#ثمن_الخطايا
#الحلقة_4
ماما اتبحت فيا زين وقالت : من أنتي !!؟؟؟
💔💔
مش عارفة شن صار لكن حسيت كأن واحد صب عليا امية امصقعة لعند حسيت ببرودة في ظهري ...على طول خنقتني العبرة واعيوني من الدموع معاش انشوف قدامي 😭😭
عارفت شن معناها يا بنات عارفت كيف اتحسن لما أمك اللي رباتك وكبراتك واللي اتحبك أكثر من الناس كلها ...أمك اللي المفروض حافظة كل تفاصيل وجهك عارفة كل حاجة عنك اللي اتحس بيك قبل ما اتصير امعاك حاجة....... اتبحت في اعيونك واتقولك أنتي من ...ماما ماعرفتنيش يابنات 🥺💔
😭😭😭😭
أكيد مافيش حد ايحس بيا الا اللي صارت امعاها نفس اللقطة 💔💔💔💔💔💔
صبت خالتي بسرعة وجت قمعزت جنب ماما وانا صبيت نبكي وعديت للحمام وبشرى وبدور قمعزوا مع ماما على السرير
خالتي امسكت وجه ماما : بسم الله الرحمن الرحيم ...اعويشة حبيبتي بحتي فيا
ماما بحتت فيها زين ولكن ساكتة
بشرى صبت وقربت من وجهها ماما : ماما أنتي اكويسة ..أتحسي بدوخة والا صداع
ماما بحتت في بشرى : لا ما انحسش في شي يا ابشيرا
خالتي تنهدت : الحمدالله ...اتخشي ترقدي اشوي لعند يأذن العصر
ماما صبت وخالتي غمزت لبشرى عشان ماتلحقهاش .ماتبيش ماما اتحس بشي ..بشرى قمعزت مع بدور وخالتي خذت ماما وطلعت من دارنا ...أنا خشيت للحمام بكيت بحرقة ..عشان مانبيش نبكي قدام ماما ..طلعت من الحمام تلاقيت مع خالتي وماما طالعات من دارنا
خالتي : أمك تبي ترقد اشوي
ماما بحتت فيا : كنك ابسومة مريضة
أنا لما ماما قالت أسمي ضحكت وجيتها ضميتها : لا رأسي يوجع فيا بس
ماما : خذيتي دواء
أنا بحتت في وجهها : توا ناخذ ..
خالتي بحتت فيا وابتسمت وعدت هيا وماما لدار
أنا لما ماما عرفتني تريحت ...يعني حاجة مؤقتة ..أكيد بعد العملية كل الاعراض هذه حتحول ...كان هذا تفكيري
بعد العصر طيبنا قهوة وكلنا ملتمين كلنا ماعدا بابا وبدر وبشير ..وتينا سفرة عصور ..وقمعزنا انعصروا
وجاء بشير جايب سلوى والبنات من هلها ...وكنا امرايفيين على اسيل وسما والبنات جن لماما وقمعزنا عندها وسلوى حولت عبايتها وجت اتعصر امعانا
سلوى كانت عند هلها وماتعرفش على التطورات في حالة ماما ..بعد العصور بدور خشت لدار وانا وبشرى انلموا في حوسة العصور ..وماما خشت لدارها ...وخالتي خذت سلوى واطلعت برا لجنان ..كانت تبي اتفهمها حالة ماما ..وحاولت اتفهمها أنها اتساعدنا اشوي عشان نحن دراسة وخاصة في الصبح مافيش حد قاعد..وسلوى قالتلها إن شالله ..لكن هيا كل شي عندها بالجو كان طاربة تمام وكان ماعندهش جو تقلب عليك عادي😑
