سهم الغرام

سهم الغرام 🤍 الجزء 16

🏹 سهم الغرام🏹
✍️بقلم :راضية عابل

✨الجزء16✨

فالقصر  كلشي فرحان بالمجية ديال شامة.. كانو مجموعين فساحة الحريم..مفرشين الزرابي وحاطين الصواني ديال الفضة عامرة ماكلة ها الحلو ها المالح... وضاير بيهم الورد فكل مكان  ومن كاع اللوان.. والشجر مضلَّل عليهم و محرك بوراقو غربي خفيف
ذهبية: ايوا نورية سمعينا داك الصويت... ياك شامة عزيزة عليك.. فطريقها طربينا أ زينة الصوت والسمية
نورية ؛ هي للي ما تعاود أ خالتي ذهبية
بدات  نورية  كتشوف فشامة و تغني ليها و البنات شادين ليها الميزان.. إلا صفية لي كانت ساهية و باين عليها كتفكر فشي  حاجة
********"***

ناصر: منين جاي صوت الغنا
الباهي: هاذا صوت المطيرة النوم من عيني
جر الباهي ناصر و مشاو لجناح  ذهبية حيت كان كيطل على الساحة و بقاو كيسمعو لغنا نورية
الباهي: صوتها كيرد فيا الروح أ صاحبي... هي الوردة البيضة للي فحياتي المشوكة و المفرشة بالعافية

بقا ناصر كيشوف فنورية وكيتفكر غيثة و كيقول.. دابا نرزيك فيها كيما ترزيت فنوارة حياتي
🎼🎼🎼🎼🎼🎼🎼🎼🎼
نورية : ألالة  يما أجي عندي نقولك
ألالة يما خيتي جايا تزورنا
ألالة يما رشوها بالورد والزهر
ألالة يما حتى روايحها كل من شمها يتبهر
ألالة خيتي يشوفها المريض ينسى الضر
ألالة خيتي كي نشوفك يفرح قلبي يتبشر
ألالة خيتي عيونك شهدة  مراية  بالخير تهضر
  ألالة شامة مزينها جلسة معاك ولمة
ألالة خيتي فيك لميمة و خالتي و العمة
ألالة شامة مولانا يرعاك مسا و فجر
ألالة خيتي ليك غنيت ومعاك ناوية نسهر.

دارو على الصواني كياكلو وتفرقات اللامة
بقات نورية وشامة و وليداتها و مهدية ..
مهدية: العار ما غني لينا على داك لي شفنا فالواد
شامة: شكون هادا
نورية: شلا تا هاداك شان وهمة نتغنا بيه معرفت أش عجبكم فيه.. كان ولد الهم غادي يعوقني.. غني نتي نيت أمولات العطيطير الزقرام.. متفكرك حتى بتقيوتات هاد العواشر
مهدية: ياكي وليتي تقجمي بيا
نورية: وا نتي لي جبدتيني
مهدية: واجي نعاود ليك ألالة شامة... شفناه دخنا.. وحتى لالة نورية غي ما بغاش تبين
شامة: ايوا
...
فقبة الحكام كانت ذهبية واليازيد كيتناقشو فشكاوي التجار  للي مبقاوش بغاو يخلصو الجزيات.. بسباب الباهي .. و بسباب السوق للي طايح و السلعة ما مشياش ليهم... و القوافل للي تشكاو ماليها، حتى دخل الباهي وناصر عليهم ولقاو السلطان مكشكش
ناصر: لاسمح مولاي ليا نتكلم على حل لهاد القضية
ذهبية: من امتى  شكون من كان من الناس كيدخل فحديث السياد
اليازيد: خليه أ ذهبية ما تعرفي يفيدنا رايو و نطفيو هاد الغضاب ديال التجار... قبل ما تولي الفوضى.. ونوليو ضحكة بين البلدان... تكلم قول شنو عندك

#يتبع