سهم الغرام

سهم الغرام 🤍 الجزء 10

🏹سهم الغرام🏹
بقلم:راضية عابل✍️

✨الجزء10✨

ضحكات نورية فوجه الباهي غير بزز و قالت ليه
نورية: كي داير أ الباهي.. لباس عليك... شحال مشافوك عينيا.. فين غابر ما تسول ما طل
الباهي بقا غير حال فمو و مصدوم مافهم والو.. حيت عمر نورية فحياتها مضحكات معاه ولا شركات معاه اللغا و الكلام.. حتى الهضرة تلفات ليه و تزيزن
نورية: ما قلتيش ليا شكون هادا للي معاك.... مسكين كون ما هو كون مازال واحلين فالطريق حتى طيح علينا الظلمة.. 
الباهي :صاحبي.. كفاش شنو وقع ليكم.. واش لباس عليك أ نورية
نورية: لاباس الحمد الله.. كتير شي مللي شفتك
الباهي بالتلفة جر ناصر و مشى و سمح فنورية

نورية: (شافت نورية فمهدية وقالت ليها بشوية ) هادا مالو زاد
مهدية: وراك دوختيه مسكين مشفتيهش تلف فكلامو عاد يتفتف.. رآه قلت ليك غا سلمي عليه.. ونتى زدتي فيخرات... طمعيه وفاللخر توحلي معاه.. بقا فيا.. واخا قاصح وسليط مع الناس.. قدامك كيذوب.. باينة باغيك  من قليبو بصح
نورية: تبغيه لفعة تلوى عليه... حال الله بيني وبينو.. غير نعرف خبار وردية و نسوسو سوسة الحنبل
*****
الباهي : غير قول ليا شدرتي أ سي الطاهر...راه عمر نورية شافت فوجهي.. حتى جيتي نتا او ولات تضحك و تقول ليا السلام و تهضر معايا بكلام حلو
ناصر:  (ناصر براصو مافهم والو) ماشفتي مني والو باقي العاطي يعطي.. غيرصبر تا يفوت رمضان و نجيبها راكعة بين يديك.. مزيان مللي زدتي و خليتيها.. دفع كبير باش تبقا تابعاك
الباهي: (كيهضر وما قاداه فرحة)..للي قلتيها نديرها... غير نورية.. تولي ديالي ومن اليوم غير آمر .. أصلا معرفتش علاش مللي شفتك رتاحيت ليك.. و ما عمري تقت فشي حد أنا بزربة بحال لي تقت فيك.. ولايني اليوم بان ليا العربون
فالطريق وقف خادم على الباهي وقاليه باللي السلطان باغيه..
الباهي : سي الطاهر يالله معايا نعرفك على مولاي اليازيد... و من غيري أنا و رجالي تا حد فالقصر ما نبغيه يعرفك فقيه... نتا غير صاحبي وجاي لعندي
ناصر: كون هاني سرك فبير

دخل الباهي و ناصر لصالة واسعة دات جهد النص فالقصر  فيها فراش يحير يوصفو اللسان ف الوسط كان عرش السلطان اليزيد... غير وقفو قدامو  تحنا الباهي راكع و باس يد اليزيد وقاليه الله يطول لينا عمرك أمولاي ... أما ناصر دار يدو على صدرو و حنا راسو شوية... زعما لقا التحية كيف عادتهم فالقبايل.. بقا اليزيد كيشوف فيه و كيقول فنفسو شكون هادا للي سلم عليا بهاد البرودة

الباهي: مولاي هادا صاحبي..جا يدوز معايا شي يامات...
قاطعو اليازيد: ايوا علم ضيافك السلام للي يليق بمقامنا.. أما نقيب الدجاج معدنا منديرو بيه.... على أيٍّ بغيتك فموضوع بوحدنا... خلي صاحبك يمشي يرتاح
ناصر : شاف فالباهي وهمس ليه بللي غادي يجمع شي عشوب

#يتبع