سهم الغرام

سهم الغرام 🤍 الجزء 15

🏹سهم الغرام🏹
بقلم:راضية عابل

🌙الجزء15🌙

صبح الصباح وفتح الفتاح و الشمس لمعات خيوطها و شعاعها فجناح ناصر على وجه الباهي تلاح.. ناض من نعاسو شاد من راسو و بدا كيعيط... جعفااااار.. وجد ليا الحمام.. حتى لقا ناصر باعت قدامو
الباهي: شكادير هنا... معارفش بللي ممنوع يدخل عليا شي حد و أنا ناعس
ناصر: راك نتا لي ناعس فجناحي وعلى فراشي... نسيتي شوقع البارح... ومد ليه القناع للي كيغطي بيه النص فوجهو
الباهي بقا كيتفكر بشوية شنو وقع حتى جمع النوضة  ودرق وجهو.بيديه وبدا كيتحسس الحرقة للي فيه
الباهي: أول واحد يشوف عيبي من بعد مي لالة ذهبية هو نتا... وأول واحد يكشف سري من أيها الناس بللي أنا كبير القطاطعية هو نتا... و أول واحد نفتح ليه قلبي هو نتا... رجالي و ما كنتيقش فيهم ونتا جيتي غير البارح و عرفتي الصغيرة والكبيرة عليا... شنو سرك... بلاما نحس كنبغي نجلس معاك و نتسامر معاك.. ياكما شي حرز هادا دايرو ليا
قاطعو ناصر لي كان ساهي فوجهو و كي قول معا راسو معرفت فين فايت شايفك... مأكد شايفك فشي قنت قبل ما نجي هنا
ناصر: ياك وليتي كتقوليا صاحبي.. ايوا من اليوم سرارك عندي.. جلس دابة ونقوليك شنو وقع البارح
جوادي عرفو شكون كشف سر القافلة و الرياض... واحد من رجالك غضر بيك... معرفتوش بلحق عطاوني لجواد ايمارة... قالو ليا صبعو الكبير مقطوع.. راه مع رباعة الهادي وهو لي وراهم طريق الرياض.. وللي حرق الرياض ماشي الهادي واحد كان معاه وسميتو ناصر
الباهي : وصفاتو ليا كبيرة الغازيات شبهاتو ب باه.. كلامك على صح...  بلحاج (لي مقطوع ليه صبعو) دار السبة بللي مريض وما كملش معانا القصارة.. غدار كاع للي درت معاه ما كرش فيه... اليوم نفصل راسو على جسدتو فضل الهادي عليا.. بغيتي نزيد نتيق فيك كثر نتا للي غادي تقتل بلحاج.. باش نضمن ولاءك ليا..

واخا ناصر عمرو قتل شي حد بالحق فرح فخاطرو.. وأخيرا غادي يبدا سلسال الدم و غادي يحيد واحد من هاد الغْوَل  من طريقو
أمر الباهي رجالو يجيبو ليه بلحاج لبلاصة معزولة  وقف بعيد كيشوف فناصر كيعذب فيه.. كان كلو معري وفمو مسدود بكتانة بيضة ولات حمرة بالدم
قرب ناصر لعند ودنيه وقاليه... جاك  الموت أ ولد الحرام... طاح واحد منكم فيدي... نتا لي قتلتي سالم... ونتا لي طلقتي كلابك يتعداو على غيثة و نتا  اللول قصتيها أ الجّيفة... جاك ناصر اليوم وهو ينزل على الحْجَرْ ديالو طيرو بنفس الخنجر لي تقتل بيه سالم... وحسكو ليه من الجذر وقالو هادي لغيثة... بقا كيغوت  و كيترجاه بصوت ما مسموعش
وعاود طير ليه صبعو الكبير ورشك ليه الخنجر فقلبو و قاليه هادي ديال سالم... ومسح الخنجر وخباه
لاحوه رجال الباهي فحفرة و ردموها عليه وهو باقي كاينين

الباهي حط يدو على كتف ناصر و قاليه شفتك مغدد عليه كثر مني... هادشي يبقا هنا دفناه مع بلحاج
لالة ذهبية باغا تعرف عليك... ونيت اليوم كاينة واحد اللّامة فالقصر.. شامة خت نورية جات دوز معانا رمضان و فرحانين بيها.. نتا وليتي منا دابة.. نبغيك تصرف مع السلطان بلي يليق بمقامو... و تودد ليه باش يرضى عليك رآه اخر مرة شافك كان مقلق منك

#يتبع