت فالوصيفات وميقات)