#ثمن_الخطايا
#الحلقة_25
بعد ربع ساعة الضي جاء والمصعد بدأ ينزل وصل لدور الارضي وانفتح الباب وأنا كان مغمى عليا خشت عليا مرات البواب وتمت اتوعي فيا ..واترش عليا في امية وبدأيت نوع اشوي اشوي ..صوت هرجة وناس واجد وأنا مازلت دايخة وفي لحظة حسيت حد قرب مني وشالني بين ايديه
فتحت اعيوني وبحتت شفت وجهه محمد وكنت نحساب روحي نحلم لان محمد مش قاعد مازال في العيادة ..بس بنة العطر مش غريبة عليا
حطيت رأسي على صدره وغمضت اعيوني 💗
مشى بيا لعند اول شقة مفتوحة كان فيها مراة وراجل واعيال اصغار ..الراجل هو اللي قاله جيبها هنا ..نزلني على الكنبة وأنا كنت واعية بس دايخة اشويا ..اول مانزلني قمعزت وبحتت فيه ..كان محمد فعلا ..ماعرفتش كيف جاء ..
المراة جابت كباية امية .شربت منها ..ونمسح في وجهي وماقدرتش انبحت في وجهه محمد كنت منحرجة منه وخايفة ايهزبني لاني طلعت وماسمعتش كلامه🥺
محمد امصبي طبس عليا : شن اتحسي روحك توا اكويسة
أنا بحتت فيه وطبست : لا..تمام اكويسة
محمد : وين كنتي ماشية 😑
أنا بحتت فيه وصبيت : نبي نمشي للشقة
المراة : خليك اشوي بس ..راكي اطيحي
أنا : شكرا صحيتي ...بس أنا اكويسة والله
المراة : ردي بالك من روحك 😊
أنا : إن شالله
من خلال للهجة المراة عرفتهم ليبين
شلت شنطتي ونبي نطلع ومحمد قرب مني ومسك وشاحي : البسيه اكويس
طبعا لما انخنقت في المصعد فكيت لاخلال من وشاحي ولما محمد شالني الوشاح نزل من على شعري ..أنا رفعته اشويا بس شكله مازال شعري باين
أنا مسكت الوشاح ولابسته اكويس وفنصت في محمد وطلعت لاني حست بيه يبي يفرض كلامه عليا 😒
بس ماننكرش أن عجبتني اللقطة ..لانه مايبيش حد ايشوف شعري ...مع أني انا من يوم القصة اللي صارت في الداخلي وأنا شعري معاش طلقته بكل قعدت ديما انلف فيه فوق ..صارتلي كيف الحالة بعد القصة قعدت نحلم بيه ديما وانخاف عليه عشان هك معاش انحب نطلقه
محمد لحقني ومسك ذراعي وأنا بحتت فيه لكن ماقدرتش انتكلم لان الناس ايبحتوا فينا ..مشى بيا شور المصعد بس أنا وقفت وهزيت رأسي لا لا 😰
محمد : تعالي ماتخافيش أنا امعاك
أنا : لا لا مانبيش نركب فيه 😰
محمد قرب مني : نحن في الدور التاسع راه تبي ترقي لعند فوق
أنا برمت ومشيت للدروج : لا مانبيش نركب ..عدي أنت وأنا توا نرقى من هنا 🥺
