سهم الغرام

سهم الغرام 🤍 الجزء 45

سهم الغرام🏹
بقلم:راضية عابل ✍️

✨الجزء45✨

(فلاش باك)

فنص الليل هابطة ذهبية مع دروج الحبس بالنخوة .. هازة قنديل كيضوي غير عند الدرجة للي كتلوح فيها رجلها..لابسة قفطان كحل بسلهامو ،وقفات عند باب حبس اليازيد للي كان ناعس على الضص وموسد نعالتو.. اييه اليام مول التاج وكيحتاج.. للي يتيق فالزمان الدنيا دوارة لا تخليها تغرك تجيبك تال قدام العدو و تذلك
ذهبية: اليازيد..أ اليازيد نوض تسمع أخّر الخبار.. باركة عليك من الراحة
ناض عندها وهو ما قادش يتحكم فثقل رجليه للي فشلو بالجوع
اليزيد: شباغا عندي... جاية تشفاي ياللفعة مو سبع ريوس
ذهبية:  أوك على ريحة...حالتك تشفي العدو... شكون قال اليزيد للي كان يتوسد ريش النعام ينعس على نعالة خانزة.. وا سمع سمع ، على ماشي الطاهر صدق هو ناصر ولد خوك الغالي او التويمي ديال الباهي
اليزيد: شنو جاية تخربقي عليا فهاد الليل
ذهبية:كي شتي الباهي ماشي ولدي غير كنت كاذبة عليك... الباهي  سرقتو هادا شحال للغالي وحرقت قلبو عليه مللي حطيت بلاصتو ولدك  من الحرام مع خديمتك وصحابليه رآه ولدو  لي مات محروق
اليزيد: نتي شيطان فسيفة بنادم بلحق سري أنا لي تبعتك هانا كنخلص دابا.. قتلت با و شردت خويا خليتو حياتو كاملة هربان.. غادي نخرج من هنا ونقلب عليه نردو لقصرو للي خدينا منو...شنو ربحتي من هادشي لي درتي
ذهبية؛ انا شيطانة وسوست ليك ونتا تبعتيني.. ياك مبززتش عليك بعدا
نتوما للي رديتوني هاكا... باك مرحمش با وخلاه ديما اللور حتى مات من فقصتو وخوك حرق قلبي و روحي وا يجي يشوف ولادو دابا شدرت ليه فيهم... باغي ترجع خوك هههههه قول نصيفطك عندو لاخرة.. شنو ربحت... كويت قلب الخديمة للي دآت مني الراجل للي بغيت... ربحت دموعهم كل ليلة على كبدتهم... ربحت الجاه و السلطة وكنت رابحاك تحت سيطارتي.. وحرمتك من ولي العهد لي حياتك كلها ونتا تحلم بيه... وكل مرة كانت كتحمل شي جارية كنت كانكون سبابها تا كايموت للي فكرشها ،ربحت الحرب لي نوضت بين جوج خوت واحد فيهم قتل باه ومو و غادي يقتل خوه ههههه

اليزيد : مغاديش نخللي هادشي يوقع.. مللي غادي نخرج من هنا غادي نصلح كاع للي فسدتيه
ذهبية؛ ههههه هذا ما بقاك هنا تا يرشاو عظيماتك... لله يبيتك فراحة الله أ مولااااي اليازيد 

**********
وردية : ها هي دابا ما طالت حكام ما بقات حية... ما عاشت عيشة بحال الناس... لا تالي لا والي، عاشت وحيدة لا راجل فكتافها لا ولاد يهوسوها ويونسوها لا من يتراحم عليها.. ماتت موتة خيب منها ما كاين
الهادي:(شاف فيهم وقال) خاصني نلحق ناصر بلخف... رآه تبع الباهي يقتلو... على الله نوصل قبل لا يفوت الفوت
نورية؛ علاش أ با مهضرتيش مللي كان ناصر باقي هنا أديتيه فالصغر وتزيد تأذيه حتى فالكبر
اليزيد: رآه هداتني لهضرت تقتلكم ليا
امر الهادي رجالو يردو البال لنورية او وردية و ركب على عودو و تبع ناصر  وهي تبعو صفية

