داكشي... لي تافقو عليه هو للي كان... بقات شي ساعة للفجر.. خرج الباهي ورجالو من الرياض ملثمين دايرين قناع فالكحل على وجوههم.. غير فاتو الرياض دخل الهادي ومدخل وراه عجاجة الدنيا والدين.. كيقلب بلا عقل على وردية.. وتبعو ناصر مبغاش يخليه بوحدو... البنات بداو كيتغاوتو .. ملقاش حسها.. جمع الهادي البنات كاملات و سولهم حتى وحدة ما بغات تنطق.. وقف على كبيرتهم وشنق عليها حتى الدموع دازو من عينيها... الهادي: حيد لثامو و كلمها.. غادا تقولي فين وردية ولا اليوم نلوحك لنمورتي ينهشو لحمك حية.. ختاري هي غير عرفاتو الهادي نعتات بيديها فالخصة ديال الما.. بلاما تتردد..حيث كلشي عارفو شكا يسوا... وبقات حالة فمها فناصر.. . مفهمهاش الهادي.. وجرها صحة توريه طريق وردية قالت ليه هز المحبق الكبير لي جنب الخصة.. غير حركو الهادي من بلاصتو تفتحات طريق من الخصة و بانو شي درجات... هبط الهادي هو وياها... ولقى شلا بنات كانو محبوسات.. ماتو و رشاو عظامهم غير سمعات وردية صوتو بدات تعيط ليه.. شاف فعينيها الذابلات بحالا كيقول ليها سمحي ليا ما صنتكش.. وجه كلامو لكبيرة الغازيات وقال الهادي: دوي يا ليهودية... نقولو بايعة لحمك و متاجرة ببنات الليل واخة... ولايني تشطحو فوق مقابر دافنين فيها بنات بالحياة.. يعلم الله منين أصلهم وبنات من.. هادي ما يقدش عليها ابليس.. (شدها من شعرها ولواه على يدو و جرها عندو بالجهد .. مللي يجي الكلب لي كيقيل عند رجليك قولي ليه كان عليه يقصر الليلة فالغابة...و أثار الضرب للي فوردية غادي نجمعو ليك نتي فدقة وحدة... شعل ناصر العافية فالرياض و حما الهادي سيفو و طبعو على ذراع كبيرة الغازيات حتى الجلدة بقات لاصقة فيه و هز وردية و خرجو.. خلاوهم يتجاراو و ضايرين بكبيرتهم يتغاوتو ******* مشى ناصر للقصر و قبل بدل لباسو و رجع لحيتو .. دخل لجناحو و دار راسو ناعس حتى كيسمع الباهي داخل عليه مكشكش.. وباينة فيه سكر بالفقصة .. ناض ناصر داير راسو باقي مبوق
الباهي: توكض معايا السي الطاهر...نوض قول ليا كفاش تبدلات طريق القافلة... كيفاش تحرق الرياض... كيفاش لقى داك الكلب الرياض و أنا حياتي كلها حفيت باش نلقى وكرو وما عرفت ليه سبيل ناصر تزاد معاه الزايد فاللول و شد فخنجرو... صحاب ليه بللي الباهي كشفو حتى نطق الباهي الباهي: كيهضر وهو مدعدع.. فيق معايا وفيق ليا جنونك.. الليلة بغيت نعرف طريق الهادي ناصر : الصباح بعينيه... نكونو رجعنا لوعينا بجوج و نجبد ليك شنو فمصارن هاد الهادي أما دابا رآه ما مرصيش... غلطة صغيرة نولي حارك القصر بللي فيه ويتكشف سرنا بلحق ما نعاونك تا تفهمي شكون هاد الهادي وشنو مشكلتك معاه.. فتح ليا قلبك وديرني خوك
الباهي: نعاود ها ليك كيف الخرافة... أنا و الهادي كنا صحاب من الصغر..وكان عندي نمر مربيه مللي تزاد وكبر معايا مولفو و معوضني على با .. خرجنا الغابة واحد النهار كنتعلمو الرماية كنت أنا و الهادي و باه و خوه ومعايا النمر... كنت واقف مقابل مع الهادي مللي بدا باه كيوريه كيفاش ينيش.. النمر تلاح عليهم و كلا خو الهادي وباه.. و كاع النبايل لي كانو فيدو غرسهم الهادي فعنق النمر حتى طار ليه راسو.. . ومن ديك الليلة و أنا وياه عديان. بيني وبينك أنا لي أمرت النمر ياكلهم.. علاش هو يكون عندو باه و أنا لا... و الهادي بحالا عاق حيت كان عارف النمر مكيتحرك حتى كنأمرو... جرينا عليه من القبيلة... او ولا داير رباعة كيقطعو طريق قوافل القصر و باش نحاربو و نهرسو وليت كنقطع الطريق حتى أنا... بلحق الفرق بينا هو كان كي نتاقم مني أما أنا كنت كانتاقم من كاع الناس شتي أنا مريض.. مريض بنورية... مريض بمي لي باغا غير الجاه.. أنا وحش... لا أنا باقي داك الولد لي شاف نورية كتلعب مع الوصيفات وسط الورد وبغاها... و قتل الطاوس للي كان عزيز عليها... ما خصهاش تبغي من غيري.. كنمشي نقصر باش نساها... ولكن مكنقدرش.. سكنات روحي وعقلي.. أنا مريض بناصر (وبدا كيغوت بحر جهدو وكيضحك) .ناصر... شكون من غيرك كيشبه لباه.. حرقتي ليا الرياض... ههههه... كتلعب معايا.. حالف تا نجبدك واخة تكون فعمق البحر شاف فناصر وقاليه متخافش.. نتا.. نتا وليتي عزيز عليا... وغانديرك دراعي ليمن.. حيت نتا لي غاتجيب ليا نورية.. وتوريني طريق الهادي بقا كيهضر حتا نعس ف فراش ناصر ناصر : بقا كيشوف فيه... و قال فخاطرو... شنو دابة نقتلك ونتهنا منك ولكن مغايبردش خاطري... باقي عليك الحال... غادي نصفيها ليك بشوية... غانبدا نتلوى عليك بالمهل كي اللفعة حتى نعصرك بقا كيدوز ليه الخنجر على وجهو وفاللخر مشا نعس فالشرفة
#يتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
