سهم الغرام

سهم الغرام 🤍 الجزء 31

🏹سهم الغرام🏹
بقلم :راضية عابل ✍️

✨الجزء 31✨
ناصر داز على ودنيه حديث ذهبية و الباهي وبقا غير مصدوم من شّي للي سمع... كيفاش الغالي باه هو خو السلطان
يعني كون مكادوش ليه كان دابة هو غادي يكون بلاصة اليزيد.. بلاما يفكر هز عودو و شد الطريق عند الهادي قبل ما يطيّح شي روح... فاش وصل عندو عاود ليه كاع للي سمع...كل نهار كايعرف سر مدفون فركاني هاد القصر
*******
الهادي: هادي هي حالة القصور مخبية شلا سرار...حتى حاجة ما غريبة على الباهي و مو و زيد عليهم دابا حتى السلطان للي هو ذيب مغلف بصوف نعجة
ناصر: قتلو جدي و قتلو مي و با و قتلو  قبيلتي ودابة طامعين يقتلو اليازيد و يتولاو الحكام... واش القتيلة كتمشي فدمهم ،واخة القتيلة قليلة فحق واحد قتل باه بدم بارد.. واش أنا جاي ننتاقم من واحد صدقت ف قصر على قدو...ولقيتهم كثر مني شي ما حامل شي
الهادي: (شد فيه و قاليه تهدن) كلشي غادي نحلوه بالعقل.. خليهم يقتلوه حنا مالنا... ياك المهم الباهي تايق فيك.. غادي تتهنا من اليزيد و تبقا ليك ذهبية نلقاو ليها شي تصريفة أما الباهي لقينا منين نشدوه.. و حالف فيه على ما دوزو على وردية و عائلتها لي رزاوها فيها تا نخليه يبخ الدم
 
وردية: السلام خويا ناصر... سمح ليا قجرت عليك... بغيتك تسلم هاد المرسول لنورية... غايكون بالها مشوش عليا...
الهادي: ايمتى لحقتي تكتبي هاد المرسول وباش عرفتي ناصر هنا
وردية؛ غير شفت عودو مشيت كتبتو بالخف.. مالك على هاد السوالات
الهادي: اراي ألالة هاد المرسول نشوفو شفيه...
وردية: ويلي يا الهادي باغي تقرا شنو كتبت... فيه مسايل العيالات شوصلك ليهم..  و باغا نعلمها بعرسنا
الهادي: (شاف فناصر وحدر راسو) واخا ماشي وقت هاد الهضرة... غادي نتزوجو أنا و وردية... هي ما بقا ليها حد و ما لايقاش تبقا هنا و حنا مجامعانا تا حاجة.. كنت ناوي تال غدة و نعلمك
ناصر: الله يكمل بالخير( زير عليه قلبو و حس بغصة خانقاه.. تفكر غيثة للي ماتت عروسة)... ما تفكرش ليا... عيش حياتك أ صاحبي رآه ما كاين غير الموت كاتسارا... مكنعرفوها امتى  تخطف حبابنا من قدام عينينا (خدا منها المرسول ورجع بحالو)
********
وردية: شحال عز عليا ناصر ألهادي... قصتو قصة... كيفاش حتى باقي واقف على رجليه العجب... دابة كون قتلوني ليك كنتي غادي تصبر بحالو و تاخد ليا حقي
وقف الهادي من مكانو وجا عند وردية لي كانت كاتهضر معاه و هي كتلعب فعنقها بريشة طاوس... حيد ليها الريشة وشد فخصلة من شعرها و قالها بصوت حنين ما كايتكلم بيه غير معاها
الهادي: أخر مرا تجبدي ليا سيرة الموت.. هو رآه صبر ومازال صابر.. أنا تقيسك شعرة و ضرك نشرّبهم العلقم ونحرّم النوم من عيونهم.. قولي كلام زين ولا خير لك سكتي... نتي هي روح راحتي و شفارك هوما علتي ...  و عُنقك البلاّر غيرو ما يخمَّد نار ليعْتي... ياك كانقوليك ديما ما تبقايش تلعبي فعنقك بريش الطوس ولا غانصدق مريش كل طاوس زاهي بلوانو فهاد البلاد
وردية: ههه ايوا الله يستر غرتي من ريشة أ الهبيل.. اتولفني هاد الكلام الموزون و القوافي و هاد الخنات وتوحل معايا من بعد.. ونتْغر
الهادي:ايوا للي رما سفينتو فبحر الغرام بحالي  ما هموه مواجو .. مادام بلغ جواهرو .. والزين المغرور أ غزالي صيفتو مسرار
وردية: هي دابا أنا مسرارة
الهادي: الزين تفرّق من عندك أ لالة البنات
وردية:ههه  و خليني نمشي و رتاح ليك شوية..
الهادي: تباتي فراحة الله
بقا حاضيها حتى دخلات لخيمتها و سدات عليها وهو يرجع لفراشو حط الريشة تحت راسو وغمض عينيه

... يتبع...