سهم الغرام

سهم الغرام 🤍 الجزء 21

🏹سهم الغرام🏹
بقلم:راضية عابل ✍️

✨الجزء 21✨

صفية : ايوا اش طرا حتى زمانك ما صايمش معاك أ شامة هاد رمضان
شامة: غير 15يوم اللولة.. غير سكتي قلبي كاي فدفد عليه
صفية:ايوا الله يجيب للي يفدفد قلبو علينا تا حنا... ونتي أ نورية زعما ما عاجبك حد ما حاطة العين
نورية: حاطة الودن.. باز بان ليك شي حد يحمر الوجه فهاد البلاد  الزينة
صفية: غير عقلي غادا تبقاي تتعززي حتى غايجيك شي مْعَمّش ما يحشم ما يرمش
شامة: حرام عليك شلا باش فايلتي عليها... هاد الزين كولو يديه معمش..
صفية: اممم ايوا للي شافها داك النهار كتسرق الشويفات فداك السيهم الطاهر مللي جيتي.. يقول غير بيناتهم شي حاجة.. أما خلاص هو مللي جا هازها كان باين خايف عليها واقيلة الزغبي طاح علا شوشتو فيها ههه
شامة: وا هداي عليا حتال هاد الشي ما مفراسيش... ايوا كملي ههه
نورية: وا شحال فيك منو.. يا ختي غير قولي ليا كي كاديري ليها خبارات الدنيا والدين كطيحي عليهم..نوضي نوضي  كتحلمي الحلمة و تيقيها.. فين كنعرف طاسيلتو.. و أصلا كاع للي فيه ريحة الباهي مانقربو ما نصد جيهتو
صفية: وعلى مالو.. غا صاحبو.. وزايدون هضرتنا تبقا هنا.. يمشي يكون عينو فيك نيت ويصدق الباهي جابدهم  ليه.. و بعدا أنا جاني زين و طولة وتجريدة.... و القامة عالية ما خلا والو للنخلة و الدالية.. وظاهر بخيرو وخميرو.. المحنة باينة والرجلة كاينة
شامة:. مالنا تا نتي غانخرجو نبرحو بالهضرة... ايوا لكان يستاهلك علاش لا.. حتى لاين غادا تبقاي سادة داك القليب
نورية: شفتكم ضورتوني..مشيتو بعييد بهضرتكم.. نوضو من البهلان
( دخلات عليهم مهدية )
مهدية : يسعد صباحكم أ لالة.. و يدخل عليكم مولانا هاد النهار بالصحة والسلامة و تصوموا وتعاودو.. قالت ليكم لالة ذهبية شرفوها فقبة الحريم.. باش تختارو الثواب لي رسلو التجار مع السي الطاهر
شافو  السلطانات فبعضياتهم وتغامزو على نورية و طلقوها بضحكة.. ذكرنا السمن والعسل حضر عريسنا وتكسل هههه ها فالك جا تال عندك.. ناضوا سبقو نورية بيدما وجدات راسها
ضارو بيها الوصيفات لبسوها قفطان فالحجري منبت بالجوهر الحر.. وزينوها وعطروها بالزهر..وقصدو معاها قبة الحريم.. هي غادا وهوما تابعينها
وصلات نورية لقات السلطانات فالقبة وضايرين بيهم حريم القصر كاملات خدم و جواري.. كلشي حاني الراس فحضرة ذهبية وتقول واش الذبانة تزنزن.. مزيرا ليهم اللجام
جالسة ذهبية ومدورا بيها شامة و وليداتها و صفية و غير شافت نورية شارت ليها باش تجلس جنبها.. باركات ليها نورية العواشر وسلمات عليها
ذهبية: القبة نورات بزينة البنات.. سبحان من صورك.. الكمرة فوجهك مرسومة.. تسري الناظر فيك أبنتي الله يحجبك من عين الخلق
جاوباتها نورية وهي مزنكة..
نورية:عينيك أخالتي ذهبية للي منورين وكايشوفو كلشي ضاوي ولسانك الحلو كيرد الخايبة زينة
صفية كانت غادة طرطق بالفقصة... عارفاها كتشكرها حيت عينها فيها لولدها (بقات تقول فخاطرها.. مالي  الزهر طايح والبخت ما عندي ... باش هي حسن  مني...) معرفاتش بللي القلب الصافي كي كيل بالوافي

#يتبع