#ثمن_الخطايا
#الحلقة_35
نحن امقمعزين ومحمد يطلع من الدار بسرعة وجه اسود ومطبس ومابحتش في حد حتى نجاة اللي نأدته مشى وسيبها وسمعناه خبط باب الحوش بالقوة وركب سيارته وشيطها
معاش عرفت كنه واستغربت أنه طلع في الوقت هذا واخرى لابس توتة عمره مادارها ..محمد مايحبش يطلع بدش الحوش لاي مكان والجو امصقع ومن غير جاكة او جبوتي
نجاة اتكلم فيه لكن ماردش عليها...وقعدت كل بعد اشوي اترن عليه لكن هو مايردش...الساعة 11 ونص نجاة قالت خلاص خشن رقدن وأنا توا انشوفه وين
أنا طبعا من جوا نار واندير في روحي قدامهن عادي ..صبت كل وحدة عدت لدارها وأنا خشيت مع وداد ..وعلى طول قعدت انرن عليه لكن مافيش رد 💔
الليل اللي رقدوه الناس أنا ماقدرتش نرقده .. خفت عليه وعقلي قعد ايودي وايجيب ولانه ماردش عليا تعصبت أكثر من الخوف ليش مايرد عليا ..زعما صارت امعاه حاجة والا كنه.. قعدت انتقلب في مرقدي لعند الصبح وحسيت بطني وجعتني من الخوف ومعاش قدرت نقعد في مرقدي ..بحتت لساعة لاقيتها الساعة 6 وربع نضت مشيت للحمام غسلت وتوضيت صليت الصبح ..مافيش حد نايض هل الحوش كلهم مازالو امرقدين ..رديت قمعزت في مرقدي لعند الساعة 7 وأنا في حالة مايعلم بيه غير ربي 🥺😥
قعدت انوتي في روحي ونوضت وداد ..لابست وطلعت من الدار ومشيت للمطبخ سخنت الشاهي ..وقعدت انرن على محمد لكن مقفل ..وبعدها سمعت واحد خش من برا طلعت من المطبخ بحتت انشوف محمد خاش لداره استغربت شكله ..كان لابس تيشرت صيفي نص كم ابيض وسروال توتة اسود وشعره مبلول ..شكله داير حمام
جيت شوره ومحمد حس بيا والتفت عليا وأنا بدأيت فيه على طول : وين كنت كنك ماترد عليا 🥺😡
محمد مسك يدي : اشششش تعالي خشي توا يسمعوك
خشيت امعاه لدار ومحمد صكر الباب : وين كنت يامحمد .وكنك ماترد عليا 🥺
محمد : كنت في الاستراحة....وتليفوني مافيش شحن طفى عليا
أنا : اي استراحة ..وليش ماجيت البارح طولت وأنا نستنأ فيك 😥
محمد قرب مني : اسسس وطي صوتك ..توا يسمعك شي حد كنك أنتي ..وبعدها قلت لنجيوا
أنا برمت ونبي نطلع : اوكيه أنا اللي غلطانة خفت عليك 😡
محمد مسكني : تعالي هنا ..مش قصدي والله غير خايف يسمعنا حد من هلي
أنا : 😒
محمد : خلاص عاد فكينا من النكد على الصبح
أنا : نكد !!!! قصدك أنا نكدية 😒
محمد برم وجه : تؤ تؤ تؤ ..تبي عركة على الصبح والا كيف 😑
أنا بحتت فيه : لا مانبيش عركة ..لاني أنا ابروحي مرهقة وتعابنة ومش خاصني مشاكل ..ومتأسفة كان ضايقتك وعكرت مزاجك على الصبح يا استاذ محمد 😤
