#ثمن_الخطايا
#الحلقة_1
#معليش عندي ملاحظة قبل نبدا في الرواية الصورة اللي تحت 👇مش عشوائية حاولت انجيب شخصيات قريبة بالشكل لابطال الرواية يعني تقدري اتخيلي هذا شكلهم
وبطلة الرواية هي اللي حتحكي الرواية
**************
أسمي بسمة عمر خليفة مواليد 1998 عايشة مع بابا وماما ....بابا اسمه عمر...و ماما اسمها عائشة وعندي خمس اخوة بنتيين وثلاثة اولاد
خويا الكبير اسمه بشير م89 متزوج وزوجته اسمها سلوى..عنده بنتيين ثلاث اسنين اسيل وسنة ونص سما
بعدها خوي بدر م 92 عازب وطبعه غريب واعر وعصبي انتعرفوا عليه في الاحداث
أختي بشرى م 95 متخرجة من الجامعة قسم قانون لكن تشتغل في مدرسة بالعقد
بعدها أنا بسمة م98 بس مش ابروحي عندي توأم خويا باسم هو مش بس خويا التوأم هو صديقي وأكثر انسان يفهم عليا في الدنيا❤ أنا وياه في الشهادة الثانوية
وأخر العنقود أختي بدور م 2000 سنة اولى ثانوي
عائلتي نفس اي عائلة ليبية حالتنا المادية متوسطة يعني الحمدالله ماما معلمة قديرة بس لها فترة متريحة من المشي للعمل وبابا رئيس قسم محاسبة في شركة حكومية
بالنسبة ليا كنت بنت دلوعة وهادية لكن قسوة الايام والاحداث اللي صارت امعايا غيرت طبعي 180 درجة
بالنسبة لشكلي قصيرة بس مش واجد وبيضاء وجسمي حلو اعيوني سود واسعات وجههي امدور بس أكثر شي ملفت فيا شعري الاسود والغزير والطويل لعند نهاية ظهري..نشبه ماما بشكل كبير كنا كلنا ملامحنا ماشالله بس أنا اكثر وحدة وطبعا خويا باسم لانه يشبهلي
كنت نفرح لما انشوف الاعجاب في عيون الناس كنت عارفة روحي سمحة وممكن هذا اللي خلا عندي ثقة في نفسي اكثر...
علاقتي بماما كانت غير عن خوتي لاخرين كنت قريبة منها واجد وهيا ماكنتش تحمل فيا حاجة
************
انجوا لعائلة محمد او حمادي وفيه ناس اتنادي فيه احميدة ..محمد علي عباس مواليد 1994 متخرج وعنده محلات ملابس مواد غذائية عطور يعني مجموعة محلات عائلة محمد من الناس اللي منعم عليهم ربي بالرزق من جد الجد
بوه علي عباس ..وامه اسمها عازة ...أخته الكبيرة ماجدة م 88 متزوجة وعندها ولد وثلاث بنات...بعدها خوه الكبير اشرف م 89 محامي عازب ..وبعدها محمد م94وبعدها اخته سهام م 96 مخطوبة واخر سنة في الجامعة وبعدها اخته وداد م98 واخر واحد خوه الصغير عباس م 2003
عائلة محمد عايشة امعاهم اجديدتهم أم بوهم وعمتهم اسمها نجاة م 77 ممرضة مش متزوجة ولية زي ما ايقولوا بالف راجل وهم متعلقين بيها كأنها اختهم الكبيرة
موصفات محمد اعيونه الهدب كثيف واسود بس لونهم بني والشعر واللحية سوداء .. ابيض جسمه نفس اغلب شباب توا ..غالي عليه يلبس على الموضة ......شايف روحه ومايحبش البنات وماعندش فيهن ثقة..وطبعا مش بدون سبب
هذين اهم عائلتين في القصة وباقي الشخصيات انتعرف عليهم من خلال الاحداث
💙💙💙💙💙💙
