سهم الغرام

سهم الغرام 🤍 الجزء الثاني 2

أ🏹سهم الغرام🏹
بقلم : راضية عابل✍️

✨الجزء 2✨

شد من راسو وجلس وسط القبيلة  ضايرين بيه الموتى فكل مكان دازت دقايق و هو باقي ما دخلات لراسو هاد الحالة للي  فيها شكون هادو للي هجمو على قبيلتو و صفاوها ليهم و علاش؟  شنو هاد الحاجة للي تخللي بنادم يموت ليه قلبو ويقتل بدم بارد؟ رجع بيه الزمان لليلة للي تقتل فيها خوه  نفس الحاجة طرات شعلات العافية فالقبيلة ولكن ما مات غير خوه ديك الليلة محروق و الحاجة للي بقات منو  و عرفوه بيها هي القلادة للي كانت فعنقو
كشاكشو خرجو جبد سيفو وبدا يضرب بيه للي جات قدامو حتى طاح على ركابيه مسند على السيف و دموعو روات التراب
مسحهم وهز راسو و عينيه عامرين كره وحقد تحرك بخطاوي ثقال و بدا يحفر فالأرض بحال المجنون دفن ناس قبيلتو و هلو
كانت جسدتو حاضرة و العقل غايب خسر كلشي بين ليلة ونهار, عطاهم العاهد باش ما يرتاح ففراشو حتى يقطع ريوس للي كانو سباب عذابهم و عذابو(ها هو لقا جواب للسؤال للي كان شاغل بالو ... التّار... هو الحاجة للي تخللي واحد يقتل بدم بارد، المنظر للي شاف فيه هلو وناسو خلا قلبو يموت  وتجي بلاصتو حجرة موحال تلين بعد لّي صرالو، جوارحو خواو من الرحمة و قلبو عمر بالحقد و عقلو بقى كيعاود حاجة وحدة، خاصك تاخد أ ناصر بتار قبيلتك و دمهم ما يمشيش باطل، هز للي يحتاج دارو فوق العود و خبا منديل  كانت فيه طرزة بسمية غيثة  فجيب حدا قلبو و خشا خنجر الحساب  فشكارتو و شد الطريق على عودو  لقبيلة ولاد عامر
الطريق كلها و هو كيتفكر والديه و غيثة للي عاش معاها يامات عمرو ينساهم و صاحبو للي عوضو على موت خوه
وكل مرة كيتفكر كيزيد كرهو للي قتلهم وكتزيد رغبتو باش يجيب حقهم بعدما كان فرحان وبالو مرتاح وهاني رجع  عامر غير بالكره وحالف يرجع دقتو... الدم بالدم

غادي ويسول وما صابْ راحة حتى وصل لقبيلة ولاد عامر ، جاتو مبدلة على قبيلتو لي كانت السكنة فيها من الخيام، هنا الناس عندهم حيوط ساترا عيوبهم  و حامية ظهورهم و بيبان  ما كتحل حتى يعرف مول الدار شكون للي ورا بابو ، نزل من فوق العود و شرب شي جغيمات ديال الما  ماشي حيت عطشان شربهم على الله ينقصو ليه من لهيب العافية للي شاعلة فجوفو
تم غادي و جار عودو وراه و حزانو قدامو سابقاه و عيونو قايدة فيهم جمرة مْلَهْلبَة مضيماه، شوية بانو ليه شي رجال مجموعين حدا باب قصدهم باش يسول على الهادي ولد معمر
ناصر : السلام عليكم أ سيادي.. سمحو ليا نسولكم
جاوبو واحد منهم للي كان باين عليه الوقار
***: مرحبا أ وليدي ولايني رآه دخل ميقات صلاة العشا توضا و دخل صلي معانا و سول ديك الساعة على مرادك
*******
***:الله يقبل، ظاهر عليك براني وغريب علينا ومن حالتك باين تعدبتي باش وصلتي لقبيلتنا، قول ليا أ وليدي لمن جاي
ناصر :أنا أ الشريف جاي من قبيلة بعيدة قاصد الهادي ولد معمر
الراجل: الله يا وليدي و اش وصلك لداك صكع ليام قاطع الطرقان  واش كتعرفو ولا كيجيك شي حاجة؟
ناصر: نعتوه ليا شي ناس باش يعرف ليا مول هاد الخنجر
الراجل : هو خدمتو يصنع السلاح  على ما فعلمي وما يخللي قافلة توصل سالمة لماليها داير كيف الخيال  ما عمر شي حد قدر يشدو حارو معاه المخزن، حتى كيقولو شدوه وتقول الأرض والداه وكترجع تسرطو لكرشها
خبي داك الشي، رآه بيت الله هادا ما كيتجبد فيه لا خنجر ولا  حجر و الحيوط ليها ودنين، تبعني
خرج ناصر مع الراجل اللي كان هو فقيه الجامع

#يتبع...🌙

✨️ساهي فحالك، عادم وفاني
تقول لمعذبك نتا مرتاح البال هاني
وانا بمرار ظلمك نعاني
يجيك يوم ودوق من علقم كيساني✨️