#ثمن_الخطايا
#الحلقة_37
حطيت صلوحي في سريره ومشيت طلعت من بلكوني المطبخ وقعدت انبحت ..وبعد اشوي شفت أشرف طالع وماسك محمد متكي عليه وامعاه عباس والحاج علي سبقهم على السيارة فتحها وركب ولعها وعمتي عازة والبنات في جرتهم لعند برا ..وأشرف وعباس ركبوا محمد لاوراء وصكروا الباب وأشرف ركب مع بوه من قدام وعدوا للمستشفى وعباس صكر الباب وخشوا جوا 💔💔
قعدت نبرم حايسة فوق ابروحي ..شن صار امعاه ..شن عنده ..🥺😰
ونرجى في بشرى ترقى عليا اتقولي شن في لكن بشرى طولت وأنا معاش عندي صبر نرجى أكثر من هك ..شلت صلوحي ونزلت لوطى القيتهم في الصالة عطيت بشرى صلوحي وبحتت في وداد لانها هي الوحيدة اللي حاسة بيا 🥺😥..خذيت وداد وخشينا لدار
أنا صكرت الباب وبرمت سألتها على طول
أنا : كنه حمادي يادودي شن ايحس 😰
وداد قربت مني : مافي شي إن شالله ..عنده حرارة من الصبح مابتش تنزل بكل
أنا : حرارة شن قصتها ..وداد احكي الحق شن عنده 😰
وداد : والله نحكي جد ..عنده حرارة ومن بعد الغداء بابا قاله عدي للمستشفى لكن هو مابش يمشي ..وتوا ارتفعت عليه واجد وبابا خذاه بالغصب
أنا : يانعليا 😭
وداد : اششش ماتخافيش عليه أكيد اينزلوله الحرارة وايردو للحوش 🥺
قعدت مع وداد في الدار اشويا بعدها طلعنا وقمعزنا معهم برا ..لعند بعد ساعة جاء عمي علي ابروحه ..وقال محمد عنده التهاب في صدره ..ولان له فترة سببله حرارة ولازم يقعد في المستشفى كم يوم عشان اينزلوا الحرارة والمضادات الحيوية ...وأشرف قعد امعاه غادي 😥
اصعب موقف لما حد غالي على قلبك يمرض او ايصير امعاه اي شي وأنت مش قادر اتعبر حتى عن مشاعرك ..كنت امقمعزة امعاهم وكأني عادية ..لكن من جوا نار تأكل في جوفي ..خوف والالم سيطر عليا ..وحزن لاني مش قادرة حتى انطمن عليه بالتليفون ..يعني لو كان الوضع القديم والطبيعي راه كلمته عادي واطمنت عليه ..لكن وأنا وياه متعاركين ومنفصلين ..كيف نبي انكلمه 🥺😭
أنا وبشرى رقينا فوق وهم خشوا رقدوا ..وأنا لعند الصبح وأنا انخمم فيه وانفكر ..وحتى لما قررت انتنازل وانكلمه نطمن عليه للاسف القيته مقفل 💔😥
يادوب غفيت اشويا الصبح ..ونضت طايرة قمعزت في سريري وحاولت انكلمه اخرى لكن مازال مقفل ..صبيت غسلت وتوضيت ورديت لسريري ..الساعة 7 ونص رنيت على وداد القيتها راقدة
وداد : ايوا
أنا : صباح الخير
وداد تثأوب : صباح النور
أنا : كيف مازلتي راقدة ..شن صار في حمادي 🥺
وداد : قالوا اكويس ..بابا طلع بدري ايودي في أكرم للمدرسة ويبي يمشي ايشوف حمادي... ..أنا نضت بدري القيت ماجدة تحكي مع بابا قالت كلمت أشرف ..وقال وضعه أحسن لكن الحرارة تمشي واترد ..لكن مافيش خوف عليه إن شالله