**********
فوق واحد الجرف  فطريق الغابة حدا شلال واكح...  تلوح منو صخرة تفرتت لرملة السما كانت عامرة نجوم و الكمرة مضوية المكان، كان الباهي واقف وطلق غوتة تهد الجبال
( وصل عليه ناصر  وتم غادي جيهتو)
ناصر: اليوم نصفيها ليك.. كون راجل و تقاتل معايا بلا سلاح
هبط على عودو وهو يتم جاي الباهي هاجم عليه ، تلاح عليه ناصر و بقاو مرمدين فالارض.. بداو كيضاربو.. مخلاش فيه ناصر العظم الصحيح برد فيه حر كل ما داز عليه
ناصر مع العصا للي عطا للباهي خلاه كيزحف على رجلو  ولايني غفلو الكافر بالله وجبد خنجر رشكو ليه فساقو وبقا كيتعافر باش يوقف.. فديك اللحظة مشا ناصر جاب سهامو ونيّش جيهة الباهي يالله غادا تجي نبالة فقلب الباهي وهي تفديه صفية... وجات الدقة فيها هي
الهادي وقف بيناتهم وبدا كيعاود ليهم ما قالت صفية و أكدو اليزيد وهوما محنيين على ركابيهم بقاو كيشوفو فبعضياتهم
، و الباهي داز قدامو الحلم للي كان مطير نعاسو وتفكر مللي كان ولد خمس سنين كيلعب مع خوه و يجريو من خيمة لخيمة وتفكر مو وباه وقبيلتو.. شحال كان ما كايتفرقش مع خوه ناصر جمع الوقفة  ودموعو نازلين و قال
الباهي : دابة عاد عرفت لاش كنت كنحس بيك قريب ليا ودغيا تقت فيك....... ههههههه.... ذهبية ماشي مي و ناصر للي كنت غادي نقتل طلع خويا ههههههه نورية كتبغي خويا و أنا قتلت مي و با بيديا
شاف فناصر و قاليه سمح ليا على كاع للي درت ليك... منقدرش نعيش بلا نورية و منقدرش  نشوفها معاك.. أصلا منستاهلش نعيش واخة تكون ليا
فديك اللحظة وصلات نورية مع وردية وشي رجال حيت مقدرش يصبرو بلاما يعرفو شنو واقع 
الباهي:(كان كيهضر وهو محني على ركابيه وفاشل) مزيان مللي جيتي.... نتي هي الحاجة الوحيدة للي صدقات حقيقية فحياتي... واخة عمرك كنتي ليا وعمرك بغيتيني... والله حتى بغيتك من قلبي... كون غير قبلتي بيا كنت نقدر نتبدّل
نورية: نسا دابة الماضي أ منصور و بدا صفحة جديدة مع خوك... سباب هادشي ماتت هي لي رباتك. على الكره ولكن فالأصل قلبك بحال قلب خوك بيض
الباهي: هههه منصور... نتي أول واحد نسمع منو سميتي الحقيقية... خرجات من فمك بحال العسل.... بصح أنورية قلبي بيض...( بغا ينوض وهو يطيح وجا بين يديها) ههه ممتيقش راسي بين يديك... لبغات تجي الموت دابا غير تجي عافاك قولي ليا مرة وحدة كنبغيك أ الباهي... شاف فيها بعين كلها حزن... مانستاهلش تقوليها حتى بالشفقة ياكي هه (ناض وقف  وهو كايضحك) ... ديتي كلشي أناصر... ديتي حب مي وبا.. ديتي طيبة القلب... ديتي حب الناس... و ديتي مني للي غلا من عينيا.. علاش

الهادي: كلنا غادين نساو للي داز... ما غانمشيو من هنا حتى تعانق نتا وخوك وتبداو صفحة جديدة
الباهي فتح يديه لخوه باش يعنقو يالله قرب منو ناصر وهو يقوليه سمح ليا و تلاح من الجرف
غوت ناصر لااااااااااااااا وهو ماد يديه جيهت خوه و طاح على ركابيه كيتحسر
كلهم قفزو و غمضو عينيهم من هول المنظر

يتبع......