سهم الغرام

سهم الغرام 🤍 الجزء 22

🏹سهم الغرام 🏹
🌙بقلم :راضية عابل ✍️🌙

✨الجزء 22✨

ذهبية: سلطانات.. يمكن تكونو شفتو الطاهر من قبل..  صاحب سيد الباهي.. وكلفو مولاي يجيب لينا أحسن ما كاين فالسوق من ثواب و جواهر  عزلو وتخيرو... (أذنات للوصيفات باش يحطو الطيافر قدام السلطانات.. عاد يفرقوا على الجواري والخديمات )

كانت أنغام هادية ديال الملحون كاتغنا مونسة جلسة الحريم  وشي وصيفات كيتمايلو مع اللحن بغنج و دلال و السلطانات كل وحدة كتختار الحاجات للي يوالموها... أما الوصيفات كانو كيتخاطفو بلا حس حيث قليل فين كاتجيهم بحال هاد الوجيبة

ناصر(الطاهر) : عزلت ليكم غير النكعة ديال الحرير.. حيت عارفكم ذواقة و عشاقة و مقامكم أ لالة ما يليق بيه غير النفيس و الغالي

هزات نورية ثوب فالرمادي وحطاتو عليها وراتو لشامة ومع علات  عينها لقات ناصر كيسرق فيها الشويفات وهي تفكر كلام صفية و تدهشرات... حرك راسو بشوية زعمة مجاش معاك... وهي تحطو
وهزات واحد فالشيبي.. وراتو تاني لصفية وهو يحرك راسو زعم لا وهي تعللي حواجبها فيه و دورات وجها معفرة.. وهي تهز واحد فالحمر وهو يقول لها  ايوا هذا واتاك.. وهي تحطو حداها ودارت تبسيمة خفيفة
علا كلشي راسو فيه... وهو يشوف فذهبية وقالها هاد اللون واتاك أ مولاتي...... دخل الباهي وباس لذهبية على راسها
الباهي: لالة ذهبية.. سلطانتي الغالية.. عواشرك مبروكة.. ياكمة عياك الصيام
صفية: حنا حداها وغادا تعيا.. لعيات كتافنا وسادها
شاف فنورية وسولها على حوالها وهي تحرك راسها زعما رآها مزيان
ناصر همس للباهي فودنو وقالو ياك قلت ليك حاول تحسن عمالك مع صفية.. وجلس شد معاها شوية الحديث منها تكسبها لصفك منها تخللي ختها تغير
مشى الباهي جلس حداها وعطا بضهرو لنورية
الباهي:أنشوف الثواب للي ختاريتي... عندك الذوق.. مانتسالكشاي... حتى هاد الزرق غايواتيك.. أصلا للي لبستيه كايجي عليك
صفية مقداتها فرحة.. قلبها بدا  يترعد وطلعاتها العركة..
همسات مهدية لنورية: ايوا هانتي ليك هاد الباهي أ لالة كيتقلب كي تاتة ما عرفناه عينو فيك ولا فصفية  وهي لا خد حمر لا سوالف ملوية.. يشويني فيهم بجوج.. مللي ينوض تبعيه وتكلمي معاه
نورية: لهلا يوصل يديه لرجليه.. حتى كان يتبعني وليت غانتبع حرفتو..ونوللي مديليلة
مهدية: وا هي العالي.. هضري بشوية.. باغاه يرجع ليا ظهري رطب من كرشي... واش أنا قلت ليك تبعيه على سواد عينيه وا تبعيه سوليه على وردية
نورية: يمشي ينعس شعندو ما يقول كاع

خرج الباهي وناصر  من القبة غادين جيهت الخيل.. وهي  تنغز مهدية  نورية باش تبعهم 
شامة :مالك نضتي.. صافي غير داكشي لي ختاريتي
نورية: ها مهدية تكمل بلاصتي.. حرقني راسي

نورية : الباهي.. وقف نسولك عافاك
الباهي: زربان شوية.. من بعد
نورية: مالك مثقل راسك علينا.. ما موالفاش ليك.. بغيتك غير تعرف ليا شكون بغا يأذيني و كاي كيد ليا... داك النهار رشكو ليا برا  فعودي كنت غانموت يعلم الله أش مخبيين ليا تاني.. بلحق بان ليا ما كيهمكش أمري نمشي خير ليا.. البراني ولا ليا
شدها الباهي من يدها و وقفها
الباهي: كيفاش.. هادشي ما مفراسيش... واقيلة معارفاش معزتك عندي.. رآه نحرق الخضر واليابس... ومللي غادي نعرف مول الفعلة يا ويلو من عذابي... رآه كنبغيك أ نورية نتي للي محاساش بيا
نورية شافت السيد بدا يزرب عليها وهي تقلب الهضرة
نورية؛ كنبغي نسولك وكنسا.. قول ليا واحد صاحبتي وردية غبرات عليا.. وقالو ليا سافرت.. منلقااش خبارها عندك.. حيت قالو ليا رسلتي باها فشي خدمة.. قوللي لاين مشاو... توحشتها
الباهي غير سمع حس وردية تلف و قالها من بعد دابة مشغول... وقال لناصر يمشي يكمل شغلو مع لالاه ذهبية.... مللي مشا الباهي وقف ناصر مع نورية وتبادلو اللغا
ناصر: ايوا لجبت ليك خبار وردية أش يكون رباحي
نورية؛ هي راك عارف فينها.. قول وللي حب خاطرك فرمشة عين يحضر
ناصر: لا مازال.. بلحق كلشي فطريقك يهون.. وخا تكون خبارها فالسند ولا الهند نقطع على قبلك البحور.. غير نجود بوصالك وترضى عيونك عليا
نورية: علاش كتعامل معايا هكا.. شنو مرادك مني
ناصر: واش يبغي القلب العليل من غير دوا لسقامو ودوايا كلمة منك بيها يطيب
طرزتي معاني  العشق الكاويني فظلام ديجاني على ثوب قلبي وصورتك ما بغات عنو تغيب.. ونتي ما همك بهوايا ولا رافدا حر سيف الغرام لي فناني وخلاني فبلادي غريب
أنا من نهار شفتك قلبي مال ليك وما همي فالباهي ولا غيرو..لوكان يوقفو عليا جيوش نحاربهم على ودك
بقات نورية غير كتشوف فيه وعينيها كيبريو وقلبها كيقولها راك حتى نتي ملتي ليه وعقلها كيقولها ما تيقي دغيا بيه
حدرات راسها و تمت غادا وهو يوقفها...
ناصر: مللي تحطي خدك المسرار على وسادتك تفكري كلامي ودوريه فعقلك الرزين.. . وباشما حكم قلبك أنا راضي

#يتبع