#ثمن_الخطايا
#الحلقة_22
وفي يوم كنت في الجامعة ونحن طالعين من القاعة جتني بثينة وامعاها خوها شاهين ..وأنا بصراحة انخاف منه ومانحبش انشوفه 😒
وطلعنا من القاعات ونحن نمشوا في الممر كنت ماسكة نقالي وانشوف فيه وبثينة تمشي جنبي وشاهين ورأنا ..ومانجيب علم الا وبثينة تنغزني في جنبي
أنا : ااااه كنك
بثينة : بدر بدر حي عليك
أنا رفعت وجهي وانشوف بدر يمشي في الممر شورنا 😰
من الخوف برمت بسرعة وحطيت النقال في يد شاهين ومسكت يد بثينة على اساس انسقم في سبيدروي
بثينة وقفت وشاهين لما شاف بدر فهم الجو وحط نقالي في جيبه ..وأنا طبست نلبس في السبيدرو 😣
بدر وصل لعندنا : سلام شن اخباركم
أنا رفعت رأسي وكأنني توا كيف شفته : اهيي بدر ..كيف صار
شاهين سلم على بدر : اهلين شخبارك
بدر ايفنص فيا : كان عندي شغل هنا وقلت نبرم عليك انشوفك 😐
أنا : اها 😅 خلاص كملت ونبي نطلع
بدر : مع من اتروحي 😒
أنا : مع وداد أخت أشرف
بدر بحت في شاهين : معاك سيارة
شاهين : اها امعايا ..اتروح امعانا
بدر بحت في بثينة : إن شالله😏
قعدنا نمشوا في الممر مع جيت وداد طالعة من المحاضرة مشيت امعاها وبدر عدا مع شاهين وبثينة ...كنت خايفة ونرجف ..حي عليا نقالي عند شاهين 😣 كنت انفكر اول ما انجي للحوش انكلم بثينة عشان تاخذه منه
جاء الحاج علي خذأنا وروحنا للحوش أنا رقيت فوق و وداد خشت مع بوها جوا ...القيت بشرى اتوتي في الغداء وأشرف مازال ماجاء ..خشيت غيرت دبشي وتوضيت صليت الظهر وقعدت مع بشرى في المطبخ ..لكن عقلي كان مع شاهين ..أنا مأمنة نقالي برمز لكن أكيد يقدر يأخذه لاي واحد في محل يفتح له ..وبعدها تذكرت أن عندي صورة فيه😣
خذيت نقال بشرى وخشيت للدار رنيت على بثينة ..ماردتش عليا🥺
جاء أشرف وبشرى حطت غداء..قمعزنا تغدينا ورفعت لمواعين وغسلتهم ..كملت وخشيت للدار المقعد كنت نرقد فيها وفيها ادبشي وحاجتي كلها
أنا طلعت مذكراتي وبشرى اتخش عليا
بشرى مادتلي فونها : أمسكي تبيك بثينة
أنا خذيته بسرعة منها ..وهيا كانت واصلة حدها حملها كبير ومتعبها : بعد اتكملي خليه امعاك نبي نرقد أنا 😩
أنا : تمام ..صكري الباب ورأك
طلعت بشرى وأنا رديت على بثينة : ها شن لاخبار😣
بثينة : اخبار شنو ..القيتك رانه عليا
أنا : رنيت نسأل فيك على نقالي ..عطاه لك شاهين 😫
