سهم الغرام

سهم الغرام 🤍 الجزء 23

🏹سهم الغرام🏹
بقلم :راضية عابل ✍️

✨الجزء 23✨
مشات نورية وخطاويها متلفين  الطريق.. قصدات جناحها وهي طايرة فالسما... أول مرة تسمع كلام يهزها... واخة كانت كتسمعو من الباهي عمرو حرك فيها شي حاجة.. بقات كتكلم راسها وتقول.. كيفاش جا غير يام معدودة ولا كيبغيني...ولاش أنا زعما وماشي غيري
... شوية  وتبسمات تبسيمة عريضة وقالت... وهو الصارحة مسرار ويتبغا..وكنشوفو كنتلف..
دخلات عليها شامة على غفلة وهي تقول لها مالك مشيتي دغيا
نورية: جابك الله.. وا أجي نعاود ليك
شامة: هضري مالك... وجهك صفر و كترعدي
نورية: وقفني.. و قال ليا كلام يدوخ.. ما بقيت عارفة منقول قدامو  وتلف ليا العرف
شامة: شكون هو وشنو قال.. واش الباهي
نورية : لا
شامة؛ وا هضري ونتي مرعودة بحالا داخلاك الموت
نورية: الطاهر
شامة: ياربي تصبرني... مالو
نورية: قاليا كيبغيني وكايتسنا جوابي ليه
شامة : هادا مكان... تقولي وقف عليك عزراين... وجهك تخطف منو الدم و جسدتك ولات خشبة مثلجة... أ صكيعة... غدرك قليبك و تسلت ليه الغرام ونتي ما فهاد العلام
نورية: سيري كلاك.. أشمن غرام تا نتي
شامة:رآه كيبدا بالصفورية و الحمة الباردة بحال للي واقع ليك دركا... وا للي نقوليك هو للي كاين.. نقطع يدي لما كنتي تا نتي جوارحك مالو ليه وما جايبة خبار... صحاب لك مرديتش البال للثوب الحمر... همممم.... رآه داكشي كيجي بالمهل... قلبك تفتح ليه ومع الوقت عاد غادا تأكدي.. عطي لراسك حقو و متبقاش شادة داك القلب ومحرزاه.. رآه بان ليا ولد الناس... أجي شبان ليك نمشيو للسوق عند الواشمة.. رآها داية وجايبة فالزمان..وتعرف ليك العدو من الصديق... نسيتي شكون من غيرها شكر ليا مولا داري... وهضرتها كلها على حق
نورية: سيري من التخربيق... هي لي بقات ليا..... ولا عرفتي شنو ندير نيتي ونمشيو.. نوضي يالله
صفية: وا ديوني معاكم... وقولو ليا مال الثوب الحمر
شامة: باز ليك يخليها حرفة فيك... قاعيدتك هي قاعيدتك... ودنيك دلاو بقوة ما طالقاهم
صفية: ايوا ما كاتعاودوش ليا اللهم نجيب الخبارات بدراعي

فالسوق كان ناصر جالس ومحيد داكشي للي متنكر بيه.. تلاقا مع  الهادي فمجمع ديال أتاي.. الهادي كان متنكر الجن الزرق ما يعرفوش.... حيت لشافو شي حد مشى فيها.. جلسو كيشربو أتاي وخبرو بللي الباهي بدا يتاجر فالسلاح بالسر كيفما ظنو.. وباينة عليه كيوجد لشي حاجة..  وخاصو يعرف شنو هي ويعلمهم.. وعطاه مكتوب مصيفطاه وردية لنورية..بدا واحد من الرجال كيغني فالمجمع وهو يتفكر ناصر غيثة.. وناض مقلق خرج من المجمع باش يضربو البرد
مع الخرجة.. دخل فنورية للي كانت ملثمة باش ما يعرفها حد.. عثرات كون ما شدات فشامة كون طاحت على وجها
نورية:  (هضرات معاه وهي كتنفض جلايلها) غير بشوية عليك مالك كيف حلوف الغابة
ناصر : سمحي ليا أ الشريفة
نورية:(جاها الصوت ماشي غريب مللي هزات راسها هو يبان ليها هو كحلات بالعما..  شافت فخواتاتها وقالت ليهم الرزق قليل وطاحت فيه دبانة) .... شتو مللي تلاقيت بهاد وجه الويل غير يالله نرجعو باين العربون
ناصر:لسانك خاص للي يقطعو ليك.... غير كتزنزني بحال شنيولة.. ردي لسانك لحلقك شوية.. غادا تفركعي غا بوحدك.. قلنا ليك مشفناكش سمحي لينا اش بغا مزال
يالله غادا تشير عليه بللي فيديها طاح لثامها.. وهو يقول ليها
ناصر: هادي نتي ياربي السلامة...نهار كنشوفك نهاري ما كايطلع فيه ضو..
شامة: ايوا لاواه زدتي فيه... سير أودي قبل لا تجيبها فعضامك
جا الهادي وجرو دخلو للمجمع.. وخلاها كا تقلى بوحدها
شوية ناصر  ناض وبقا كيغني على حبيبتو للي خلاتو وما عادت ترجع
🎶🎶🎶🎶🎶🎶🎶🎶
حتى عاشق مسكين ما اسطاب منام ولا قوت
غير يشاهد الأريام كَيشاهد بيبان الموت
والزيـن على المملـوك ليس يـرثى
سلطان كَيجور ويعدل أيامه عطاته
وأنـــا فـســايـــــر أوقــــاتــــي
نسعى رضاه واقف فالباب ولا نقول ملــِّيت:
قولـــوا لالة غيثـــة رانا بيــك كـنستغـــاث
روفي على فريد هواك وغيثيه
ياللِّـــي بهــواك ملكـتـيـــه  لاش على لجمار ارميتيه
يا دُرّة العواتق حبك وهواك ساكـن الـذَّات
الــذَّات فانيــة ما تقـــوى للتِّيـه
والعقــل بجمالك حــزتيـــه
بالبها والزيــن املكـتـيه
بلطافـة و ظرافـة مع لباقـة واعقــل مثبوت
والطيبة و التمييز والحيا والزين المنعوت
ما كيفـك غيثــة يالريــم غيثــة
عـويتـقا لبيقـة مــن شافـك تاخـــذي بــذاتُــه
وأنـــت الســـالبــــة ذاتــــــــي

كانو السلطانات تما.. واقفات على الواشمة كيتسناو دورهم ونورية بقات بالغدايد دايرة بالها معا ناصر وسمعاتو مللي كان كيغني

نورية: واتاك غير الغنا نيت.. تجي معاك تشياخت جنس ناقص.. يخ على لويل

شافت الواشمة فالسلطانات وحسات بيهم بنات الهمة وماشي بنات القبايل.. بسطات يد نورية و شافت ليها فعينيها وقالت ليها
المخفية فعمق العيون ما ليك عليها سلطان دابا أبنت السلطان
نغام وتار قلبو قريبة و قلبك بدا يفارق وكارو
غرامو مع نور الفجر يجيك وتفشي عيونو كل سرارو
عشقكم غادي يرقّص الطير على الحصير
والحص يحدث مياه الوديان بغرام فاضت بيه جوارحك او وجدانو
ريحتو قريبة واخة ملامحو غريبة
رفاقتو طيبة واخة طريقو صعيبة
لا تحكري فاللي فات وللي جاي و كوني لبيبة
الهربان من يامو  مصيرو  يعود ليها ولهان
يذوق  العشق من صدرك وهو نشوان
قلبي على مفتاح قلبو وكوني نتي السجان
#يتبع